أول حاجة احب أوجه لك احترامي وتقديري لطيب خلقك .. ولرغبتك بإصلاح الحال ... وأنا متأكدة أن نص رغبتك هذي من باب شعورك بالأمانه اللي تركها لك عمك ..
أقول هذا لأن يمكن جدالي معك يبان منه وكأني أظلمك وكأني مو حاسه بتعبك وشعورك . فحبيت أأكد أني حاسه فيك تماما لكن دايما يكون الحمل الكبير على جمل المحامل مو أي واحد
ربي يسعدك ويوفقك بمسعاك
اقتباس:
المشاركة الأصلية كتبت بواسطة أبو خليفه....
عرفت تمشي أمورها معاك وأخذت كل حقوقها لكن ضميرك لسه يأنبك وكل شوي واحد أو واحده جاي يقول لك مسكينة لأنك ما تحس تجاهها بنفس الحب اللي تحسه للجين .. وهذا يخليك تحن عليها اكثر وتعتبرها ضحية فتلين لها أكثر وتقسي على لجين أكثر لأنك فاهم انها سبب مشاكلك
أنا ما قلت اعتبر زوجتي الثانيه مظلومه من بداية رمستي قلت انها ذكيه وعرفت تمشي أمورها ,,, ما أنكر على أنها قايمه بواجباتها كزوجه ولا مقصره مع ذلك نالت مني ربع اللي تاخذه لجين بعطيج كذا مثال:
أعرف انت ما قلت هذا لكني أحسه بين حروفك .. متأكد أنك ما تحس بتنأيب الضمير بسبب شعورك للجين ؟
هي تعتبر عروس وبعدها ما كملت سنتها ما سافرت شهر العسل من أخذتها لليوم سافرت للعمره لا تتجاوز 48 ساعه ورديتها ,, وأم غلا سفرتها أسبوع تمشيه ومع ذلك ما ذكرت لي هذا الشيء...
المطلوب يا بو خليفه هو سفر لجين أو جلوسها برغبتها .. مو سفره غصب عنها
زوجتي الثانيه لما تزوجتها سكنتها بفله لكنها تعتبر من منظورنا شقه وما اعترضت بالبدايه ,, والان بعد مشاكل واعتراض من صوبها سكنتها بفلة ضيوف اللي عدال بيت لجين ,,, وام غلا من اخذتها بفله 3 طوابق مب قاصر عليها شيء فيها ,, إذا قتلج لجين من أخذتها للان حدود 5 غرف نوم ومب مالي عينها
صحيح لكن للحين مافي غرفة نوم لغلا ببيتكم ...صح ؟
زوجتي الثانيه تسافر بروحها وتطلع ويا ربيعاتها وأهلها بروحها ما أنكر لاني واثق أنها قويه وعندها القدره على الدفاع عن نفسها ولكن لجين مررت وياها بكذا موقف تدرين شنو ردت فعلها تصمت أو دموعها غير جي لا
هذي معك حق فيها ... مع أني أثق بأن لجين تقدر تميز العيب من اللي لأ ...صحيح يمكن ما تقدر تصرف نفسها لو جاها شحاد مثلا ..بتحن عليه وتصدقه على طول .. لكن ومن خبرتي فيها اقدر أقولك تقدر تحطها بين الرجال وأنت مأمن .. ما تقدر تأمن منهم هم ..لكن هي مالها مشاعر ولا فكر ولا أي مكان بقلبها لرجل تفكر فيه كأنثى .
ما رجف قلبها لغيرك خالد
أي مسؤولية ؟؟ حدد لي طلباتك منها بالضبط حتى نقدر نتفاهم ..
كنت فاهمه أن مشكلتك بحقك الشرعي واللي فهمته أنه هذي المشكله انحلت .
أنتي تدرين شلون أخذ حقي منها واسالج بالله لو كان ولدج وياخذ حقه الشرعي بهذه الطريقه بترضين له
ابصم لج من العشره من ثاني يوم بتردينها بيت أهلها وانا صبرت عليها وتحملتها ومب ناكر وانا أشهد هي الفتره الاخيره تغيرت لكن شلون وبشنو تغيرت أنتي تدرين
جينا لمربط الفرس وعقدة العقد ... أنت تاخذ حقك لكن تبيه منها بشعور الزوجة المحبة ... وهذا ما تقدر تغصبها عليه مهما سويت ...
ادري اشلون تغيرت .. مدري .. أنت متندم على أسلوبك معها ذيك الأيام ؟؟ تحس نفسك أخطيت وصعب تكون معها بهالطريقة طول الوقت ؟؟؟
طبعا اكيد بيكون في وقت لما تشوفها غلطت لازم تقرص أذنها وتفهمها غلطتها وقتها تقدر تمنعها من حاجة على حجم غلطتها وبشكل مؤقت عشان تفهم انه عقاب لغلطتها بالذات مو أنك لقيت لك حجة عشان تمشي حياتكم بكيفك وأسلوبك اللي يريحك .
اي كبار تتكلمين عنهم مطلوب منها تستوعبهم هي تتعامل على اساس من يتعاطف وياها ويحن عليها بتمشي وياه غير جي ابد بذكر لج مثال توه صار وهو اللي فجرني صوبها
كنا مجتمع انا وهي والوالده وأختي العوده دار من بينا نقاش ,,, سالتها أختي بكل ذوق أنتي ليه ما تنزلين تحت عند اهلي وأغلب وقتج فوق بدورج على الاقل نزلي بنتنا ويا المربيه وأنتي براحتج (( ما اعتقد برمسة اختي شيء خطا ))
كلمة بنتنا تعطي ايحاء انها مو بنتك يا لجين . ومدري كيف كانت طريقة الكلام
ما حصلت وحده غير ترد عليها وتقول ما يخصج فيني وانا بكيفي وأنتي فتانه وحطت ريل على ريل ولا كانها غلطت
انتي فتانه !!!!!!! ليش قالت هذي الكلمة ؟؟؟ أكيد في تراكم من قبل ومثل ما قلت لك لجين تكتم وتكتم لين ما يظل فيها صبر .. وصايره توصل للحظات الانفجار هذي بسرعة عن أول .. هذا معناه أنه أعصابها تعبانه .. اتوقع من الممنوعات  اسفه قلت الكلمة المو حلوه لكن يا خالد أنت مجرب .. الواحد لما يكون مو مرتاح تصير أعصابه على الحافه تبيلها دزة وتطيح
الوالده طلبت منها تعتذر وكانت ترمس وياها بادب وهي متجاهله ,,, قمت أنا لاني حسيت الجو بدا يتوتر من بينهم ,, وطلبت منها تطلع ...
قالت مب طالعه خلها هي تطلع ,,,
قاعدة تحاول تكون قوية .. هي تظل تسأل كيف اكون قوية وما عرفت للحين أن قوتها كانت بسكوتها وصبرها
على أي حال ... هي تحاول تدافع عن نفسها .. ملاحظ هذا من يوم صحت على نفسها بعد وفاة أبوها ؟؟؟؟ حست ان اللي كان يحميها راح .. تذكر لما كنتم تتهاوشون وهو مسافر كانت تظل تصبر وتسكت وتقول لك بكره أبوي يرجع ..تنتظره يرجع ينصرها
الحين بغض النظر هي صح وللا لأ ..لكنها تحس نفسها مظلومة وتحتاج من يتعاطف معها
في أقل من ثانيه تحول الموضوع بيني وبينها
تهاوشت وياها وبدات تصارخ الوالده قامت هي وقالت للوالده انتي ما ربيتي أحد من عيالج عشان تقولين عني مب متربيه
وانت سبق وقلت لها هذي الكلمة .. وكلمة انتي للمزاج جدا جارحه لها .. وانت كثير تكرر هالكلمة
وطلعت من الصاله رحت لحقتها وسالتها انتي شنو الرمسه هذه وشنو هالاسلوب وكم مره مفهمج اذا ما ترومين تتحملين رمسة الوالده ابعدي من جدامها لكن صوتج ما يرتفع عليها ,,, قالت ردني بيتي
قلت لها مب رادج وبتمين هني ,,,, أنت ما عندك شخصيه وتخاف من أهلك
قلت لها وانتي وعلى ذمتي لانج للمزاج فقط ولا أنا ما بيج
حزتها حذفت صاروخ
(( وانا بعد ما أبيك وعندي غيرك ))
هي ما كملت جملتها الا وانا طراق
والباقي وردة فعلها تدرين في طبعها لغلطت وما استطاعت تواجه أحد شنو تسوي
قصدك لما ما تقدر تدافع عن نفسها وتحس انه مالها حيله ... تدري انها تكلم غلا تقول لها مقدر أدافع عنك ولا اقدر اسويلك حاجة لأني ما قدرت ادافع عن نفسي
لا حول ولا قوة الا بالله .. قسم بالله قلبي وجعني
لجين بغت الحياه على هواها مثل ما كانت ويا أبوها الله يرحمه |
مدري وين قريت بأحد ردودك انها بدأت ترتاح لوالدك من بعد تعب كبير من جهته .. ارتاحت له لأنه متعاطف معها ... وما يكفي يتعاطف يوم ويومين ..
سبقو وقلت لك لو تحب أن والدتك تاخذ دوري أو أنت أو أي أحد ثاني يحتاج وقت طويل وهو يداريها .. البنت تحتاج دعم وتعاطف ... هيك شخصيتها .. تعودت على الاحتواء والعطف ..
صحيح انها قاعدة هذي الصفات تخف فيها بسبب اللي مرت فيه وبسبب انها قاعدة تكبر .. وأكيد مع الوقت بتروح منها بشكل كبير لكن تحتاج وقت
وانت الله يهديك ما فيك صبر ... مثلها 
والدك ماشي صح .. وبيصير لها بمكان والدها ..لأن لازم بالأول يظهر تعاطفه لها ويكون لها سند حتى لو هذا ظهر وكأنه ضدك أو ضد والدتك الله يحفظها لأنه يعرف أنه بعد فترة ولما يكسب ثقتها وقتها يقدر ينصحها وتسمع لنصحه لأنها تثق فيه
لكن كانت أمنيتي تكون أنت مكان عمك مو والدك ..
اجلس مع والدك وتناقش معاه بشخصيتها .. واضح أنه فاهمها .. وتعلم منه كيف تعاملها صح .. هو من العيله ويعرف عوايدكم ويعرف خواتك ووالدتك . ويظل قلبه عليها غير لأنه عمها ولأنه يحس بانها امانه عنده .
لكن أكيد ولأنه رجل ما راح يكون تعاطفه معها مثلي مثلا .. لا تفكر أنه وبسبب تعاطفه معها ممكن يظلمك أو يطلب منك شي مو منطقي .
أنت ولده وأكيد يحبك عنها لكنه يعالج الموضوع بطريقة عقلانيه مو بعاطفة الأم الحنون .
لما أعطاها طابقكم طلب منها هي ترتبه .. لما جهز غرفة غلا أخذها معاه تختارها .. لما طلبت منه مرسم بالطابق جهزه لها . ومع أنها أشياء أبسط من 5 غرف نوم ومن سفرة أسبوع لكنها قدرتهم وحستهم شي كبير لأنهم رغبتها وحاجتها .
تقول انك منعتها الرسم لأنك لما تدخل تحصلها ترسم وما تعطيك اهتمام .. برأيك لو عندها عاطفة غير مدفونه تحت ركام الممنوع والشدة ما كانت بتترك كل شي بيدها وتستقبلك ؟؟
الأمور هذي يا بو خليفه ما تقدر تجبر أحد عليها ..الأمور هذي أنت تربيها بقلبها تربية .. أقول تربيها مو تخلقها لأن حبك موجود بقلبها وتحن لك وتشتاق لك لكنك تهدم كل هذا بكل مرة يصير بينكم العنف هذا .. احترامك لها على المدى الطويل ولما تتأكد أنك فعلا تحترمها وانها تقدر تثق فيك يخليها تعطيك عمرها كله مو بس قلبها .
اذا هي غلطت إفهم منها واقرأ بين حروفها عشان تفهمها صح وتعرف السبب الحقيقي اللي مخليها انفجرت مو ترد عليها بإساءة أكبر وتجرحها وتجرحك ...
هي لما تقول أنا الأحلى وما تقدر تستغني عني مو لأنها شايفه روحها انما ترد على كلامك بدون وعي منها بانها للمزاج .. صراع بداخلها يسأل هو يحبني وللا فعلا للمزاج .. خليتها تكره المزاج يا رجل
شنو اسمك الرجل والأكبر والأعقل واللي شبع حنان وعاطفة من بيت ما شاء الله عليه ينضرب فيه المثل بالتوافق العائلي اذا بترد عليها بأسلوبها .
تذكر لما كنت تكون زعلان منها أقول لك على موقف انت ما دريت فيه وأشرح لك السبب تعذرها وتحن عليها ... هي ما تقول كل شي وما تشتكي فما تعرف منها ليش سوت جذي .. بس تشوفها انفجرت وصارت تحذف يمين شمال . وتستغرب ليش على شي بسيط ما يستاهل سوت كل هذا .
خلك حنون واسمع لها وتعاطف معها بساعة الساعة .. وبعدين ارجع كلمها وفهمها غلطها بهدوء بتلاقيها طوع يدك .. لما تحمى الأمور بينهم خلك برع الموضوع وخل الكلام لوالدك أحسن .
أذن عندنا المغرب ..بروح أصلي وبعدها اسوي ارسال للرد عساه يكون رد موفق
ربي يوفقكم ويجمع بين قلوبكم ويعيذكم من ابليس واعوانه .