رد : مراهقة المسنات المتزوجات .. ؟؟
لا اتوقع انه تصابي بقدر ماهو تجديد في شكل الزوجة ويمكن احيان يكون التجديدهذا بطلب من زوجها اوتلميح منه لها بتغير شكلها او رغبته إنه تغير قصة شعرها او لونه والمرأه هنا عليها طاعة زوجها مادام إنه شئ حلال حتى لو قال لها حطي شباصات وبكلات بنات صغار هذا من حقه وهل الزوجة ام اربعين والخمسين لو تصابت وغيرت في شكلها هل عليها إثم في ذلك او حرج نورونا اللي عنده فتوى موثقه في هالموضوع يعني لو مثلا زوجة عمرها ببداية الخمسين وطلب منها تغير شكلها وقصتها ولون شعرها وتلبس له لبس معين وهي رفضت طلبه وقالت له تراك كبرت وخرفت والحركات ذي مو بلايقة لي ومو مناسبة لسني وش تتوقعون يسوي هالمخرف اكيد بيروح يجيب له اللي تسوي له كل طلباته وتنفذ له رغباته وحينها وش استفادت زوجته من رفضها
ماعاد عرفنا لبعض الرجال من فين نجي لهم إن تكشخنا وغيرنا قالوا عنها تصابت وإن ماغيرنا وجددنا قالوا مهمله وغير مهتمه بشكلها وماتحب التجديد والتغييروراح طق له بنت العشرين وهي تجلس بحرتها وقهرها لا وأزيدكم من الشعر بيت لو تزوج بنت العشرين يروح يصبغ ويتكشخ ويلبس بجامات وشورتات وحركات ويجدد في شكله يرجع عشرين سنة لورى خايف يطلع مع الثانية ويشوفونه الناس يحسبونها بنته مو زوجته وكثير صار لهم هالشئ من حولنا ونعرفهم عز المعرفة
وقصة واقعية تحكيها لي صاحبتها بنفسها تقول لي زوجي إذا طلبت منه يوديني لسوق ابشتري اغراض خاصة لي هي عمرها بأواخر الأربعينات وزوجها في اواخر الخمسينات ومتزوج ثانية عمرها بالعشرينات تقول لي انا يوديني للأسواق الشعبية اللي فيها كل شئ قديم ومقلد وماتنفع وزوجته الثانية يوديها للمولات واسواق الماركات ولو طلبت منه هي إنه يوديها للأسواق اللي تروح لها الثانية تدرون وش يقول لها يقول لها انتي ماتصلح لك هالأسواق ومو مناسبة لك ولا تعرفين فيها شئ انتي كبيرة بالسن وجاهلة بالأشياء اللي يشترونها البنات من هالأسواق لوقالت له وفلانه زوجتك الثانية ليش توديها لها يقول لها تقارنين نفسك فيها هاذيك متعلمه ومثقفه وفاهمه ومتعودة على الماركات والأشياء الغالية لاكن أنتي وش عرفك في مثل هالأمور
الصراحة لما قالت لي كذا انا انذهلت من كلامها وحسيت انه تحطيم لها الله يكون في عونها ويصبرها والله شئ صعب لما انت تبغى تلبس وتكشخ وتغير وتلاقي اللي يحطمك واصلا مو شايفك شئ عنده بالرغم من إن اللي يشوف المرأه هذه يعطيها عمرها بالثلاثينات شكلها مايوحي إنها كبيرة بالسن لاكن زوجها جننوه اللي بالمسلسلات بأشكالهم ما عاد صار يشوفها شئ عنده وهو اول ماخطب الزوجة الثانية اول ما ابتدى باللحية حلقها زيرو وصبغ شعر راسه وركب له اسنان بدل المخلعه وشكله صار مضحكة من جد بين جماعته كل من حصله يسأله عن لحيته وين طارت وزوجي حلف لي يقول اول ماشفته والله ماعرفته إلا من صوته وهو يرد السلام عليه
اما بالنسبة للي تطلب الطلاق علشان تبغى تتزوج بصغير السن هاذي إن شاء الله إنها حالات نادره ومو موجودة بكثرة في المجتمعات
واعتذر عن إطالتي عليكم
وبارك الله فيك اخينا الفاضل عمران وجزاك الله خير
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله