رد : افكر بالانفصال
وعليكم السلام ورحمة الله وبركاته
اختي الغالية اوناا تعوذي من الشيطان وصلي على النبي عليه افضل الصلاة والسلام وكل مشكلة ولها حل ان شاء الله الحين ريحي نفسك ولاتحملينها فوق طاقتها وانا اختك هونيها وتهون بعون الله بس انتي إهدئي الحين وتعوذي من الشيطان وحاولي تفهمينا بالمشكلة اللي صارت بينكم يمكن انتي من وجهة نظرك تشوفينها تافهه لاكن زوجك لا ويمكن ان زوجك كان مضغوط ويمر بظروف وصارت المشكلة وتفاقمت الأزمه بينكم فما لقى إلا انتي قدامه فرغ الشحنة عليك اصبري وانا اختك وخذي الأمور بروية وحكمة ولا تستعجلين بطلب الطلاق ترى هذا من وساوس ابليس اللي يخرب فيها بيوت المسلمين انتي عندك اطفال وفي غربة عن اهلك وديرتك ومثل ما انتي مضغوطه ونفسيتك تعبانه كمان زوجك مثلك يا اوناا تلاقينه شايل هم ثقيل من الغربة وبعد الأهل والأصحاب وعمله متعب وشاق اتوقع مثل ما اخبرتينا من قبل فترة وهذا زوجك وابو اولادك ومالكم إلا بعض يا اختي شوفي ليش هو تصرف كذا وايش اللي خلاه يمد ايده عليك ترى يا اوناا ازواجنا يشقون برى ويتعبون نفسيا وجسديا واحنى لازم إنا نراعيهم ونتحملهم من لنا غيرهم هم اباء ابنائنا فلذات اكبادنا وشركاء حياتنا والحياة ماتدوم لإبن آدم دايم كلها سعادة لابد من ان نمر فيها بأوقات تعيسه وفيها مشاكل واذا ماوجهناها بكل اصرار وحزم وقوة راح نصير فاشلين في مهمتنا
وزوجك يا اوناا يمكن أول مرة يمد ايده عليك ويمكن انه كان مضغوط وعنده ظروف انتي ماتدرين فيها ويمكن ان نقاشكم وطريقة حواركم كانت بوقت غير مناسب علشان كذا صارت المشكلة بينكم وسمعتي منه الكلام الجارح
يا اوناا زوجك إن شاء الله إن زوجك انسان طيب وابن حلال حاولي انك تهدئين وترتبين الأمور وابتدي من اول نقطة حدثت فيها المشكلة بينكم وفكري فيها وشوفي كم نسبة الخطأ منك وكم نسبة الخطأ من زوجك وراح تلاقين ان المشكلة بسيطة لاكن الشيطان كبرها بينكم وخلاكم تختصمون إذا انتي طلبت الإنفصال علشان مشكلة تافهه وخلاف بسيط وش نقول للي زوجها سكير واللي زوجها خائن واللي زوجها كل ماطلع ضربها وكل مادخل للبيت ضربها واهانها ويسمعها شتى انواع الكلام السيئ
انا ما اقول لك لاتاخذين حقك علشان انه مد ايده وتكلم عليك بكلام جارح لا هنا لازم يكون لك موقف ويكون لك رد اعتبار لاكن مو بطلب الإنفصال يا اوناا من اول مشكلة حكمي عقلك وشوفي لك حل يرضيك غير الإنفصال وفي نفس الوقت يكون درس لزوجك ماعاد يكررها معاك وان شاء الله ان اموركم تزين وتنصلح بإذن الله بس فكري بهدوء والحين اتركي امك في حالها انتم بالبداية حلي مشكلتكم بأنفسكم ولا تدخلون احد فيها اجلسوا وتفاهموا انتي وزوجك وان كان بتقولين لنا وش هي المشكلة إن شاء الله إن هنا الإخوان والأخوات ماراح يقصرون معاك بالحلول وراح تنحل مشكلتك الحين مانقدر نعطيك حل واحنى ماندري وش المشكلة اللي صارت بينكم وصعب تقول وتنصح بشئ انت ماتعرف عنه وهذا من حقك ان اردتي ان تخبرينا او تختارين من تثقين فيهم وفي رأيهم من الأعضاء وتقولين لهم وش هي المشكلة وهذا شئ راجع لك وان شاء الله مايصير إلا كل خير وربنا يهدي سركم ويصلح اموركم وتعدي هالمشكلة على خير يارب .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
التعديل الأخير تم بواسطة أم سلطان1 ; 24-12-2012 الساعة 06:13 AM