منتدى عالم الأسرة والمجتمع - عرض مشاركة واحدة - اشتركت في معرض مهني ولم أقبض نصيبي من المكافأة

28-10-2013, 12:36 PM

مــريم

موقوف

تاريخ التسجيل: Feb 2006

المشاركات: 14,194

اشتركت في معرض مهني ولم أقبض نصيبي من المكافأة

قبل 6 شهور كان فيه المعرض المهني للتوظيف .. يقام في قاعة كبيييرة وفيها كثير من جهات العمل الحكومية والخاصة للي يحب يقدم على وظيفة ..
شركتنا فيها عدد محدود جدا من المواطنين .. وهم لهم الاولوية بالمشاركة وتمثيل الشركة في القسم الخاص فيها ..
ومافيه معاي إلا بنت وحدة . فأنا حبيت أساعدها وقلت لهم أنا ممكن أشارك في يوم السيدات فقط .. لكن الأيام العامة اسمحوا لي ..
فهم وافقوا وماكان عندهم اعتراض ..
الموظفين اللي يمثلون الشركة بهالمعرض تعطيهم الشركة مكافأة مالية كشكر وتقدير لجهودهم ..
الشهر اللي راح .. عرفنا ان المبلغ راح ينزل مع الراتب ..
وتفاجأت إنهم مانزلوا لي ولا شي .. في حين كل الموظفين اللي اشتركوا نزلت لهم المبالغ ..
طبعا تضايقت وعرفت انهم استبعدوني عشان اني شاركت بس يوم واحد من الأيام الستة ..
ولكن هذا مايعطيهم الحق إنهم يعطون كل الموظفين ماعداي .. لأن فيه موظفين اشتركوا يومين .. وفيه اللي اشتركوا 3 أيام .. وفيه موظفين اشتركوا 6 أيام بكاملها .. ومادام ساووهم ببعض فأنا لي الحق يساووني بهم ..وهم يدرون من الاول إني بشارك يوم واحد ولا علموني انهم ماراح يعطوني شي ..

فلما نزل الراتب الشهر اللي راح أنا دقيت بالمسؤول عن الرواتب وسألته .. قال لا مبالغ المعرض المهني الشهر الجاي بتنزل مع رواتبكم .. قالها بتعميم على الجميع .. أنزين أنا أدري إن الموظفين نزلت لهم المبالغ ليش تستغفلني .. قلت معليه بنلحق الكذاب لباب بيته .. وانتظرت شهر .. ونزل راتبي هذا الشهر طبعا مثل ماتوقعت بدون ماينزل المبلغ ..
أنا احترييييت جدا جدا .. البارحة أتهدد وأتوعد إني اليوم ماراح أعديها على خير .. ليش ماتساوون بينا وليش تهمشوني .. وأنا اعرفهم هالأجانب لو أسكت عنهم مرة يتمادون ويعيدونها الف مرة ..
رحت كلمت الشخص نفسه اللي قال لي هالشهر بينزل .. وقلت له انت قلت لي هالشهر بينزل المبلغ ولا نزل .. قال الموظف اللي يعمل تحويلات الرواتب في اجازة انتظريه لين يرجع .. طيب انت مسؤوله ماعندك صلاحية على شي ؟؟ متى بيرجع ؟ الاسبوع الجاي .. طيب بغيت كشف الراتب لهذا الشهر .. قال لي أيضا لما يرجع الموظف ..
عصبت كثيييير وكتبت ايميل طويل وعريض لمسؤولي طلعت اللي في كبدي كله ..
قال بشوف الموضوع وبرد عليج .. خايفة انه هو ايضا مثلهم .. لأنهم كلهم اجانب يغطون على بعض ويدارون بعضهم البعض ضدنا احنا المواطنين ..

التعديل الأخير تم بواسطة روح المساء ; 28-10-2013 الساعة 06:24 PM السبب: العنوان ليناسب النص