رد : اعتذار للجميع ....ارجو من الجميع الدخول
*
دوم ان شاء الله تكون ايامك افراح والحمدلله بخير ونزقح
وانا مع نواف ميه بالميه ما شاء الله عليه وعلى رده وانا حاس ان الله ان شاء بيهدي قلب زوجتك لك ولاكن انت عندك مشاكل بسيطه ﻻزم تشتغل عليها واولها عندك مشاكل بالشخصيه واي واحد لابد يكون فيه عنده شوية مشاكل وعشان كذا قلت لك زور استشاري علاقات زوجيه واذا مانفعك ماراح يضرك وانت تحب البنت هذي ومافيه احد يقدر ينكر هالشي ولانك تغليها لاتستخسر على نفسك كم قرش تدفعه
ومن ابرز المشاكل عندك ان مشاعرك متقلبه وهذا اكثر شي ممكن يضرك في علاقتك وانا لاحضت عليك كثير تغير رايك وماقادر تسيطر على عواطفك وعايش تقريبا حرب مع نفسك وماحد قادر يساعدك وانصحك فالوقت الحالي تكتب شعورك بورقه يعني خلي جنبك ورقه وقلم واذا حسيت بشوق او قهر او اي احساس سجله بهالورقه وبعدها راح تحس بتقلباتك العاطفيه وراح تقدر باذن الله تسيطر على نفسك
وبالنسبه لام البنت انا الاحظ انك حاط عليها كثير ويمكن هي اكثر وحده تشتغل على انجاح العلاقه بينكم بس انت مو قادر تستفيد منها على الشكل المطلوب ياخي الام احن على بنتها منك ومن ابوها كيف تتوقع انها بتجلس تخرب على بنتها عشان تتطلق وبعدين لو هي ضدك كان ماوافقت على الزواجه من الاصل ورفضتك يوم العصمه بيدها يعني مااتوقع وحده تكرهك بتخليك تتملك على بنتها وبعدين الحب يجي مع الوقت وانت ماعشت مع البنت عشان تبدأ تطلب منها مشاعر يعني كانك جاي تبيها تحبك غصب وتفرض عليها هالشي بالقوه وبكذا ماراح تقدر تخليها تحبك اكسب امها في طرفك وخليها صديقه لك ولاتحاول تخليها تظغط على البنت وبعد ماترتاح لك الام راح ترتاح لك البنت ويمكن اذا شافت تعاملك مع امها جيد راح تبدأ ترتاح لك وانتبه لاتكرر اخطأك بسوألك عن مشاعرها وهل تحبيني ولا تكرهيني هذا اسخف سؤال يمكن تسأله والحب يبين من اهتمامها فيك
وبالنسبه لموضوع الدراسه انت تقدر تحسسها بالراحه من هالجهه وفيك تبحث عن التخصص اللي هي جالس تدرسه وتبدا تناقشها فيه وبكذا يكون فيه بينكم قاسم مشترك تقدرون تتناقشون فيه
وايضا خلك ذكي بالحوار معها وارمي لها كم كلمه انك تحب البنت المتعلمه وانك ترغب بوحده فاهمه ورزينه
وامدح النساء المتعلمات وشوف لك كم دكتوره كذا واقرا عن سيرتها التعليميه واتفلسف شوي عند زوجتك
ولاتسمع للي يقول لك خلاص مافيه امل ان علاقتك تتحسن ولايقول لك انك جيت بوقت تأخر وانا اناقض اخوي نواف بهاذي لانك مهما كان لازلت زوجها ومهما كان لازال فيه قبول لك من ناحيتهم وخليك حبيب طيب ساذج لانك تبيها تحبك ولاتظغط عليها باي حاجه وحسسها انها بتعيش مع خادم لها واترك اللي يقولك عودها من البدايه عشان ماتعذبك بعدين هذا كلام ناس غير متعلمين ومهما كان الناس معادن وفي سن الزواج تكون شخصية الانسان تشكلت وبدأ يكتسب خبرات في حياته ولايمكن انك تفرض عليها تغير من نفسيتها او شخصيتها عشانك احترم شخصها وخليها هي تحبك بنفسها
اتمنى مااطلت عليك لاكن نواف اعطاك ثلاث نصائح اتمنى من الله ان يجبلني واياك عليها لانها اثمن من الذهب وفيه خير عظيم
اسأل الله لي ولك ولنواف وللجميع كل الخير وحسن التدبير وخل عنك الوساوس الزايده والتفكير الكلام الكثير اللي مامنه فايده وترا الحب بيد الله وهو قال عن نفسه انه قريب يجيب الداعي اذا دعاه فلاتبخل على نفسك بالدعاء والاستغفار والله يوفقك الى مايحب ويرضى