السلام عليكم ورحمة الله و بركاته

متزوجة من 4 سنوات ولدي ابنة بعمر 3شهور .. انا وزوجي بنفس العمر (25 سنة) .. هو أكبر اخوانه و الباقي بنات ..
مشكلتي عدم تفاهمي مع زوجي .. هو يريد أن قال لا فيعني لا و خلصنا .. لا تسألي ليش ؟ ولا تناقشي الموضوع
و ان طلبت منه يسمحلي اروح لتجمع بنات او عرس زميلة لي .. على طول لا و مب ضروري ..

هو يحب اتم فالبيت و مااطلع .. يشوف طلعة مع زميلات المركز اللي كنت اشتغل فيه مب ضرورية ولا حضور مناسباتهن .. مع انه تكون كل 6 شهور او اكثر .

باختصار .. ما ياخذ و يعطي
طلبت منه اروح لاهلي .. وحده من صديقاتي بتروح مع اهلها و اريد اشوفها .. على طول رفض بدون ذكر مبرر .. مع انه فاضي و يقدر بس مزاج و يقول بوديج فيوم ثاني ....
هو يحرجني مع الناس و مع اهلي .. اكثر من مرة اهلي ينتظروني و بالاخير ما يوديني و ما يرد علي يخليني لاخر الوقت و يقول لا
اساله تاخر الوقت الساعه 2 بالليل وين كنت ؟ يقول مالج شغل

وقبل ما ارد من نفاسي استوا سوء فهم بينا على موضوع . لما رديت اناكنت زعلانة و انصدمت لما شفته هو زعلان بعد ... ما حبيت الشي ... ماحس في سبب يستاهل هالزعل غير انه الوقت مش مناسب ابدا ..
كان ممكن يتأجل الموضوع .. خصوصا انه يعرف اني طالعة من مرض و بعدني تعبانه ومش بتمام عافيتي .. هالشي حسسني اني مالي قيمة عنده و انه ما همه الا نفسه

ولو زعلت أو كنت مضايقه منه ما يصالحني أو يسوي لي سالفة .. يطنشني
مع العلم انه لو كنا مزاعلين .. يتم الوضع طبيعي بينا اخدمه نفس الايام العادية بس ما كلمه الا لشي ضروري .

حاليا ... جهزت اغراضي و ابا ارجع لاهلي و اذا يبا يردني يناقش الموضوع مع ابوي .. هالحل الوحيد اللي اشوفه مناسب و ممكن نطلع منه بفايدة

ابوه شاف الاغراض و تدخل بالموضوع وكلم ولده بس مااقتنع هو شايف انه على مزاجه لو قال لا خلاص يعني لا وخلصنا . ماعرف لو رد كلمه برع البيت .

وللحين تاركة اغراضي و اريد اروح لاهلي .. بس اللي مخوفني شوي و مااريده يصير .. هو اني اصدم زوجي فيني و علاقتنا تفتر بعد ماارجع ..

حاولت احل الموضوع بينا بس هو ما يتفهم ابدا .. و من الاول ما كنت اريد ادخل حد بينا او اني احطه او احط نفسي فموقف محرج

ارجو المساعدة و ابداء آاراءكم حول الموضوع