تصدقين ياذكرى كنت بين نفسي هذه الايام أقول عسى مافي وحده من الربع تغلقنا بموضوع هالشهر وشكيت فيك لاني اعرفك حسااااااااااسه
فجأه فتحت القسم أمس وأرى في مقدمته اسمك في هاللحظة قلت الله يستر
ويبي لي مخمخه عليك ..
أولا :الحمد الله اني شفتكم من جديد بفضل الله ثم فضل موضوعك
ثانيا:القسم هذا متنفس للجميع بالعكس ترى حتى انى يجيني شعور ابي افضفض واسولف معكم على العام

أضافه على كلامك ترى الشعور اللي متعبني واحاول اطلع منه هو لما اجي ابارك لأحد بملكة أو زواج يعاملوني بنظرة الشفقه اللي يحضني واللي تمسك أيدي وتدعي لي واللي واللي ... ياختي شعور مش حلو انك ناقصه بالعكس أحس يجيبون لي الهم واغتلق في المكان ويمر شريط احداثي المؤلمة قدام عيني وكأنه أمس

أمي لما تسولف عنه ترى صرت ما اسميه باسمه صرت اسميه الماضي كنت ما ارضى تقول شيء عنه وحتى ما أحب افتح لأحد سيره عن ماضيي بس لما اختلي مع نفسي يبدأ الشعور اللي ماينقال ولا ينوصف حتى لدرجة صرت مثل المجنونه في الغرفة اقعد اهاوشه كأنه قدامي وأقول اللي ماكنت اقدر أقول ذاك الوقت

ترى على فكره حنا في نعمه ولله الحمد لان لازلنا بصحتنا وعافيتنا وبين اهلنا .. وتدرين في مثل ايطالي احبه (لاتنتظر الماء ليغلي فإنه لن يغلي) الزواج سبحان الله رزق ونصيب لو ادور عليه مالقيته بس اغفلي بس راح يدرعم عليك فجأه .. وفي شيء ودي اقوله ترى البنت المنفصلة من ملكة دايم العيون عليها صدقيني وماينسونها لان كان في حدث في حياتها الناس مانسته اذا الناس مانسته تبين الرحمن الرحيم ..الكريم الذي يعطي حتى يرضينا ..الجبار الذي يجبر القلوب المنكسره ينساك وهو منزه عن ذلك
أنا فرحت يوم شفتك كملتي دراستك لان مافي احد يستاهل توقفين طموحك عشانه
ومن ناحية شعور الامومة اللي تمرين فيه حالة طبيعية لان اللي تكلمك الحين بعد رايحه فيها
على العموم شكرا على الموضوع اللي جمعنا وأنا متأكده انك مافتحتيه الا لانك تبينا نجتمع من جديد.. وان شاء الله نجتمع على الخير والفرح..
ختاما دعواتي للجميع وبالاخص صاحبة الموضوع وميسم والخالدية وغرور بالعوض المبارك ويبدل احزانكم بافراح لاتنقطع ويسعدكم في الدارين
وسامحيني على اللي قلته في البداية ترى امزح