رد : "غيبة الزوج في الأحاديث الهاتفية بين النساء"
كلام رائع وبصراحة انا في العمل اذا اقعد مع الموظفات وخصوصا وقت الاكل سوالف مع بعض يفتحون مواضيع عن ازواجهم والي تقول مثلا زوجي يحب الاكل وابغيه يخفف وزنه والي تقول زوجي ذابحني بالغيرة الزايدة ويشكك فيني
اما انا افضل السكوت ومااحب اقول اي شي عن حياتي مثلا مرة سألتني وحدة اهل زوجك طيبين معاك قلت لها اي وهادئين وحبوبين مع ان اهل زوجي صحيح يحبوني بس عندهم كثير مشاكل مع بعض بس مااحب اطلع اسرار اهل زوجي لانهم اهلي ومااحب استغيبهم واحب اذكرهم بالخير وخصوصا قدام زوجي
يعني مرات تصير مضايقات منهم بس ماعمري قلت لزوجي امك او اختك قالت ولا سوت ابدااا
عيب اسبب فتنة بينه وبين اهله
مرة من المرات زوجة اخوه ضايقتني بكلام واحرجتني كثير وعصبت منها بس فضلت السكوت ومشيت وانا في داخلي معصبة وزعلانة بس مابينت لزوجي ان صاير شي او اني مضايقة لاني انسانة هادئة ومااحب المشاكل وبعدين المراة حست بغلطها واتصلت واعتذرت وانا مشيت الموضوع وماخليته يكبر
بس لو اني قلت لزوجي او حسسته بشي اكييد راح تكبر المشكله
يعني احسن شي مااحد يطلع على اي خلافات او عيوب لزوجي او غيره
مااقول لاحد عيوبه وبالعكس احاول اذكره دايم بالخير ونفس الشي بالنسبة لاهله مااذكرهم الا بالخير سواء قدامه او قدام اهلي او اي احد
والله يديم المحبة بينا قولوا امين