هل طبقت شيئ او مشيت اي خطوة للامام !؟

اخوي البليغ ..
تعرف المخطوبة كيف تعامل خطيبها ؟

هو هذا طريقة تعاملي معاه ..

.
.

- الاحترام يكون موجود ..
هذا الشي من زمان و من بداية زواجنا كنت احرص على وجوده بيننا و ألح عليه ..
بس زوجي وصل قبل لمرحلة يمزح معاي كانه يمزح مع اي واحد من الشباب او اخوانه
يعني يمون علي لدرجة الاستهانة بي .. فما كنت قبل أجاريه لما يزودها

دحين لو مثلا كنا نتناقش عن شي و يرتفع صوته او يتكلم بطريقة اهله ..
اتوقف عن الكلام ثواني .. و اقول له كلمني باحترام ..

اهم شي نبرة صوتي و صوته ما تعلى ابدا ..

انا بداية الزواج كنت متعودة لما اوضح وجهة نظري .. صوتي يرتفع لاشعوريا
بس بعدين تعلمت و عودت حالي اني احرص على نبرة صوتي .. للدرجة الي اتعكسنا فيه انا و زوجي

المهم ..
الاحترام من الاساسيات اللي ثبتتها ..
و الحرص على نبرة الصوت ..

.
.

و لو حسيت اني متضايقة و معصبة .. ابعد شوي و ما اكمل الكلام ..
لو حسيت اننا بنتصادم بوجهات النظر ..
اتوقف عن الكلام و اقوم شوي .. وىبعد دقيقتين ارجع و امسك يده
و امسح على راسه و اقول له لاتزعل مني ..

ترى كان قصدي كذا و كذا و اتفهم كلامي كذا ..
و انت لما قلت كذا .. تضايقت شوي ..
بس خلاص اهم شي انك ما تزعل و تكون راضي عني ..

مثال على طريقة كلامي معاه حاليا ..

لكن قبل و بعد المواقف الي حصلت منه ..
يكون قلبي مجروح منه و افتكر الي حصل منه بالغربة
و اتقصد ارمي كلمة تستفزه او تجرحه و كأني قلتها بدون قصد ..
و لما يزعل كنت اقول له .. وي ما قصدت ماتعرف الحريم وقت الزعل يقولوا اي شي ؟؟؟

بس خلاص .. دحين همي اني اعامله باخلاقي انا .. بتربيتي انا ..
بالانسانة اللي بداخلي ..

و لو الشيطان دخل بيننا و بدأ العناد يدخل بيننا عن طريقي .. اقوم اسكت و اتنفس و اتعوذ من الشيطان
و اقهر الشيطان .. و اروح اسلم على راس زوجي .. يقوم زوجي يخجل و ينسى كل شي و يتأسف مني ..

.
.

كنت احسب اني عشان اعالج جروحي .. لازم انفصل عنه ..
لانه طبعي مع الناس .. اللي انقرص منه .. انسحب من حياته بهداوة و احترام .. و ما التفت للخلف ..

بس اكتشفت انه العلاقة الزوجية علاقة مختلفة .. خاصة لو فيه عشرة طيبة و لو فيه اطفال ..
و اكتشفت انه زوجي بالنسبة لي لو شلنا العواطف على جنب .. انه اقرب صديق لي ..
كيف ممكن الواحد يتخلى عن اعز و اقرب صديق لروحه و لنفسه !؟


فعلشان استمر معاه .. لازم اتخلص من الجروح اللي هدمت حياتنا .. و خلاص ارميه خلف ظهري و انساه
خاصة انه مافي اثباتات الى الان ..

و الحمد لله .. بكتابتي للموضوع هنا .. شلت النظارة السودا .. و نسيت اللي فات ..

.
.

زوجي صار يتكلم معاي عن همومه .. بعد ماكان كتوم و حتى امه ماتعرف اللي بقلبه ..
صار يحكي لي عن عمله و اصحابه .. و عن مباراة البلياردوا ..

توقف عن الكذب نهائي معاي .. و هو اللي وعدني و طلب نتعاهد انه ما اكذب عليه و لا هو يكذب
انا طبعا ماعمري كذبت عليه ..

بس ما احكي له كل شي زي زمان .. بس لو سالني جاوبته ..

.
.

بس احس اني صايرة الصق فيه بزيادة و استمتع بكل لحظة وجودي معاه ..
اخاف من الموت يخطفه نني لاسمح الله مثل ماخطف الحبايب ..

كنت قبل ما اظهر له كل عواطفي عشان اعرف قلبي ضعيف ..
دحين احس اني صايرة الصق فيه مرة .. و هو احسه مبسوط كذا ..

بس نفس الوقت ماني ضعيفة زي زمان ..

.
.

مستعدة اتخلى عنه بسهولة لو لاسمح الله بيوم استغلني

انا دحين بأقدم له كل شي ممكن اقدم له من احاسيس
لانه مافي اي فرص تانية بعد كذا

.
.

لكن مو معناها اني اثق فيه
بس مصدقته لحد دحين ..

لانه من هذاك اليوم و هو بيحاول يثبت لي انه غير ..

.
.

بس قدام اهله اشعر بالامان بوجود زوجي ..
يعززني قدامهم و الحمد لله .. و انا احترمهم و اساعده على انه يبر بأمه و ابوه ..
بس زوجي شخصيته بشكل عام جدا تغيرت عن قبل ..

لدرجة اننا كأننا انعكسنا ..

صار يتكلم و انا صرت هادية ..
صار نايسكت عن الغلط .. و انا صرت امشي كثييييير و اطنش ..
صار يدافع عني و يحسسني انه مسئول عني و عن راحتي و يغار ..

.
.

بس ماعرف ..
هل بيستمر كذا و لا فترة مؤقتة ؟

احساسي يقول انه صادق المرة هذه ..