بسم الله الرحمن الرحيم ..
السلام عليكم ورحمة الله وبركاتهـ ..
..
اممم ..
ما اعرف من فين ابدأ بالزبط ..
ممكن تكون مشكله بالنسبه للجميع تافهه ..
لكن تشغل حيز لا بأس بهـ من تفكيري ..
انا عمري 20 وداخلهـ ع ــال21 اذا اراد الله ..
كول محور حياتي ..
اهلي + دراستي ..
ودحين اهلي نفسهم اني _ اتزوج _ سابقاً كانوا يرفضوا العرسان لأني في المدرسه ..
ودحين انا في الكليه واذا قولت دوبي عالزواج ودراستي ..
قالوا عادي كمليها عند زوجك واللي قدك واصغر منك عندهم بزوره ومحد دايم لك ومن هالكلام ..
..
ما اخفيكم ..
انا لمن جلست افكر في الموضوع ..
مدري ..
لقيت انو الزوج ماليه محل في الإعراب .. والزواج عموماً ماكان عمرو من اهتماماتي ..
كول خططي سواء اثناء الدراسه او بعدها ماكان من ضمنها الزوج ابداً ..
ومو متخيله ابدا اكون لحالي مع واحد غريب ..
يمكن تقولوا ايش دي المبزره والتفكير الغبي ..
بس جد انا مو متقبله فكرة الزواج ابداً وعندي رهبه من أي رجال غير محرم ليا ..
صحباتي لمن اتزوجوا قالوا اتزوجي والله الزواج حلو خرجات والخ الخ .. واومي لمن تعرف انو أي وحده من صحباتي اتزوجت قالت يالله باقي انتِ _ كتشجيع مو طفشاً مني _
لمن افكر ..
اشوف الزواج مسؤوليه كبيره مره .. احس مو كولو عسل زي مايحكوني ..
اخاف اختياري للزوج مايكون موفق .. اخاف تأثر المشاكل على حياتي لمن اتزوج ..
كول ما افكر في الموضوع تجيني الف فكره وفكره وفي الآخر اقول ليه اتعب نفسي وافكر ..
اجلس في بيت اهلي احسن .. لا مسؤوليه كبيره ولا انا مطالبه برضى احد غير اللي ربوني ولا احد يفرض سيطرتو عليا ..
هل دا شيئ طبيعي .؟ اقصد مخاوفي وعدم اقتناعي بفكرة الزواج ...؟