رد : مشكلتي مع زوجي ..!!
وبعدين اكتشفت انو هو قايل لأامي انو طفش من المشاكل معايا وانا مأزمتو في حياتو 
قلت له انا وعند اهلك مابينت شي قدامهم ابدا ونحن متفقين مشاكلنا محد يعرفها ونحلها بيننا تقوم انت تدخل امي وتقول طفشت من المشاكل .!! بعدين قال ليا ( طلع محد قادر عليا ) ورديت عليه وقلت له انا اطلع من النقاش احسن بوفر وقتي واذا مطفشتك روح اتزوج باللي تسعدك وتقدر عليها .!! لانو باين انو نحن مو متفقين في شي ابداً ومختلفين زي ماقلت لي ..!
قام اتصل مارديت ارسلت له انا تعبانه ومافيا اتكلم قالي ردي .. رديت وقا لي لمن اتصل تردي فاهمه وغصباً عني وكدا قلت راح اقفل قام عصب قال لي لو قفلتي راح تكبر واقول لأمك قلت انت يعني غلطان وكمان بتهددني بتحسب انك بتخوفني بأمي قلت اللي فيها فيها وهي اصلا كبرت المشاكل وانا بايعتها وقلت راح اقفل وقفلت
قام اتصل بأمي الساعه 2 او 3 الصباح وقال لها عن كل شي امي طبعا جاتني قلقانه وتقول زوجك كلمني ويبغاكي وقالتلي ايش في قلت ي امي مافي شي قالتلي قال لي عن كل شي ليش تقولي له اتزوج وليش انتي تفضلي صحباتك عنو وكدا قمت بكيت وقلت لها بس عن مشكله الصحبات وانو يغير كلامو كل شويا يحيرني معاه قالت خلاص انا اتفاهمت معاه واذا على الخروج وافق انك تخرجي
بعدها راسلني قال ليا اذا خرجتي راح تكبر المشكله اكبر واكبر ..!! ماقلت لأمي وسكت وماسرنا نكلم بعض بعدها بكم يوم استأذنت منو وقلت له بروح السوق قال لي لا قلت طيب بروح عن صحبتي قال ليا لا
ماقدرت وروحت اقول لأمي بروح عند صحبتي وانا قدي مخنوقه وطفشانه بس هو مانعني قالت انا كلمتوا وهو وافق قلت لها بعد ماكلمتيه راسلني وقال ليا مافي خروج ولابتكبر المشكله
امي زعلت واتصلت عليه واتفاهمت معاه برضو معند انو مايبغى صحبات ابداا ابداا قامت قالت طيب تعال بكرى واتفاهموا
جاء ولبست واتشيكت وكانت نيتي انو خلاص نتراضى , بس هو طبعا كان جاف وبديت اتكلم وقلت له كل شي
عندي
قالي صحباتك بحدد لك كم ساعه واذا ماردوا لك الزياره بتقطعي علاقتك فيهم
وانتي اصلا مابتلاقي زي لو تلفي الدنيا معيشك ومستتك لا اطلب منك طبخ ولاغسيل ولاتنضيف
بس انتي نكرتيني وجحدتيني كل افضالي عليكي وفضلتي صحباتك عليا وقام يدعي عليهم ويسبهم انهم السبب في خراب بيته
انا استغربت وقلت انا ماجحدتك زي انت ماجحدتني انت فهمت امي انو انا حتى بسمه ما ابتسمها في وجهك
قام صرخ وقال لي الا انتي جحدتيني عشان مين صحباتك الله يحرقهم ..!
قلت له شوف انت مين تماشي من اصحابك اللي يروحوا يخونوا زوجاتهم وتوصل لدرجه الزنى مع بنات صيع مو تجي تتكلم عن صحباتي بنات ناس ومحترمين وسمعتهم طيبة والحمدلله ( عصب زياده وكان بيجي يصفقني كف وقال لي صوني لسانك ولا بيوريني ( انا خفت على نفسي لايضربني صراحه )
وكملت وقلت له اذا على الغسيل والطبخ انت رافض وانا دايما اجي اقولك بسويلك وافعلك وانت ماتبغى
ابسط شيء طلبتوا منك بيت وانت ماتبغى تتحرك او تسوي شي
قال لي عندك شقه حقت ابويا تعيشي فيها قلت فين كلامك اول اصبري عليا بنبي فله على كيفنا ومن ذوقنا كل دا اتغير .!! قال لي دا اللي عندي ,
قمت عصبت وقلت له اذا تبغى حياتنا تمشي كده انا واللهي مو مناسبتك وانا ماراح اتناقش واتفاهم معاك واستنى امي لمن ترجع اذا حابب تتفاهم معاها والمشكله مو الصحبات ولا الخروجات المشكله في تفكيرك وعقلك انت وطلعت من المجلس
قام هو اتصل بأمي وقال لها واتصل على اخويا كمان واشتكاه مني
ودحين لينا كم يوم مانتكلم , ارسلت له وقلت خلاص لاتدخل بيننا احد يكفي سببت لي مشاكل مع اهلي
والبيت ابدأ عدل في الشقه وصلحها عشان بنقل فيها ان شاءالله واذا في شي ثاني عندك قول عشان نتفاهم عليه
قام طنشني ومارد عليا لحد اليوم
ايش اسوي معاه احس نفسي زي المعلقه كم مره افكر ارسلوا عشان نتكلم ونخلص من المشكله بس افكر واقول لا هو غلطان مره نفسي ماتهون عليا
ولا استنى هو لمن يرد عليا ..!!
امي زعلانه على حالي وقالت اتغير زوجك ماكان كدا فين الصوت الهادي دحين سار يوقف ويرد ويزعق امي منصدمه منو وقبلها كنت زعلانه مره وفكرت بالطلاق اعرف انوا المشكله تفاهه وماتحوج للطلاق بس انا احس خلاص كرهتو زياده وكسر فيا اشياء كثيره في نفسي واحس حياتي بتكون صعبه معاه
التعديل الأخير تم بواسطة نعومة السكين! ; 11-03-2014 الساعة 11:49 PM