سيدة ..

كنت مثلك في البداية ، و كنت راح أستمر مثلك ..
لحد ما توقفت مع نفسي .. و الغربة ساعدتني كثير ..

.
.

تعرفي لو صارت لي مواقف مثل اللي صارت لك ، إيش بأعمل ؟؟؟

بأعطيك مثال الغسالة .. ( لإنه صار لي موقف مثلك ) ..
تركني شهرين من غير غسالة ( بعد ما رجعنا من الغربة و أستأجرنا شقة )
و يمكن أكثر تركني كذا ..

كنت أغسل الملابس عند أمي ، بعدين استحيت منها ..
لإنه أمي حتى و هي مريضة ، تغسل الملابس بنفسها ..
و ملابسنا تزود عليها الشغل .. و توقفت ..

الملابس كلها تراكمت ، و ما بقيت و لا قطعة ..
في الأخير .. صرت أخد المنشفة الكبيرة و البسها و ألفها علي ..

خليييييه يشوف بعينه .. و يشوف النتيجة عشان يتحرك ..
ليش أغسل بيديني و أتعب حالي و أحسسه إنه كل شي ( تمام ؟ )

و دحين ، لما يخلص الآريال و صابون الغسيل ..
أقول له من قبل لا يخلص .. و ما يجيب لي غيييييير بعد ( أسبوعين أو ثلاثة أسابيع ) ..
عااااااااااااااااااااااااااااااادي .. إذا هو بارد ، أنا بأكون أبرد منه ..

صرت أغسل الملابس كلها ، و ملابسه تتركن و ثيابه كمان ..
بالغالب ، يلاقي ملابسه مغسلة و مكوية و كل شي عال العال ..

.
.

بس المرة الأخيرة .. جالس يدور على ثوب أبيض نظيف ..
و ما لقي ، و يدور على سروال سنة ، برضو ما لقي ..

شاف بنفسه ( الغسيل متراكم ) ..
و أنا أبررررررررررررررررد ما عندي ، قلت له ( قلتلك من زمان ، خلص الآريال )
قال لي ( لمي ملابسي و أوديها المغسلة )

عاد تشتغل هنا ( كيد النساء )
لا يا حبيبي ،، جيب الآريال دحين و أغسله لك بنفسي ..

و أبدأ بالدلع و الكلام الحلو ..
بس خليييييه أهم شي ، إنه يشوف بعينه كيف لما أطلب منه صابون غسيل الملابس ..
كيف الطلب هذا مهم ..

.
.

لا أعجبك كمان ..

راح جاب لي آريال للملابس البيضا ، الي تكفي غسلة أو غسلتين ..
و قال الكبير بعدين أجيبه ( طبعا على حسابي ، عشان لا أحد يقول يمكن ما معاه ) ؟

أخدت الصابون و غسلت الملابس البيضا .. و ثيابه ..
بس سراويله ( ركنتها ) .. لما سألني ، قلت له ( خلص الصابون و إنت قلت بتجيب لي الحجم الكبير في الليل )

قال لي ( خلاص هاتيهم و أدويهم المغسلة )
قلت له ( كيف طيب تغسلهم ؟ ، مو قلت ما معاك فلوس ؟ )
قال لي ( عادي بالدين و أسدده بعدين )
قلت له ( لا ما يصيررر .. دحين أغسله لك بنفسي .. إنت بس جيب الصابون و ما يجي الصبح إلا و كلهم مغسلين و مكويين )

.
.

قررت ..

ما أكون ( سيدة المواقف ) ..

و الطريقة هذه ، مشيت معاه ،،
تخليه يبدأ يحس بالمسئولية ..

و جابت نتايج الصراحة ..
و صرت أنا اللي باردة ، و هو اللي ينحرق دمه ..

.
.

طبعا هذه الكورسات ، تعلمتها منه ..

كان يهمل كل شي ، و لما أعصب على تقصيره ..
ياخدني بالكلام الحلو ، و التبريرات ووو إلخ .. و ينضحك على مخي ..
و هو أبرررررد ما عنده ( كان )