لا نورة ..

ماني ماخذة إجازة ..
بس أداوم ببعض الأيام في الأسبوع حالياً .،

و طلبت ( صيفي ) لإنه شهرين فقط ، و الترم الجاي طلبت ( تفرّغ ) ،، و أجلت موضوع الدكتوراة شوي ..
لحد ما أأثث البيت شوي و انقل و استقر إن شاء الله ..

و أفكر أقدم على طلب إجازة طويلة ، بعد إجازة الأمومة ..

.
.

و مهتمة جداً بغرفة الولدين ، أكثر من أي شيييييييئ تاني بالبيت الجديد ..
و راح أخلي لهم ( مكتبة صغيرة ) و كمبيوتر صغير ، و طاولة صغيرة و 3 كراسي و سريرين ..
و لوحة تتعلق .. و كل شي نفسي فيه .. بإذن الله ..

.
.


ماني مضغوطة و الحمد لله ، مجرد تعب قومة الصبح عشان ( الحمل و الوحام ) ..
أحس إني مشغولة فكرياً ، أكثر ما إني مشغولة جسدياً ..

.
.

من الفجر للظهر /

- لو عندي عمل ، أخرج و أولادي يصحوا عالساعة 11 .. ارجع غالباً الساعة 1 ..

- لو ما عندي دوام ، أنام لحد ما يصحى ولدي .. و يروح يكنس البيت و يمسح السيراميك مع الشغالة
بعدين تجلس معاه قدام التلفزيون على طيور الجنة ..
و الكبير يصحى و يتطمن على ألعابه قبل كل شي ، و يبدأ يتعاند مع أخوه ..

الصغير ياخد ألعاب الكبير ، و الكبير يسحب منه الألعاب و يبدأ صوتهم و صوت الشغالة ..
هي : يا ولد اسمع الكلام ، و هو : أنا أقول لماما ، و هي : أنا أقول لأمك .. إلخ و هذاك يبكي بكا دلع ..

أقوم و أتأكد إنه أولادي شبعانيين .. أو أفطرهم ( لإنهم ما يشتهوا يفطروا أول ما يصحوا )
مجرد ما أقوم ، يتوقف الإزعاج .. أمسك الكبير و أسأله ( إيش فيه ؟ ) و احل الأمور ما بينهم بهداوة ..

و مرات أقوم معصبة من ولدي الكبير ، لإنه يأذي الشغالة و يعاندها يومياً ..
و أقول له بعدددد عنها .. و يروح يزعل و يقول ما أحبك ،. و صاير مرررررة مزعج ولدي الكبير ..
حتى الشغالة تشتكي لي منه ..


.
.

من الظهر للعصر /
لو راجعة من العمل ، أجيب معايا أكل .. و أغديهم و مرات يكونوا توهم فطروا و شبعانين ..
أتغدى أنا و زوجي و بعد العصر ، أأكل الصغير و اتطمن إنه شبعان .. و لو ما عجبه ، اخترع له أي شي ..

و لو ما عندي دوام ، أأكلهم فواكه أو بسكوتات أو اسخن لهم أكل أمس أو أي شي
لحد ما أجهز غدا على مهلي .. و الوجبة الأساسية لزوجي ( هي العشا ) ،.
و لو مالي مزاج ( نجيب من برة ) ، بس مع الحمل أكررره أكل السوق ، فلازم أطبخ أي شي ..

و ماكنت متعودة أطبخ يوميا ، و فترة الحمل كنت متعودة على أكل أمي الله يرحمها ..
فالموضوع هذا مأزمني شوي ، لإنه أولادي ما ياكلوا أي شي .. و أنا الفترة هذه أكره الرز و أكره الدجاج ..

صرت أمشيهم بأي شي مرات ، بس اهتم الفترة هذه بالنونو ..
لإنه أصلا ، على الأشهر الأخيرة راح أعاني من فقر الدم و لازم إبر حديد ووو إلخ


.
.

من العصر لبعد العشا /
الكبير أتطمن إنه راح للتمهيدي و ركب الباص و أنام لي ساعة ، و الصغير ينام لحد المغرب ..
اخذ لي فترة راحة و هدوووووء من كل شي ،.


بعد العشا /
أجلس أدرس انجليزي لإني مسجلة بدورة ( انجليزي متقدمّ ) و بتنتهي مدتها بعد أسبوعين
( و ما راح أجدد معاهم عشان أولادي و الحمل ) .. أحس إنه كانت فقط تنقصني ( الثقة بقدراتي )

الوقت هذا ، أحس ولدي يجي يلصق فيا و يبدأ الزن و التنكيد .. يبغاني أشيله ، يبغاني اتفضى له ..
و الكبير إذا كلمني ، أقول له .. روح اجلس هناك .. أو بعد شوية كلمني ، بعدين ، دحين ..
روح ، تعال ، جيب ، سوي ، شيل ... إلخ

وقتها الصغير يكون لاصق فيا و يبدأ ينكد و ما أعرف إيش يبغى ؟ بس يبغاني أشيله و ألف به البيت ..
و أي شي أعطيه ، يكبه عالأرض و يعصبني ، و كل شي يقربعه .. و يوسخ ملابسي و ملابسه ..
و يكون راسي صددددددع من صوت ( طيور الجنة ) و منه .. و مسكين الكبير ، أحس هو اللي ينظلم ..

أتأكد من إنه العشا جاهز ، أحمم الصغير ، أتأكد إنه الشغالة أكلت اليوم ..
الملابس أنا أغسلها ، مو الشغالة ..

الشغالة تكون فاضية وقتها و مخلصة شغلها ، و تجلس معاهم في غرفة التلفزيون و تلعبهم مع بعض
و أنا أخلص أشغالي المتعلقة بالعمل ، أو أكل أي شي .. أو اشرب قهوة ، و اتفضى لنفسي شوي
الوقت هذا


.
.

يرجع زوجي من برة ، و يبدأ يكمل ( تهزيئ في الكبير ) ، و ( يدلل الصغير ) ..
نام ، اسكت ، غمض عينك ،.. إلخ

حتى لو نخرجهم شوي بالسيارة ..

يحط الصغير في عبّه ، و يخاصم الكبير ( اسكت / قفل فمك / اجلس ورا و اسكت / لا تتحرك /
لا تخرج من السيارة / قفل الباب / افتح الباب ) و لاااااااااااااااااااااااااااااااازم يخلي الولد يبكي ..
و أحسه يدور على أي سبب ، عشان يضرب ولده .. و صرت أنا اللي أقول للكبير ( اسكت )

لو كنا جالسين ، و خرج زوجي من السيارة .. و ولدي خرج من السيارة .. يضربه و ليش خرجت ؟
و لو ما خرج ولدي من السيارة .. يضربه ، و ليش خرجت ؟

أبدأ أعصب من زوجي و تعامله مع ولده .. و اسكتتتتتتت و ما أتدخل ..
بس صار سكوتي يخليه يزيد أكثرررررررررررررررر .. فبدأت أرجع و أكلمه ..


.
.

و إذا رحنا بيت أهله ، بيخربوا تربية الأولاد ..

مثلا أبوهم جالس و داير ظهره ،، زوجي و أخوه يكلموا الأم و يعملوا اشارات من ورا ظهر أبوهم و يضحكوا ..
لإنه أبوهم كبير في العمر ، و سمعه ثقيل .. و قدام ولدي الشي هذا ..

قلت لزوجي بصوت خفيف ، بكرة ولدك يعمل كذا معايا من ورا ظهرك لما تكبر ..
( أبغاه يكون قدوة لولده ، مو يعلمه أشياء غلط ؟ )


.
.

كيف يربي ولده إنه يحترمه و هو ما يحترم أبوه من خلف ظهره ؟


.
.

المهم ..
وظيفتي أنا تجاه أولادي .. أهم عندي من كل شي ..

و ما عاد يهمني أي شي بعد كذا ..


.
.

و بما إنه الجزء الأكبر من الحمل ، أنشال عن ظهري و لله الحمد ..
و هو شراء منزل لهم ، فبإذن الله .. راح أتفرغ لهم نهائي قدر المستطاع ..


.
.

بس بجد ، مقصرة معهم ..
ما كنت كذا مع ولدي الكبير ( حسيت الكبير أخذ حقه كاااااامل و ما عمره انضرب غير و عمره 4 سنوات )

و جزء من اللخبطة حالياً ، أنه البيت حالياً ما أحسه مهيأ للأولاد ..
و ما يساعد على توفير الجو المناسب لهم ..