رد : تجمع و يوميات النحيفات
اوكي الحين ..
1. اشربي ماء كثير .. اقل شيء 8 اكواب في اليوم ..
مثل ما قلت لك تحتاجين تبنين عضلات .. والماي هو العنصر الاساسي في تركيبة العضلات ( تقريبا 70 او 80 في المئة ) والباقي بروتين .. كمان الماء يخلي العضلات تبين اكبر .. ويساعد في اسراع عمليه نمو وتطور العضلات.. وطبعا لها فوائد كثيييره غير هذه .. كفايه انها تخلص الجسم من السموم وتعطي نضارة للوجه ..
وعلى فكره حتى اللي تبي تنقص وزنها لازم تشرب ماء كثير .. سبحان الله الماي شيء عجيب يساعد النحيف والمتين ..
الفرق مثلا انتي نحيفه لا تشرين ماء قبل الاكل او مع الاكل .. لانه معدتك بتمتلئ وما بتاكلي اقل .. لكن المتينه يفضل تشرب كوب او كوبين من الماء قبل الاكل بنصف ساعه .. وبتاكل اقل ..
2. لازم تاكلين اقل شيء 3 وجبات في اليوم .. الفطور وجبه اساسيه ما ينفع تتركيه .. انتي ابدأي شوي شوي لانه معدتك صغيره ما راح تقدري تاكلي فطور كامل مرو وحده .. وبعدين انتي احسن لك بعد ما تحسبي عدد الكالوريز اللي تحتاجينه .. تقسميهم على 4 , او 5 , او 6 وجبات في اليوم .. انا افضل في حالتك انك تاكلي 6 مرات احسن لك .. طبعا ما راح تكون وجبات كاملة.. عندك الفطور .. والغذاء والعشاء وجبات اساسيه .. و3 وجبات خفيفه .. snacks .. انتي شوفي كيف جدولك ومتى تقدري تاكلي .. اعملي جدول والتزمي فيه .. على فكره مو لازم كلها تكون اكلات .. تقدري تشربي عصاير ...بعدين بقول لك شو تشربي..
3. اعملي رياضه خفيفه .. مارسي المشي مثلا .. حتى لو 20 دقيقه يوم وراء يوم .. والايام اللي بينهم تعملي رياضات مقاومه .. هذه اللي تساعدك على بناء العضلات .. ممم تعرفي الرياضات اللي ترفعين شويه اوزان ؟؟؟ مثلا تبدأي بنصف كيلو في كل يد وبعدين شوي شوي تزودين .. لانك اذا استمريتي على نفس الوزن النمو بيتوقف .. اممم اختي كانت تعمل رياضه بس ناسيه شو كان جدولها الضبط .. بس هي كانت تروح الجيم والمدربه بعد ما سوت لها فحص شامل عطتها جدول تمشي عليه .. وطبعا الرياضه تتعب.. وتجوعي وتاكلي .. عاد الشاطره اللي تحاول تاكل اكلات فيها بروتين + كالوريز في هالوقت ..
وكمان بما انك حتبدأي تاكلي اكثر ان شاءالله .. الرياضه مهمه عشان جسمك يصير رشيق ..
4. حاولي تكونين مرتاحه دائما . .. وخلي موقفك يكون ايجابي تجاه الاكل .. وكلي وانتي مستمتعه .. حاولي تستفيدي من زميلاتك في الدوام مثلا .. فيه ناس ماشاءالله شهيتهم مفتوحه للاكل ويشجعون الوحده انها تاكل .. اذا عندك صاحبات كذا خليهم يشجعوكِ على الاكل .. اختي الحين في الدوام معاها زميلاتها احسهم يجبرونها تاكل خخخخ والا لو هي بروحها ترجع البيت ومو ماكله شيء ابدا .. عادي..
5. سالفه انك ترجعي من الدوام وتبدأي تطبخي وبعدين تاكلي هذه ما تنفع ابدا.. حاولي تجهزين اكلاتك من قبل وبس ترجعي البيت تسخنيه وتاكلي.. واذا زوجك يتاخر مو معناته ما تاكلين بالعكس هذه فرصه تاكلي وجبه او سناك وبعدين ترجعي تاكلي مع زوجك لما يرجع .. واذا مرة مو مشتهيه شيء كلي لك صحن سلطه .. اذكر زمان اختي راحت عند دكتوره قالت لها كلي صحن سلطه كبيير قبل وجبتك الرئيسيه .. مش معاها .. وبعد ساعه او ساعتين مثلا تتغذي.. بتاكلي اكثر .. عكس لما تاكلي السلطه مع الاكل نفسه ..