بسم الله الرحمن الرحيم
أختي الفاضلة نور الايمان بعد التحية والاحترام .. أعجبني كثيرا أسلوبك في طرح الحلول ماشاءالله تبارك الله .. لذلك أسمحيلي ان أبوح لكي بمشكلتي لاني محتارة وتعبانة.. أختي مشكلتي معقدة جدا وراح انفجر من زعلي على نفسي لاكن الحمدلله على كل حال

فأرجو منك انك تساعديني بعد الله في حلها

انا الان ابلغ من العمر 29 كنت متزوجة ولم يكتب لنا الله الاستمرار فتطلقت وعندي بنت كان وقتها عمرها سنة وشهر
حمدت الله وصبرت وكان فيه محاولة للاصلاح لكن رفضت وليتني رجعت كانت حياتي ارحم من حياتي الان لكن قدر الله وماشاء فعل ..

بعدها بسبعة شهور توفي والدي حبيبي رحمة الله عليه واسكنه فسيح جناته تأثرت جدا جدا
لكن بعدها عشت حياة طبيعية الحمدلله لأنني انسانة ولله الحمد مؤمنة بقضاء الله وقدره ..

مشكلتي الان والتي اتمنى ان تساعديني في حلها .. انني بعد طلاقي بسنة واربعة شهور تقدم لي خاطب مطلق عمره31 واب لبنتين كنت مترددة في البداية ولكن بعد السؤال عنه وعن سمعته وبعد ماتطمنت ان حضانة بنتي لامي ولله الحمد وافقت .. بداية الملكة حسيت انه انسان طيب وحنون وانه انظلم بزواجه الاول مثلي وهو بادلني نفس الشعور .. كانت فترة الملكة قصيرة جدا مادرست اسلوبه وشخصيته الحقيقية ..

بعد الزواج بشهر او اقل اكتشفته على حقيقته انسان قليل في حقه كلمة (تعبان نفسيا) .. نفسيته جدا جدا تعبانة .. غيرته ليست طبيعية مرضية
(مع انه انا المفروض اغار بحكم تواصله مع طليقته عشان البنات وهي بنت عمه الا اني ماازعلت ولاغرت لأنه لمصلحة البنات ) .. يتأثر بسرعة من اقل واتفه موقف تصير مشكلة والله تدوم لساعاااات .. كنت احن عليه لأنه يقولي تحمليني انا جدا تعبان من حياتي
القديمة مسيطرة علي .. استمر زواجه الاول سبعة سنوات حكاها لي بالتفصيل للأسف بعد زواجي منه .. حياة مافيها راحة مشاااكل يوميا و طلقها مرتين واغلب الايام عند اهلها ..وعلى قوله تخلت عن بناتها فترة طويلة وقام برعايتهم لوحده واصبح لهم الام والاب لشهوور الى ان خطبني ..

تحملت وصبرت وقلت لعلها خيرة واجر لي .. ويعلم الله اني وقفت جنبه
وحنيت عليه و على بناته واعتبرتهم مثل بنتي وحاولت بالتدريج اغير من نفسيتهم لأنهم تعبانبن نفسيا الى يومنا هذا من مشاكل امهم وابوهم .. ووالله يااختي انهم يحبوني ووالدتهم الي مااعرفها ولاتعرفني اتصلت بي شخصيا تشكرني وتدعيلي بالخير لأنها لاحظت تغيرو للاحسن الحمدلله واهله نفس الشي لأني مااعاملهم الا بمايرضي الله...

هو يااختي عصبي جدا جدا وحساس وغيوور و يزعل من دون سبب .. يتعمد يفتح مواضيع تستفز وتزعل وتقهرر وياويلي اذا زعلت او تضايقت يبغى بالمقابل اداريه واطبطب عليه .. والكارثة الكبيرة جدا انه يغار من (بنتــــي) .. اقسم بالله اني مااجيب سيرتها لابخير ولابشر ولاكاني ام لها بنت بعد الموقف الي صار .. وهو

اول زيارة لاهلي لبيتي تغير كليـــــــــــا توتر وارتبك يقولي هي معاهم قلت مين قلي الصغيرة ... والله صارت مشكلة كبيرة من يومها اكتشفته على حقيقته ومرضه النفسي الله يشفيه .. بدأ
يغلط عليها لانه قلي بطلع مابتحمل اشوفها تناديكي ماما رغم انه بناته ينادوني ماما ومافيها شي .. بس عشان قلتله ايش فيها (يعني ابغى توضيح)
سبني وشتمني وشتمها ويدعي علينا لأنه منتظر اقولو كلام حلوو وانها زيارة وبتروح .. مرررة زعلت واهلي لاحظو وامي الله يحفظها ويخليها لي انسانة عاقلة هدت الوضع والامور لانها سمعت وارتاح لما قالتلو الصغيرة بنتي
وانتم عيشو حياتكم وانبسطو .. مع انها في نفسها زعلت وتاثرت بس مابينت عشان استقر وحياتي تمشي.

والله يااختي صرت اخاف منه صرت حتى صورها امسحها ولااكلمها وهو بالبيت خوفا عليها وعلى نفسي .. صرت احسب لكلامي الف حساب لانه يقلب بسررعة اذا زعل من أي شي ولو انه تافه صعععب يرضى واجلس بالساعات ارضي فيه واهديه وهو مافي فايدة ليييين اتعب ولما يلاحظ علي التعب لأنه طبيعي اتعب وينهد حيلي تخيلي ساعات .. يصير وحش لسانه متبري منه اعوذ بالله يسب كل انواع السب ويقولي مطلقة ويعيدها كذا مرة بس عشان يستفزني وكلام
انا استحي اذكره واحاول انساه ويبصق وانتي بكرامة ويشد الشعر ويغلط لييين ينزل الي في راسه وبعدين يرتاح .. وانا صبرت وتحملت لأني كنت حامل وبمجرد ماينزل الي في راسه ويهدى يعتذر ويقولي هذا الكلام كله مو لك بس انا تعبان ومتضايق سامحيني..

يعلم الله اني مادخلت اهلي نهاائي خوفا من الطلاق .. لكن لما بدأ يغلط على اهلي وخصوصا واالدي المتوفي ووالدتي .. نفذ صبري و اشتكيت لخالي واتخذ موقف وجلست فترة عند اهلي ومارجعت الا بزيارته لنا هو ووالده واعتذاره قدام خالي ..

بعد مارجعت قلي اانا ممكن اتغير واحفظ لساني واحترمك الا اني اغير طبع فيني الي هو احب افضفض واقول الي في نفسي مااقدر اتغير ولازم تقدري طبعي وتحترميني
قلت في نفسي انا بكون عاقلة والي مايعجبني بطنشو ولاكأني سمعت كله عشان ولدي واربيه مع ابوه ..

والله ياأختي يتعمد يفتح مواضيع تستفزز جدا وتزعل الا اني امشيها واحيانا نتمشكل بسبب فضفضته لاكن تنتهي بسلام .. الا في يوم كنت في طريقي لبيت اهلي قلي بكلمك بموضوع من حقي اقولو .. قلت تفضل قلي بنتك لما تكبر تكشف ولا تغطي علي بس قلت تكشف حتى ماذكرت الاية الي بالقران رديت باختصاار .. وربي صدمني بتفكيره القذر قلي بس انا ابغاها تغطي وقلي كذا بالحرف ( خلينا بعيد احسن الشيطان .... ) والله ياختي من كلمة شيطان اعوذ بالله اسودت الدنيا في عيني وانكتمت
بسرررعة حاولت اغير الموضوع وقلتلو خير .. يمكن لو وحدة ثانية كانت ماسامحت ولارجعت لأنه كلام يقشعر البدن .. يعني بنتي بعيدة ولا نجيبله سيرتها ولاكانها موجودة ليش يسوي كذا طول الطريق بس افكر لو دارت الدنيا ولاسمح الله مالها غيري كيف اطمن ياالله استغفر الله ..

ماصدقت اوصل بيت اهلي وماقلتلهم بس جلست اسبوع زعلانة وقلي اسف مااقصد كنت افضفض انتي فهمتي غلط قصدي مافي داعي تعرفين اغار وكلام فاضي وربي كرهني فيه .. قلت كل شي وله حد لاتتعدى حدودك واعتذر .. وللاسف رجعت وزادت المشاكل ووصلت لاهله والمشكلة يغلط علي حتى قدام اهلو وبناااته تخيلي وكنت اهون عليهم اقولهم معليش بابا زعلان من العمل لاتفكرون يعني افكر فيهم اكثر منه .. وقلت لابوه وامه بموضوع بنتي والي يسويه فيني وماانكر قلهم انا حر ومافي دعوة مادعى عليها الله يحفظها من كل شر .. امه انسانة جدا طيبة وحنونة تقولي وهو يسب ويدعي قدامها اصبري ربي مابيقبل دعائه ولما سالتو قدام امه وابوه انت تدري اني مطلقة وعندي بنت دامك تغااار مع ان هذا مو غيرة مدري ايش اعوذ بالله ليش تزوجتني قلي قدامهم كنت ابغى حرمة تفتح بيت وماتوقعت انك متعلقة بيها .. قلتلو انسانة مااجيبلك سيرتها و لاطلبت تجي بيتك ولاتصرف ولا لك دخل بيها ليش تتعمد تذكرها قدامي .. بكل برود يقول اسف كنت افضفض.. بالله هذل كلام يعقل..

صبرت وقلت في نفسي دامها بعيدة مابيضرها ان شاءالله .. ومثل ماقلتلك صرت داايما افكر واقول لو دارت الدنيا وصارت بنتي وحيدة لااااااسمح الله ومالها غيري كيف بطمن عليها عندي .. وبسرررعة اقوم اصلي واستغفر واتعوذ بالله واطمن نفسي انها بتكون بخير ونعمة وربي بيحفظ امي وخوالها وخالاتها وابوها واهلها عشان لااتعب ..
اخر مشكلة بيننا بخصوص بنتي تخيلي وانا نفاس شافها بالصدفة قلي انتم متعمدين وكبر الموضوع .. ومااارضيت ارجع الا بعد ماوعدني وعد شرف انه مايجيبها على لسانه وينساااها نهااااائيا ..



وفعلا عشنا حياة ماتخلو من المشاكل لكن تعودت ومشيت .. لاااكن نفذ صبري كل اسبوع مشاكل احيانا والله ثلاثة اربعة ايام مشاكل
داائما متوتر وتعبان يقولي بسبب ضغوطات الحياة والبنات مع ان كل شي الحمدلله ماشي والكل مرتاح الا هو .. لما اوقف جنبه واعطيه من قلبي يقولي انتي كذابة وخبيثة ووو .. لما اتركه يرتاح و في حاله يقولي انتي ماتحسين وانانية وووو .. عجزت وتعبت..

من كثر مايصرخ ويعصصب صرت داااائما متوترة وخايفة وعصبية ومرتبكة دمر نفسيتي لدرجة احبس نفسي في الغرفة انا وولدي .. ورجع مثل ماكان ونسى وعده وتعبت ودخلت اخوية بالموضوع وهدى الوضع .. بعدها زرت اهلي وبالقووة رضى يوديني على انها زيارة وارجع .. بس اخوية ماصدق اجي وقلي ماتروحين انتي صبرتي كثييير وتنازلتي اكثر وهذي حياة مملة تقصر العمر وتتعب القلب لين متى يعني لين تجيك سكتة من الخوف والقهر .. طنشيه ولاتردين عليه لين يجي عندنا وياامساك بمعروف ياتسريح باحسان ..

انا ماادري طيبة زيادة او غبية زيادة ارسلتلو رسالة بمناسبة رمضان نسامح بعض ونربي ولدنا مارد .. كلمته عن مقاضي العيد مارد .. لما ارسلتله لمتى ياابو فلان بنفضل على هذا الوضع رد قلي ايش تبغي قلتلو الي في نفسي اني ياااما سامحت وتنازلت ليش ماتسامح ونربي ولدنا قام حظرني من الوتساب

اتمنى تردين علي ضرووري وباسرع وقت لأني محتارة .. هل انا صح اوغلط .. هل المشاكل الي صارت وذكرتها تخليني اطلب الطلاق من البداية ..ادري تفكيري غلط لاني اخاف من لقب مطلقة للمرة الثانية مع اني مؤمنة بقضاء الله لاكن نظرة الناس والمجتمع ماترحم مطلقة مرتين ولو ماخلفت استغفر الله كان اهون .....
ويعلم الله اني صادقة في كل كلمة وماضلمته ولو سالتيه متأكدة راح يعترف بأن كل الي ذكرته صار وبيقول انا رجاااال من حقي افضفض وا اتكلم لو تضايقت من أي شي حتى لو يزعل ومن حقي اعصصب لو مالقيت الي ابغاه ومشي الي في راسي .. وهي انثى المفروض تعرف كيف تهديني وتروقني وتقدر اطباعي وماتزعل وتستمر في الرضاا والكلام الحلوو حتى لو لساعات ماابغاها تتعب او تمل..
وراح يقولك اني طيبة وبنت ناس وحنونة بس لما تتعب تقلب تصير انسانة ثانية وانا فعلا مثل ماذكرتلك والله لساااااعات وجهي قدام وجهو بس ارضيه يقولي اول لاازم تسمعين كل كلامي واسمع واطنش واجلس اهدي وارضي لييين ينهد حيلي ولما اتعب احاول اغير من وضعي واتهرب واشغل نفسي بأي شي ومافي فايدة يطاردني بالبيت .. ابوه يقولي عمرري ماشفت زيكم ويعطيه حلول انك تخرج من البيت لين تهدا .. وهذا الصح بس يرفض يقول انا غيير وانا كذا ..

ارجوووكي ساعديني لاني من جد ملخبطة وتعبت من التفكير هل بعد هذا كله اتنااازل وانا ياما اتنازلت وارسله واتحمل حتى ولواهلي رافضين بس عشان ولدي ومااطلق مرة ثانية.. ولا الطلاق ارحم وهو الحل ( نسيت اقولك متزوجة لي سنتين )
انا انتظرك بفاااارغ الصبر بارك الله فيكي