مشكلتي اتعبتني خاص للاخ رجل الرجال +نور الايمان
السلام عليكم ورحمة الله ..
راح ابدأ اتكلم عن مشكلتي بدون مقدمات
بصراحه انا ابتليت بزوج كانت فيه صفات سئيه ومازالت بعضها الى الان ولكن مع الصبر والدعاء ثقتي في الله سبحانه كبيره في هداية هذا الزوج
المشكله الرئيسية هي بين امي وزوجي واللي زاد الطين بله اني البنت الوحيده يعني امي ماتشوف غيري بهالدنيا ومتعلقه بي وزوجي مايقدر هالشعور
بدأت المشاكل من ايام الملكه والسبب ان امي تدخلاتها كثيره وززوجي انسان حساس مايرضى احد يقوله كلمتين الا يزعل !!
كانت امي تمون بقوه عليه وتطلب طلبات واذا عصبت تهاوشه تحسبه واحد من اخواني وزوجي مايطيق هذا الاسلوب بالاضافه الى انه حساس وحليم برضه مايعرف يجامل ابدا واسلوبه مايعجب اهلي ودايم يقولون انه قليل حياء ومايحترم احد ومن هالحكي ...واااااااااااااااااااااااه من المعاناه اللي قطعت قلبي
تحملت طول فترة زواجي مشاكلهم وكنت انا اتعب اكثر لاني بينهم احترت مدري ششسوي هذا زوج جنه ونار ......وهذه ام برضه لها حقوق ورضاها من رضى ربنا ,,
تعبت تعبت تعبت ماقدرت اصلح بينهم وكانت اسلم طريقه ان زوجي يتجاهل امي لايسلم عليها لو شافها يتحاشاها اذا وداني بيت اهلي يحطني ويمشي ورافض زيارتها لبيتي ,,,استمريت على ذا الحال فتره طويله لكن الله يهديها امي تحب تتحركش فيه تتشره اذا ماسلم عليها وتهاوشني واحيانا تتهمني اني احرضه على اهلي واحيان تعتقد اني بعتهم واخترته وااااااااااااااه من كلامها الجارح الله يسامحها هذه امي مهما كان..
المهم في يوم انا للاسف ترجيت زوجي يدخل بيتنا بكل الطرق عشان كنت ببداية حملي تعبانه ومافيني اروح بيتي لان زوجي كانت مسافر من فتره طويله ويحتاج تنظيف البيت بالاضافه الى ان زوجي نسي يجيب كرت العايله وماقدرنا نروح نستأجر شقه مفروشه وبوقت خروجنا من الدوام ونهاية اسبوع جدا مرهقين طلبته وترجيته يدخل غرفتي وله مني محد يكلمه وكذا .............يوم طلعت البيت لقيت امي معارضه وتهاوش قلت ارحميني ياامي مافيني حيل انظف الشقه او اقعد بالسياره ادور الشوارع بس بحط راسي انام وهو بعد بينام المسأله استراحه فقط وفي غرفتي ولااحد بيزعجك ..بالقوه اقتنعت وخليتها تبعد من الصاله الين دخل زوجي ونمنا طبعا خرجت انا وياه بالليل وتعشينا وكنت بروح بيتي بس خالتي جت من السفر واصرت ننام لين الصباح عشان تتونس مع ابني الصغير ,,وافقت بعد محاولات ,,ونمنا وليتنا مانمنا ..
نسيت اقولكم ان امي طلبت الطلاق من ابوي بعد 30 سنه لمشاكل احنا تعبنا منها من طفولتنا لكن من يومها وزوجي بس يعايرني بامي ويقول بتسوين مثلها وتبيعني مالك خاتمه وفيك وفيك ,,,احيان ارد عليه واحيان اطنشه واحيان اضحك والايام تمشي ومصير الزمن يعلمه الفرق بيني وبين امي لان حياتنا مختلفه
ارجع اقولكم انها تزوجت واحد متزوج من غير مازوجته الاولى تدري او حتى اهله وووامي واخوالي هم بي يعرفون
طبعا امي ماتركت بيتها عشان اخواني الصغار ولان البيت ملكها ..للاسف هذا الشخص ماخذ حجمه من امي اكثر من اللازم وبسبب خلاف على مشكله تافهه طلب من امي مايدخل زوجي للبيت وكأن البيت بيته على غفله!!
طبعا قدر الله وجاء زوج امي واحنا كنا نايمين بغرفتي الخاصه ودق الباب بقوه ويصرخ ويقول اطلع برى لزوجي واحنا قمنا مفجوعين من النوم انا من قوة الصدمه مو قادره اتكلم يعني اش الوقاحه ذي وانا طيب مالي احترام في بيت اهلي؟؟ مالي قيمه عند امي؟؟
الحمدلله ان خالتي سحبته على جنب وزوجي مسك اعصابه وطلع بكل هدوء عشان لايتبلاه لو ضربه او تمشكل معه وقال لمي اغراضك وجيبي ولدي ومشينا مالنا قعده ولادخله لهاالبيت مره ثانيه وطلعنا ..
طبعا امي جلست تبكي وتتصل تعتذر وتقول هو جاء معصب ماقدرت امسكه ومن هالكلام وامي اخذت بخاطري بقوه على امي يعني انا وحيده وبنتها ومهما كان حتى لو تكره زوجي تعمل لي خاطر انا على الاقل
ومن يومها زوجي يعايرني بالموقف وان امي مافيها وكذا واعتبر الطرده من امي مو من زوجها باعتبارها ساكته وماتدخلت وباعتبارها صاحبة البيت وحلف علي مادخل البيت ولاعاد ازورها وقال يكفي سمحت لك تكلمينها
وانا نفسيتي تعبت شلون تنقطع صلتي ببيت اهلي لاهم يشوفوني ولايقدرون يجوني ولاحتى ولدي يشوف اخواله وفوق هذا مشكلتي الجديده مع اهله يعني ظليت 5 شهور وحدانيه بالبيت لاروح لاهله وممنوعه من شوفة امي بالله كيف تستمر حياتي كذا والله نفسيتي تعبت تعبت تعبت بكل ماتعنيه الكلمه وخصوصا ان امي رافضه تتقبل موقف زوجي وتقول انتي عاقه وانتي فضلتي زوجك علينا وانا اقولها يامي زوجي حلف علي بالطلاق لو جيتك من غير علمه او بعلمه وبدون رضاه اني طالق وشلون ترضين اشتت طفل عمره سنتين وطفل في بطني
وللاسف ماهي متقبله ردة فعل زوجي وان كلمت زوجي وبكيت وترجيته يقول انا رجل انهنت وانطردت وهذا اقل شي ارجع كرامتي وكثر خيري ماطلقتك ساعة مانطردت عشان امك تفهم اللي سوته مع زوجها...
اسألكم بالله ساعدوني في هذه المشكله وربي يجزيكم خير الجزاء