عندي مشكله تؤرقني

ومتعبه نفسيتي جدا جدا جدا

هي الخوف على اطفالي !

قبل شوي كنت اتصفح وقريت القصه القديمه اللي العامله وانتوا بكرامه تخلي اللحم يتعفن
وتاخذ منه الدود وتحطه بأنف الصغيره


وتذكرت القصص اللي على نفس الشاكله

وجلست ابكي وافكر واتخيل واخاف !!


قبل شهر ونص تقريبا كان زوجي مسافر
وكان قبل يرجع بيومين قرر يجي قبل الموعد وخبرني فجأه وكنت عند اهلي
وكنت انا والاطفال مرضى انفلونزا واشياء ثانيه وولدي الصغير التهاب الحلق مو راضي يخف
وحرارته ماتنزل عن 39 -38
مع اني كل 4 ساعات خافض حراره

وامي كانت مسافره وفترة اختبارات وكل مشغول بنفسه فمافيه شخص يشيل عني ادنى
حمل

كنت مريضه ويادوب بالعلاج اشيل نفسي واطفالي
يوم خبرني زوجي انه راجع رجعت الشقه ولقيت الغبار مغطيها ولاني مريضه وانا اساسا
مقدر ع الغبار لان عندي ضيق تنفس شديد

جلست ابحث عن عامله للآجار وبيتي كان نظييف تماما

مالقيت الا حرمه تأجر عامله وكنت اكلم امي فالواتساب واني خايفه لكن مضطره
قالت لي فوضي امرك لله واطمئني

وجبتها ومن يوم ماجبتها وهي مو عاجبها وانا اصلا رحت اخذتها مع اخو زوجي وهو قال لي
ان صاحبتها دفعتها للسياره بس انا مانتبهت ع كلامه


انا كنت خايفه منها وجالسه في غرفتي
وبنتي تحب العاملات وتحب تسولف معهم وكنت امنعها لان واضح ان العامله مالها خلق شي
قلت لها تعالي لاتتحرشي فيها

وكانت تعاند قمت اتصلت ببنت اخت زوجي وقلت تعالوا خذوها لاني خايفه عليها من العامله
واخذوها جلست شوي وتغافلتهم ورجعت فوق وانا كنت مسكره علي باب غرفتي والصغير
معي ارضعه وحرارته مره مرتفعه

اثاريها راحت لها المطبخ وولادريت الا بنت اخت زوجي تصرخ وجايبتها لي شعرها من قدام محروق
ومطفيته العامله الله لايسامحها


للأمانه انا كنت اسمع العامله تقول لا لا بس كنت اقول يمكن من المرض يتهيأ لي لان مافيه احد
تكلمه

سألت بنتي قالت هي قالي لي كذا واشرت بيدها خمس مرات وانها اجبرتها وحسيت عليها مو مهتمه
وقلت لها كيف تسمعين لها وتحرقين نفسك لو محترقه كلك وميته

وللحين مو لاقيه تفسير

سألت العامله وانكرت وقالت هي اصلا حرقت نفسها بالولاعه وانا طفيتها

لكن السؤال الاول من وين لبنتي الولاعه ! ولو كانت هي اللي اخذتها فعلا ليش ماخذتها منها
وليش ماعلمتني !


الثاني ! ليش يوم طفتها ماعلمتني !وليش بنتي تسوي كذا !! وتحرق شعرها من الجهتين ؟

للعلم بنتي ماتكذب ! ويبان عليها لو كذبت

وحسيت انها سوت الشي من خوف

طبعا راح تقولوا ليش مارجعتها لان ماكان قدامي احد يرجعها من البدايه !
واتصلت ع صاحبتها وقالت لي مافيه احد عندها ياخذها ؟


ف اضطريت انتظر نص ساعه لين جا اخو زوجي ورجعناها

مابي اتكلم اكثر ف تفاصيل الكلام اللي دار بيني وبين صاحبتها


لكن انا تعبانه من تصرف بنتي وخايفه عليها من الناس ومن نفسها ! ابي اخليها اقوى
وترفض الخطر وتدافع عن حالها


يعني لاسمح الله لو البنت محترقه بالكامل


دائما افكر واتخيل الاشياء تصير ف اطفالي
واخاف واخاف وابكي وانا اخاف

وتتعب نفسيتي ولا انام من مجرد تفكير بس



كأنه الشي صاير صدق

مدري لو يصير صدق والله خايفه افقد عقلي وحياتي

خايفه الله يبتليني على جزعي !
ونقصان ثقتي فيه

لاني اقول شي واسوي عكسه
اعرف ان الله الحافظ واخاف

اعتمد عليه وافوض له امري في باقي الامور وهالشي
لا

كانه مو قادر على حمايتهم والله يعلم اني ماقصد هالشي

استمرار خوفي خطا في حق الله وحق نفسي

لكن خارج عن ارادتي الاحساس بالخوف

الخوف كرة جليد كلما تتدحرج تكبر


ودي اخذهم وادخلهم في بطني : |

اخاف عليهم من هالعالم اللي كله وحشيه ومخاطر

من سنوات وانا افكر كيف راح تروح بنتي للروضه وترجع
والحمدلله المواصلات امنه

وافكر كيف تطلع للبقاله وكثير اشياء اتخيلها وتدور في راسي

اعوذ بالله من همزات الشياطين


يارب تحفظ لي اطفالي وتلهمني الهدوء والسكينه يارب

__________________
..