السلام عليكم ..

الحمد لله حالي افضل من السابق من ناحية تعامله معي .. لكن ما زالت مشكلتي مستمرة ..

كثير من الاعضاء يظنون اني شكاكة وكلامي اوهام .. بحياتي كلها ما كنت غيورة ولاقدمت سوء الظن على حسن الظن .. لكن عند المراة حاسة سادسة تنبهها في غفلتها .. اول امر خلاني التفت لزوجي هو حلم رايته ووالدتي كانت كل مرة تحلم بوالدي تتصل عليه ويعترف انه تزوج

اتمنى اي احد يتعامل مع مشكلتي مايقول لي كلامك كله ظنون واوهام ويطرح حلوله باعتبار المشكلة حقيقية كذا بتساعدوني


نجي للمستجدات

صرت امدح اهلي قدام زوجي بطريقة متفائلة.. وسبحان الله في نفس اليوم اللي بديت فيه قال وش رايك نطلع معهم يوم الاستراحة ونشوي

الرسائل الايجابية فعلا طاقة سحرية ومفعولها عجيب


باتكلم عن شلة السوء اللي معه بالدوام .. طلعت هي ساس البلاء مرة وراني صورة بجواله لفيت الصورة بشكل عفوي وطلع صور قذرة.. هذا كان بقروب الدوام دخلت المحادثة وقريت كلام بذيء وتعليقات على النساء الداخلين والطالعين للمكتب من الكلام اللي يستحي الانسان يصير بينه وبين نفسه لكن اللي ماعنده مروءة وخوف من الله يسوي كل شي

قال انا ما ارسلت شي قلت له بس ساكت والسكوت رضى
المهم دعيت قدامه على اصدقاؤه وواحد منهم تحديدا اللي كان كلامه دعوة صريحة للزنا ..
بالعادة اكون متسامحة ما احقد ولا اشيل بقلبي لكن ماقدرت امنع نفسي من الدعاء عليهم .. كنت ادعي عليهم قبل ما اعرفهم والحين ادعي عليهم باسماءهم ان ربي يبتليهم بصحتهم وباهلهم

بعد كم يوم كانوا عاملين للرجال حفلة تكريم والغيت لانه والده دخل العناية

قلت لزوجي عشان تعرف انه ظلمني وظلم زوجة كل واحد من البقية الصامتة ولسه بيشوف من ربي اعظم .. زعله هذا الكلام وزعل لاني ادعي عليهم

انا اسعدني ان ربي نصرني .. هذا الموقف كافي لزوجي عشان يراجع نفسه

لكن بيني وبين نفسي تضايقت .. غلطت اني دعيت عليه؟؟ وهل لزوجي حق يزعل عشانهم مو اللي يسوونه هو التخبيب؟ لو واحد من هذولي المفسدين درا عن المشاكل اللي يشعللها في البيوت بسبب كلمة يقولها او صورة يرسلها وهو منسدح ومروق وش بيكون موقفه ؟؟

زوجي امس قال ادعي لي الله يهديني .. دعيت له .. رد ودي اترك ربعي

انا تفاجات من كلامه .. يعني لهالدرجة سيئين