ضميري يؤنبني من أجلها
السلام عليكم ورحمة الله وبركاته
اسعد الله اوقاتكم بكل خير أيها الإخوة والأخوات في الحقيقة اختكم في الله تلفتت يمنه ويسره أين تضع موضوعها مالقيت إلا هالمكان أحط الرحال فيه عاد مدري هل مكانه هنا ولا عاد هذا شغل المشرفين وهم اعرف مني وين مكانه بالنسبة لموضوعي ممكن يكون بسيط عند غيري وممكن لا اما بالنسبة لي لا أخفيكم إنه لي 3 أيام ماقدرت أنسى السالفة وحتى لما تطري عليه وأتذكرها نفسيتي تتألم وتتعب أحس بالذنب إللي وقعت فيه
طبعا حنى نسكن في الدور الثاني وقبل 3 ايام بنتي شافت قطة عالقة بالنافذة من برى وتصيح انا سمعت صياحها بالبداية وحسبته من الحوش الخارجي للبيت ولما بنتي راحت لدورة المياه اجلكم الله شافتها عالقة بالنافذة وتحاول تنزل وماقدرت تنزل أنحشرت فوق طبعا النافذة يوجد بها شبك صغير لتهوية ماتدخل منه الحشرات للبيت والقطة كانت على حافة النافذة من الخارج والشبك من الداخل ولما بنتي شافتها نادتني وجيت شفتها تحاول تنزل وماقدرت كانت تناظر للأسفل وتصيح وهي شكلها طلعت فوق عن طريق مواسير المياه والصرف الصحي تسلقت عليها وطلعت لنافذة وعلقت هناك طبعا بالبداية تركتها ساعة قلت يمكن تشوف لها دبره وتنزل لوحدها بس هي ماسكتت تصيح وتناظر للأسفل وتحاول تتسلق بالمواسير اللي طلعت منها وتتراجع جيت بعطيها أكل عندها وماء طبعا ماقدرت لأنه صعب مافيه طريق للوصول لها بالنافذة إلا عن طريق دورة المياه وحرام تدخل بالنعمة لدورة المياه فتراجعت فكرت نتصل بالدفاع المدني علشان ينزلونها طبعا تعرفون لو بالدول اللي برى يهبون لنجدة كلب اجلكم الله اما عندنا من سابع المستحيلات يجون علشان قطة ولما نفذت كل الحلول اللي عندي جتني فكرة افك النافذة واشق الشبك وأنزلها من فوق ولما جبت المعدات وبديت بفتح النافذة هي خافت وارتعبت وناظرت للاسفل وأختل توازنها وطاحت للأسفل وسمعتها عقبها وهي تصيح وارسلت اولادي يشوفونها بالحوش خفت إنها تكسرت او صابها شئ بسببي ولما راحوا شافوها رجعوا قالوا لي هي شفناها بخير بس عندها عرج بإحدى رجليها تمشي وتعرج والصراحة من ساعتها احس بتأنيب الضمير نحوها إنه انا السبب باللي جرى لها وكل ما أتذكرها احزن عليها وخايفة من الإثم خصوصا إنا بشهرعظيم والعقاب فيه مضاعف احيان اقول لوتركتها راح تموت خصوصا إنه كان واضح عليها الإعياء والتعب ولما جيت بنزلها سقطت من فوق واصيبت وأنا سبب رئيسي لإصابتها باللي صار لها ويزيد همي لما أتذكر الحرمة اللي دخلت النار بسبب قطة وللحين السالفة عالقة براسي وماني قادرة أنساها ويشهد الله إنه كان نيتي أنقذها وأنزلها من فوق ما أخليها ترمي نفسها بالطريقة هاذي .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
التعديل الأخير تم بواسطة أم سلطان1 ; 23-07-2013 الساعة 08:03 AM