انا قلت ابغى اعيش بأمان :
ماراح انتظرها منه .. عشان كذا .. وظيفتي و شهادتي هي الامان لي بعد الله ..
قررت امشي خلاص باجراءات الدكتوراة و الحمد لله بديت فعليا ..
و مثل ماقالوا الاخوات هنا نورة و كريستالة .. سافري و خذي شهادتك و زوجك يروح معاك
ان درس و تعدل .. رجعت برجال و شهادة .. ان اهمل و طنش .. رجعت بشهادة

و باحاول بإذن الله اضمن بيت ملك هنا عشان اولادي و مستقبلهم ..

---------------

ابغى ضمانات :

قلت لزوجي معليه .. تبغاني اتحمل معاك المسئوليات ..
اعرف بعد كذا .. راتبك متى ينزل بالضبط .. و فين بينصرف ..

قالي كيف يعني .. اخد منك مثلا عشرة و اقول رايح الحلاق ؟
قلتله لا .. بس بشكل عام ..

و هو اصلا حاليا بياخد مني كل مرة اذا احتاج بس مبالغ صغيرة
مثلا 20 عشان البنزين و زي كذا ..
فإيش الي يمنع انه اذا استلم راتبه يخليه معاي ..

انا كنت ضد الفكرة هذه ..
بس دحين راح اشد عليه بالموضوع هذا ..

في رمضان و قبل .. ماكنت ادري متى ينزل راتبه و لا يقول لي ..
و ينصرف راتبه و انا على بالي لسى ما استلم راتبه .. و انا اجلس اصرف
و لما اساله على خجل و بعد ما اشوف عدى شهر و نص و اساله
يقوم يعصب و يسوي فيها انه متحمل مسئوليات

بس دحين .. راح اجلس له .. يا يقبل بالشرط هذا ..
يا بجد .. انا المرة هذه غيييييير ..

.
.

كمان طلبت بعد اجازة الحج .. يكتب لي ورقة بالمحكمة عند القاضي
و تتوثق الورقة .. انه اخد مني مبلغ ...... اللي يكتبه هو ..
راح اخلي الورقة معاي .. بس كضمان .. في حالة انه يطعنني بظهري
قلت له راح استخدمها

قلت له معلييييه .. انا بلحظة بيتي كان بينهد و بسببك ..
و ما عندي اي ضمانات .. و ما راح اعيش معاك مغفلة ..

لو شفت برنامج شات .. او اي شي بسيط او اسم وحدة بجوالك
او المهم ريحة خيانة .. قلتله ماراح اتعبك و لا اتعب حالي ..
و لا راح اسالك .. تخرج من حياتي و لا عاد تشوفني بحياتك ..

قالي اكتب لك بالمحكمة 5 مليون .. لاني مستحيل اخون .. او اطالع بوحدة غيرك
شفت الطريق هذا ما منه فايدة و كلام فاضي طلع .. و عفته و ما وراه غير خراب البيوت

طبعا انا باطلب الورقة هذه .. عشان مستقبلا لو صار شي لاسمح الله يخص اولادي
مثلا يعمل حركات نذالة و يمسكني من اليد اللي توجعني و هما الاولاد .. و نحن عندنا
القانون مثل ماسمعت ينصفوا الرجل و صاحب زوجي محامي ..

فأنا من حقي اطالب بالورقة هذه و اعتبرها مؤخر صداق او اي شي ..

وقتها لو ضمنتت الورقة هذه .. راح انام و انا مرتاحة ..

.
.

حكاية اني مابغى اعيش مغفلة ..
فالحمد لله .. اوراقه صارت مكشوفة امامي .. و الدليل اني من وقتها
فهمته و حسيت و كلمته و قلت له حركاتك حركات المغازلجية ..
و صرت دحين تلميذته .. اضحك عليه و على اهله و قبيلته ..
والحمد لله فيا ميزة اني اتعلم بسرعة ..
و ميزة تانية .. اني اخاف ربي و محترمة حالي و مبادئي ما اتنازل عنها ..

بس انتقامي شديد .. لو حطيت شي براسي ..

.
.

اخر شي مابغى اكلف نفسي اي شي فوق طاقتي ..

يعني مثلا .. البيت مستحيل انظفه .. لاني برمضان انشغلت بتنظيف البيت
و تنظيف الاولاد و الاهتمام باكلهم و شربهم .. و سي السيد يبغاني اترك كل شي
و اجلس معاه فاضية ..

الشغالة موجودة و بادفع لها ..
و اجازتها اليومين هذه ..

ما بأمسك اي شي بالبيت .. يا يساعدني و يتحمل معايا مسئولية البيت
مثل ما انا حاليا شايلة مصاريف مقاضي البيت .. او براحته ..

الكلام دا قلته له يوم رجعت له ..

اما الاولاد .. فمن امس و انا ماسكة ولدي الصغير و من قبل امس ..
شغالتي عندها اجازة ..

اليوم قلت له ..
مالي دخل فيه .. هو ولدك انت كمان ..
تركته مع ابوه بالغرفة و صكيت الباب عشان لايجي ورايا ولدي ..
طبعا شبعان و نظيف .. بس ماراح اشيله ..

من يومين و انا شايلته ..

اخده ابوه دحين و نيمه معاه ..

اهم شي احافظ على صحة اعصابي .. و جسمي ..
عشان اكون مروقة و على سنقة عشرة ..

.
.

هذا هو اللي يبغاه زوجي ..

ولو سافرنا برة بإذن الله .. بيتحمل معاي مسئولية البيت ..
ماراح اكون مثل امي ( مضحية ) ..

و لاراح اخد شغالة معاي لبرة ..
يا يصبر زي ما انا بأصبر و صبرت ..

يا يعمل اللي يريحه ..

.
.

هذه الضمانات

.
.

و اخر شي ..
قلت له يقدم لي اعتذار قدام اهله .. على الشي الي عمله اخر مرة ..

قال ببستلم راتبه و يحجز استراحة و يعزمهم و يقولهم بمناسبة اني غلطت على زوجتي
على اخر موقف حصل بيننا ..