عزيزتي


ماادري صراحه وش اقولك بس انه يضربك بعد شهرين من زواجكم اشوفها كبيره وكمان يتكرر هالضرب وهو يحبك هذي كبيره بحقك يعني انتي كنتي عروس وهو ولد شاب وضربك وبعدين بكره اذا رجعتي له وجبتي من واحد واثنين وثلاثه هل راح يستمر في ضربك وراح تسكتين لانه يحبك وانتي تحبينه

الحياه الزوجيه ماتمشي بالحب كثر ماتمشي بالتفاهم الود الاحترام حتى لوكان مايكن لك حب بس يحترمك ويحترم انك زوجته وام عياله ممكن هنا تستمر الحياه يحترم انك انثى وهو رجل وقمه الضعف انه يضربك وانتي امراه ضعيفه وباين ان مافي سبب مقنع وان الضرب مستمر يعني بعد شهرين من زواجكم متى لحق يشيل عليك ويحكم عليك ويكرهك لدرجه انه يضربك .
ماادري هل هو ضعف من زوجك او منك
باين انك تحبينه بشكل انك تغفرين لكل زلاته وماتسوين له حدود معك عشان يبقى بينكم الاحترام او انك
انسانه صبوره بزياده وساكته لدرجه خلته يتمادى .

عزيزتني ادري الكلام اللي فوق مايغير بالمشكله شي بس فكري بذاتك شوي قدري ايجابياتك عشان ينتضم تفكيرك انتي امراه وسنك صغير والله رزقك بطفله زوجك اهله لعبوا بعقله وتزوج وشال كل اغراضك والحين يهددك بأخذ بنتك
اذا كنتي واثقه ان القضيه ممكن تسلبك بنتك نصيحه صدقيني فلوس الدنيا تتعوض بس مراره فقدك لبنتك شي عمره ماراح يتعوض .
زوجك انسان مندفع بقرارته اللي باين انه مو هوا اللي يتخذها فضروري اذا كنتي ناويه ترجعين له انك تخلين من نفسك انسانه شخصيه وتتحكمين بقراراتك لان بضعفك وضعفه الافضل ماترجعون لان بكره راح تجيبون خمس اطفال وترجع امه تقوله كم كلمه ويطلق وبدال الواحد اللي يضيع يصيرون 5 اطفال مالهم ذنب الاان عندهم اهل عايشين بضعف
فكري ايش الامكانيات الموجوده عندك حاليا ?
زوجك وتزوج عايش ولاموعايش خلاص انتي انتهيتي من هالنقطه اذا الله كاتب لك رجعه له راح ترجعين له ايش ماصار
يمكن يكون زواجه خير لك يمكن الزوجه الثانيه تكون في صالحه وتخليه يحس ان زوجته الاولى كان مافي منها
تخلي ايجابياتك تضهر له ويرجعك ويعامل باحترام اكثر من قبل .

حماتك واخت زوجك صدقيني اذا هم فرقوا بينك وبينه ضلم كما تدين تدان الله وكيلهم ليوم القيامه

انتي وطفلتك .. باين ان المشكله ضاغطه عليك كثير وماالومك بس اقولك اياها ماوقفت الحياه على رجل الزوج مهم
بس زوجك الحين مطلق ومتزوج
يعني مابيدك شي الاانك تشتغلين على نفسك اكثر وتنمين مواهبك وتسعدين بحياتك عشانك انتي لحضات التشبث بالرجل ينفره منك اكثر واكثر كيف بواحد مطلق ومتزوج
وكلي امرك لرب العالمين والله ماراح يخيبك .. حسي ان هذي فرصه لك عشان تستقر نفسيتك من المشاكل اللي عشتيها ال3 سنين اللي راحو .. اطلعي مع بنتك ارجعي لصديقاتك اسعدي معهم عشان تطلعين من الجو المشحون اللي انتي فيه ابدي اقري في التعامل مع الرجل للدكتوره ناعمه الهاشمي .، اقري في الثقه بالنفس ، اساليب التعامل ، الحياه الزوجيه في ضل السيره النبويه راح تفخرين بذاتك نمي موهبه عندك باختصار انكبي على نفسك وانسي زوجك .. ارسليله رساله اذا تتواصلين معه ان بالرغم من حبك له تتمنين له التوفيق .

الرجل الحين مطلقك ومتزوج ولزوجته الحق في انها تعيش معه حياه زوجيه
بعد الطلاق احفضي احترامه لاتذكرينه بسوء امام الناس ادعيله بالتوفيق اذا قابلتي احد له علاقه فيه
قضية رجعه ذهبك خليه منحصره على رجوع ذهبك ماهو انتقام منه وغصبا يرجعلك .. الجأي لربك وادعي اذا كان في رجعتك خيره لك ولطفلتك ولاربي يسخر لك اللي فيه خير لك .
قلبي والله متألم معك .. بس شفت لي صديقه كانت بنفس موقفك والحزن خيم عليها وفقدت علاقاتها مع الناس وتدمرت بينما هو عايش حياته وماتحرك فيه ساكن وبعد عمر رجعت لطبيعتها والله سخر لها خير بحياتها وللحين ندمانه على ايام البكا اللي بكتها ولو درت ان هالخير راح يجيها مانزلت دمعه وحده
عشان كذا اقولك الحزن والالم ماراح يرجعه لك بالعكس ضعفك راح يوصل له من الناس وينفره فيك زياده .. وياكل من روحك ويضيع ايامك احمدي الله انك بصحتك وعافيتك وبنتك بخير وامان .. الله ييسر امرك وترجع لك حياتك اللي تتمنينها .


ونصيحه حاولي تذكرين لنا تفاصيل عن شخصيته تعامل اهله تعاملك معه بدون ذكر المشكله عشان الاعضاء يكون واضح لهم الموضوع ويقدرون يردون .. بالانسب لك