تعبت نفسيتي من أهلي
السلام عليكم ورحمة الله وبركاته
حابة أعرضلكم مشكلتي لأني ماني لاقية أي حل, و يا رب ألاقي الحل عندكم
اتوكلت على الله ثم عليكم
أنا أمي الله يهديها ويصلحها مو عارفة ايش اللي يرضيها, و ايش اللي يخليها مبسوطة مني
كل شي اسويه لها بس هيا ما ترضى, دايما يا جماعة تحسسني إني مقصرة وإني أسوأ إنسانة في الدنيا
مع انه الكل يشهدلي بأسلوبي الراقي واخلاقي, لكن الإنسانة اللي محتاجة دعمها و تشجعيها للأسف تطل لي بنظرة دونية
يا جماعة حتى أبويا امي ما سيبته في حاله, مع انه ابويا رجل كبير و عنده السكر ما يستحمل الكلام الجارح, واحيانا وربي ما ابالغ تمد يدها عليه!! طبعا اوقفها عند حدها اخاف ابويا يسرله شي!! بس احس بالندم بعدها لكن ايش اسوي؟ ايش العمل؟ لو ما وقفتها عند حدها تزيد و تجلس -والله ما ابالغ- 5 ساعات واكتر, وهيا تزعق وتصرخ وتقول كلام ما ينقال استحي اقوله هنا..
انا كنت اول ارد!! -عشان اكون صريحة- كنت ارد و اقلها "خلاص" "اسكتي" -حاسة بالخجل- لكن مالقيت حل تاني!! لو سكت عنها, حاتزيد وتزيد لكن لو وقفتها عند حدها حاتسكت!
وتقذفني وتقول لابويا كلام مرة وسخ. انا عارفة انها امي وما ابغى اتكلم عنها بكلام مو كويس لكن هادا هوا الحاصل!
واحيانا لمن يجوا عند ابويا ضيوف, أصحابه وللا شي احيانا ترفع صوتها عليه وتهينه قدامهم, وربي انا وقتها اتمنى الارض تنشق وتبلعني. احيانا اكره انها امي, اقول يا ربي ليه امي كدا!! مرى انحرج منها!! وتحطني انا وابويا في مواقف جدا محرجة!!
حتى مع صحباتها ترفع صوتها عليهم وتهينهم, احاول انصحها لكن تزعق عليا وتقوللي "انتي مالك شغل"
واحيانا من غير لاشيء تجي وتزعق و تسب وتصرخ وتلعن سابع جدنا. و يكون ولا احد مكلمها ولا احد قايللها شي لكن كدا فجأة سبحان الله!!
وربي انا كنت ازعق عليها واخاصمها لكن بعدها اندم واجلس ابكي من الندم اقول يا ربي سامحني بس ايش في يدي؟! سرت اخاف لا ربي يبتليني ف اولادي.
وبعدها سرت اسكت مهما قالت, بس سارت نفسيتي زي الزفت وسرت مرى متألمة ومكتئبة وبس ابكي واتخيل اشياء ماهي كويسة "اني مثلا اضربها او اقتلها" واتعوذ بالله من الشيطان. (من القهر اللي فيا)
سرت في الأخير اقول حسبي الله ونعم الوكيل والله يخارجني من هادي الحياة على خير. سرت ادعي على نفسي بالموت فين المخرج؟ وربي مو عارفة! اهرب؟ فين اروح؟ اموت نفسي؟ وادخل النار بعدها؟ لأ مستحيل اسويها!!
مرات اكون تعبانة يا جماعة طريحة في الفراش ما اقدر اتحرك ولاشي, تقعد تعصب وتخاصمني!! وتقوللي انا ما اساعدها. طب تعبانة كيف اقوم كيف اتحرك؟ هادا بدال ما تكون جنبي وتديني الدوا تقعد تقوللي كلام يسم البدن!!
واحيانا تكون شايلة ف يدها السكين وتزعق عليا وتكون قريبة مني اقسم بالله اتشهد بيني وبين نفسي!! "ما استبعد انها تطعني"
و لمن يوم واحد ما اغسل النحاس (المواعين) تقعد تجحد كل المعروف والجميل اللي اسويه وتحسسني اني اسوأ انسانة.
والله اني احسن بكتير من بنات هادي اليومين اللي بس همها تخرج وتروح بارتي!!!, انا اتعلمت اطبخ واسوي اكلات, و اكنس وانظف واغسل!! عشان ارضيها بس هيا ولا على بالها, وفوق هادا كله تقارني ببنات الناس اللي حتى المنديل لو طاح ماتشيله!!!!!!
وتقوللي كلام وربي ما يسوى. وتحسسني انها تكرهني. ودايما تحسسني انها بتاخد بالها عليا عشان عمي لا يخاصمها.
دايما تقوللي (انتي امانة عند عمك لو سار فيكي شي عمك ما حيرحمني) اقلها (انا امانه عند ربي مو عند عمي. وازا تبغي تروحي روحي انا في غنا عنك!!!) عشان ابويا رجال كبير وتقريبا عمي هوا ابويا التاني ودايما بيوصيها علينا.
دايما تقوللي انها ما تبغاني لا انا ولا ابويا! وانا عارفة انو هادي هيا الحقيقة! طب مدام هيا تكرهني ليه ما تروح وتسافر وتفكنا من الهم والغم اللي كل يوم, وربي يا جماعة كل يوم صريخ انا كرهت عمري احس اني حافقد عقلي وامشي في الشارع زي المجنونة!!! انا لو كنت في سجن امكن ارحم من الجحيم دا اللي انا فيه!!
وابويا مو داري عن هوا داري مافي غير ألبي طلباته وخلاص. و هيا لمن تطول لسانها ابويا يسكت. يحسسني اني مالي ظهر. ولمن اعاملها بطيبة وحنان و اهديلها هدايا اندم مية مرة بعدها من التعامل اللي زي الزفت!!!
ليه دايما يوصونا على اهالينا وما يوصوا الأهالي علينا!!! وربي تراهم ما بيعاملونا مزبوط!!
هما اللي يبغالهم توصاية مو احنا!!
سرت اقول في نفسي عمري ما حاعامل اولادي بهادي الطريقة!! لاني انجرحت كتير وانهنت كتير من اعز الناس على قلبي!! عمري ما حخليهم يحسوا باللي انا حسيته من اهلي!!
اشوف امهات صحباتي و اغبطهم اقول ياريت امي زي كدا كان والله اشيلها من أرضها واحطها ف عيني لكن للأسف!!
غير الذل والإهانة والقذف.. حتى احيانا اتمنى يكون نظامنا زي في امريكا "الاهالي لو اساؤوا لأولادهم يحق للأولاد انهم يشتكوا عليهم في الشرطة!!
وربي ترى حقوقنا ضايعة مع الاهالي!!! خافوا الله فينا خافو الله فيينا!!!
الناس الغرباء يمدحوني و يحترموني و يقدروني لكن كنت اتمنى الشي دا يجي من اهلي!
مهما اسوي اطلع مقصرة ما يحسسوني بقيمتي وقدري!! دايما ينتقدوني دايما يتكلموا عليا ويشتكوا عليا عمرهم ما قالوا شي حلو في حقي!!
لكن الله عالم وانا التعامل دا بأعاملهم هوا لأجل الله, لكن انا ليا طاقة محدودة وربي ما اقدر
فكرت في الانتحار كتير الله يسامحني ويعفوا عني لكن وربي ما باليد حيلة!!! اتمنى الله يغير حالي للأحسن..
آسفة على الإطالة لكن بجد ضايقة فيا الوسيعة... واتمنى الاقي ردود شافية تثلج الصدر.. شكرا
التعديل الأخير تم بواسطة Noor Ehsan ; 23-03-2013 الساعة 01:04 PM