رد : ما اجمل لهجه تحبها
اقتباس:
المشاركة الأصلية كتبت بواسطة Raouf
اهلا باهل ابو ظبى والامارات والفجيره وكل القبائل والعوائل
اهل الامارات محترمين ولينا فيهم نسب
لهجة ابو ظبى تختلف عن باقى لهجات الامارات؟
بصراحه باحس انهم حاجه واحده مش باعرف افرقهم ..
بس ليه يابو ظبى كتر اللهجات ده البلد الواحده تلاقيهم مشكلين مع انهم هايشين فى منطقه واحده ..
سبحان الله .. شكرا على وجودك معانا بس بالمره تفسريلنا الحروف اللى بعد معرفك
|
بالعكس أخويه بخبرك أهل بوظبي والعين رمستهم شكل بعض ودبي بروحها والشماليه كلها بكوم لهجه قريبه من بعض
اخويه يوم بقولك أهل بوظبي والعين اخص بالذكر اللي عاشوا اجدادنا في الصحراء قبايل لها وزن وتاريخ وعانوا من قسوة الصحراء والفقر وفي الشقى اللي كانوا تحت رعاية حكام ال نهيان منذ القدم قبل قيام الاتحاد
جوف اخويه بعطيك بعض الكلمات اهل بوظبي والعين يقولونها ..
(أشعنه) يعني ليش ( اهزبه) يعني هاوشه (حشره)ازعاج(صخام) فحم اسود
(مابا) مااريد ( شو تبا) شو تريد وتستخدم اكثر شي يوم يكون مزاجك متكدر او مضايج
(هود هود ) نستخدمها يوم ندخل في بيت الأهل والمعارف والجيران المقربين لأستئذان كلمه تنويه
يردون عليهم ( هده هده ) يعني اقرب مرحبا فيك ..
(خف ايدك) يعني خلص بسرعه في العمل اليدوي تستخدم هالكلمه
( مرحبا اشحالكم اشحال عربكم فريجكم شوابكم كلهم بخير ) تستخدم لأطمئنان على حاله الأهل او القرائب او ناس تربطك بهم علاقه معرفه وطيده ويدون عليك ( عربك بخيركلهم الله يسلمك يردون السلام عليك )
(ياابوي اقعد )( ياابوي عفستنا ) يابوي لاتسير مناك ) ياباوي دريبالك على عمرك ) ومالخ تستخدم كلمه ياابوي للدلال على حنان للطفل الصغير او ابن امه وابن ابوه اوولد الاخ او الاخت حتى لو كان كبير .. ويستخدمونها الكبار دائما
( ياامي قعدي ) ياامي لاتسيرين ) ياامي هاتي الدله مناك )ياامي لعبي خواتج )ومالخ تستخدم الكلمه ياامي للدلال على حنان البنت الطفله او بنت ابوها وامها او حتى بنت الاخت او الاخ ويستخدمونها الكبار دائما
(بترخص عنكم ) في حال تبا تظهر من عربك وتستاذنهم تقول هالكلمه ويردون عليك ( بالحل مرخوص )
(شي تامرونا )تستخدم الكلمه في حال انك كنت زاير اهلك وبترد بيتك وبتقطع درب ويردون عليك (ابدن سلامتك هالله هالله في الطريج ) دليل على اهتماهم في سلامتك
(ميلس) مجلس .. (خاشوقه) الملعقه..
(الدختر ) المستشفى ويستخدمونها كبار السن عندنا وابوي منهم ربي يحفظه مايقول المستشفى يقول دختر
واكثر كلماتنا تنتهي ب يااا يعني
أمايا ابويا عمتيه يدتيه عميه اخويه اختيه ربيعتيه سيارتيه حجرتيه سلامتيه ولديا
وايد كلمات عشان مااضيعك يااخوي رؤوف اكتفي بهالقدر
والسموحه
التعديل الأخير تم بواسطة بنت بوظبيxAD ; 08-06-2013 الساعة 10:15 PM