أختي طول الزوج ما يعتبر من العوامل المهمة لنجاح الزواج

وحده من قريباتي متزوجة من زمان مدري كم سنة بالضبط لكن ما شاء الله عندها أولاد بالجامعة المهم هي طوييييلة و زوجها طوله عادي يعني هي تبان أطول منه بس ما شاء الله عليهم تشوفينهم تقولين معاريس هو يخاف عليها من النسمة و هي ما عندها سيرة الا هو
قبل كم سنة تقدم واحد لأختها فأخوها قال لها تراه رجال زين و الكل يمدح فيه و ولد ناس و ما ينعاب و مدري أيش بي يمكن يكون أقصر منك بس هي قالت ما دامه زين ما يهم طوله و زوج أختي أقصر منها و ما عندهم مشاكل و تزوجته و نفس الشي الحمد لله الحين صار لهم 6 سنوات متزوجين و ما شاء الله عليهم ما تتخيلين وش كثر متوافقين...حتى إن أمي دايم تقول إنها ما عمرها شافت زوجين مناسبين بعض أكثر منهم

أنا ما أقول إن كل اللي أزواجهم أقصر منهم تكون زواجاتهم ناجحة بس هذه النموذجين اللي شفتهم و مثل ما قالت أختي البتول رتبي أولوياتك و وازني الايجابيات مع السلبيات...و إذا كان طوله راح يضل هاجس عندك فأنا من رأيي ارفضي الحين أحسن لأنك ما راح تعرفين تتهنين بزواجك و انتي تفكرين فيه فأحسن تفضي الموضوع و انتي على البر و خلي كل واحد يشوف نصيبه...

و شي أخير صلي الاستخارة يمكن تطمئن نفسك أكثر..و الله ييسرك اللي فيه الخير

__________________