رد : كلمة رآس للمتأخرات تبين الحل؟ ادخلي وشاركينا..
تعرفو جات في بالي فكرة عشان نحس بالراحة النفسية مؤقتا يعني ..
مثلاً إذا كان عمرك 23 لا تقولي خلال دي السنتين ابغى اتزوج قبل أن أصل لل 25
لا لا صدقيني حتتعبي .. وحتعيشي في نكد وقلق وحيبان عليكي هذا الشي والناس حيتصرفو معاكي على أساس الشي الواضح عليكي مهما أخفيتيه حيبان من حركات الجسد والنظرات يبااااااااااان وربي .. شوفي انا بحكم اني كاتبة فكان واضح هذا الشي على كتاباتي .. لحد ما اتكلمو عليا بعض الرفيقات الله يسامحهم .. عشان كذا لما الناس يردوحلك بكم كلمة على قولة الحجازيين هم يكلموكي على أساس أفكارك الداخلية .. والدليل انك انقهرتي ... لو هذا الشي مو هامك ما كنتي حتنقهري أبداً .. وعلى قدر ملامسة جرحك حيكون ألمك .. لذلك دائما طهري جرحك احرصي عليه كثيييرا خاصة قبل الذهاب للولائم دحين العيد وحتكون الاجتماعات كثيرة .. أنا بالنسبة لي كان دمار اني أروح فرح وحدة أصغر مني أحس الكل يطالع فيني لكن بعد ما غيرت أفكاري الداخلية ذهبت لعرس .. واستمتعت كثيراً ضحكت ولم يهمني اني أجلس في طاولة أنا أكبر واحدة فيها لم أتزوج .. بيني وبينكم حبيت ني أكون في وجه المدفع هههه يعني أفكر لو كنت متزوجة بنت خالي اللي أصغر مني على طول راح تحس بأحاسيسي هذه بس دحين في شي يواسيها اني اكبر منها وما اتزوجت .. شعوري اني اتسببت في سعادة انسان ريحني كثييير..
المهم نرجع للفكرة .. حطي في بالك أسوأ الاحتمالات كيف يعني؟ يعني.. إذا كان عمرك 23 قولي قدامي عمر حأستمتع فيه وانبسط إلى ال30
وإذا كان عمرك 30 قولي سن الثلاثينات أجمل عمر حأستمتع فيه قدر المستطاع إلى 37 .. وطبعا في دي الحالة شيلي من راسك فكرة ليش ماراح اتزوج إلا مطلق أو معدد .. مو لأن احنا فينا نقص لا بل لأنه لا يوجد أعزب تجاوز ال37 إلا إذا كان فيه مرض أو بلا .. أظن حتى انتي ما ترضي تتزوجي واحد أصغر منك.. وفي الأخير المعدد والمطلق رجل مثله مثل الأعزب ومثل اني لم أرضى في بداية عمري أن أتزوج أي أعزب فما راح أرضى الآن أن أتزوج أي مطلق وأي معدد فالعبرة بالرجل وليس بحالته الاجتماعية يوجد معدد ومطلق وأرمل.. أرجل من عازب ويوجد عازب يتزوجك ثم يتزوج عليكي ويقهرك أو يذلك أو يطلقك .. المهم بعد ما تسلمي أمرك ان قدامك عمر إلى 37 وراح اتزوج مطلق أو معدد قولي في نفسك حياتي دي اللي قبل الزواج ابغى انبسط فيها ..
مو تشاؤم صدقوني بس كذا الأريح لنا
"فكر في أسوأ الاحتمالات" هذه القاعدة قريتها من كتاب "ديل كارنيجي" دع القلق وأبدأ الحياة
بس تعرفوا حتى في الدعاء احنا مأمورين اننا ما نتعجل الإجابة ..
عشان كذا لا تقولي ما ابغا اوصل لل25 او ما ابغى أوصل ل30 أو ال37 ويكون باقيلك سنة او سنتين لا لا
حطيلك سنين أطول وكل ما توصليلها مددي .. كذا نفسياتنا يبغالها شوية حيلة عشان نتأقلم مع كافة الظروف ونعيش سعيدات ونتحمل كلام الناس .. ويبان أثر رضانا على وجهنا فمحد يقدر يتكلم وحتى لو اتكلمو تكون عندنا حصانة نفسية فما يأثر فينا الكلام ونقدر نرد عليه بمنطقية وما يجلس حسراات في نفسنا ..
احنا في رمضان وعارفين كيف لو جلستي تحسبي كم باقي على الفطور راح يطول الوقت وتزدادي جوع .. لكن لما تتناسي شي اسمه أكل وتنشغلي بحاجات ثانية وتسلمي انه لسى باقي وقت طويل ماراح تحسبيه بالملم وتتعبي ..
وإذا اتجاوزتي الأربعين في هذيك الحالة في خيارات كثيرة قدامنا من اللجوء للخطابة وما إلى ذلك حيكون مر عمر طويييل وتفكيرنا صار أنضج وعلاقتنا موسعة وأهل الخير كثيرين ..
والأهم من هذا وذاك انك تحافظي على دينك و تطوري نفسك في هذه الفترة تدرسي وتتوظفي وتتفوقي وتشاركي في أنشطة اجتماعية وخيرية .. وتنبسطي وتسعدي بمعنى الكلمة .. وتحافظي على روح العذراء في داخلك ما تحولي نفسك لعجوز يائسة محبطة .. ..
حرام عليكم احنا في أجمل فترة عمرية ... في سن الشاب بدون مسؤليات يا لله ما اروع ذلك وأجمله
شفتو السيدة خديجة رضي الله عنها اتزوجت وعمرها 45 من رجل عمره 25 هو الرسول صلى الله عليه وسلم .. صح اتأخرت في زمن الناس كانو يتزوجو في سن 9 سنوات والأرملة والمطلقة لا تلبث إلا ان تتزوج سريعاً .. لكنها حين تأنت .. وتأخر رزقها سعدت بأفضل زوج وحظيت بكونها أول من تسلم وخلد اسمها في التاريخ ..
وكانت امرأة صالحة لزوج يستحق ..
ونحن نحسبنا صالحات ولن نقبل إلا من يستحق .. وعلينا أن نبعد عن تفكيرنا أي شيء سلبي ...
حتى ان لم يتقدم لنا من يستحق سنتزوج في الجنة يا الله ما أسعدنا .
نحن بخير فاطمئنوا
اللهم اجمعنا في جنة الفردوس الأعلى.
__________________
اللهم اجعلني من اوليائك الصالحين
التعديل الأخير تم بواسطة LoLo^^ ; 28-07-2013 الساعة 10:40 AM