رد : مديرتي السابقة ترفض اعطائي شهادة خبرة
عيل سوي الكتاب من الحين واكتبي فيه
انج فلانة الفلانيه كنتي موظفه لدى المركز الفلاني
من تاريخ كذا الى تاريخ كذا ومسماج الوظيفي كذا
وكنتي تسوين كذا ومشرفه على كذا واذكري تفاصيل
شغلج عشان يكون لج دليل انج كنتي موظفه عندهم
وصوري الكتاب وخليها تختم لج عالصورة استلام
بختم المركز واذا مارضت تستلم طرشيه عن طريق
بريد معتمد عندكم امبوست ولا اراميكس ولا غيره
وشهادة التقدير ممكن تستفيدين منها في الاثبات
وهي اما بترد عليج بكتاب وتقول ان المركز كان غير
مرخص وهني هي تفضح شغلها وتعرض نفسها
للمساءله القانونية او انها تطلع لج شهادة خبره
او انها ماترد عليج خير شر وهذا دليل ضمني
على انج على حق وتستحقين الشهادة
وخذي هالاوراق معها صورة الكتاب
اللي مختوم بالاستلام من المركز
وروحي لدائرة العمل واشتكي هناك
وبعد كل هذا اذا مافيه فايده استشيري
محامي قبل ماتقيدين دعوى عشان
الاجراءات مايحصل فيها اي خطأ
وبالنسبه للشهود اذا طلبتيهم باساميهم
غصب عليهم بيحضرون ويشهدون مب
بكيفهم ولا بتوقع المحكمة عليهم غرامة ماليه