رد : مشكلتي مع رئيستي في العمل !
و أخيراً ..
اللي مأزمني :
اني احس ان شخصيتي كانت قوية واعرف انتصر و اخذ حقي واطبق حديث الرسول صلى الله عليه وسلم ( المؤمن القوي خير ..
لكن حالياً ما عدت المؤمن القوي
لما اشوف شخصيات قويه بالدوام تهاجم وتدافع عن حقها اموت حسره على نفسي لاني كنت مثلهم
لكن الحين ماني قادره
راتبي العالي صرت احس ان ودي احرقه و ماحس بفرحه وانجاز لما استلمه
لأني استلمه بعد مراره وسلسلة اهانات يومية يومية يومية من الوكيله بالذات والطاقم الاداري ككل
صرت افكر فيهم حتى بالبيت وحتى بالويكند وكلما قرب وقت الدوام اتوتر
صرت اكتم واكتم واكتم ( وقت الدوام ) واقابل كل شي بابتسامه وطولة بال
ولما اوصل البيت ( ابكي او اعصب من اي شي وكل شي )
ظلموني بالانذارات و دعيت على المديره لانها كانت تخاف من الهيئه الامريكيه على حسابي
والحين الهيئة الامريكيه شالتها من المؤسسه لانها لا تملك الكفاءه اللازمه
ظلموني ب أسلوب الصراخ والجفاف بالمعامله والاحتقار بالنظرات
( دايم افكر انا مسلمه ليش يعاملوني كذا )
( ليش يحاولون يغرسون بنفوس الطالبات قيم اخلاقيه عليا هم ما يطبقونها )
ضعت ضعت مابين المفاهيم والقيم الدينيه وبين نفسي
كيف أوفق بين حديث ( ان الناس شهود الله في ارضه )
وبين اني ارجع ادافع عن حقي و اكيد راح يكرهوني ويحطون بوجهي عقبات
انا ماهمتني العقبات
بس هل عادي يكرهوني ويشهدون لي بالسوء ؟؟
و اطلع وما اكون ذكرى حلوه ؟
و مثلا اذا توفيت وسمعوا خبر وفاتي يشتموني او او ؟
كيف اوفق بين هذا الحديث وبين خوفي من الله
طيب وكيف اوفق بين الآيه ( أذلة على المؤمنين )
( رحماء بينهم )
وبين الحديث ( المؤمن القوي )
كيف اصير قويه وبنفس الوقت ذليله للمؤمنين واكسب محبة الله سبحانه ؟
طيب اسم من اسماء الله العزيز
كيف اصير عزيزه وانا جالسه اتشرب الذل يوميا ؟
هل احتاج لإستشاره نفسيه او دينيه ( في العقيده ) او اجتماعيه او تربويه ؟
ماني عارفه لمين اتوجه
ملخبطتني الاحاديث والآيات واسماء الله الحسنى ماني عارفه كيف اسقطها على واقعي بشكل ممتاز
لأني اشوف نفسي جالسه اخسر كثير واموت يوميا الف موته !
انا اللي غير شخصيتي وخلاني اسكت ولخبط كياني كله
اني كنت قبل لا اتوظف ، بالجامعه شخصيه قويه ولها كلمتها و و
وكان ماعندي مانع اناقش عميده الجامعه اذا حسيت بأي ظلم وقع علي او على غيري
حتى اني طالبت اني اكون المتحدث الرسمي بشأن هموم طالبات الجامعه
كنت اتكلم بكل احترام و ادب و منطقيه
كانت العميده تحترمني
لكن باقي الطاقم كله يكيدون لي مكائد وماكنت مهتمه لاني كنت واثقه اني اسوي الشي الصح
ماحب اكون على الحياد ابد
الحق واضح والظلم واضح
واحب اني اكون دايم مع الحق
بالمقابل على نهاية اخر سنه جامعيه
كنت اعرف مجموعة بنات صالحات - احسبهم كذلك ولا ازكيهم على الله
اجتمعوا ب يوم وصاروا ينصحوني :
ما تعبتي من المشاكل ؟
خليك ساكته ؟
خليك من هالامور و ركزي بدراستك ؟
ماراح يتغير شي بالمجتمع مهما سويتي ؟
لو شفنا فايده تكلمنا قبلك ؟
راح تكونين ذكرى سيئه لهم ؟
ابوي بنفس اليوم كلمني وكانت القاصمه
نصحني بنفس الموضوع وكانت له نفس وجهة نظر صديقاتي
قلت خلاص ( الرسول قال لاتجتمع امتي على ضلاله )
يمكن هم الصح وانا الغلط
وصرت ساكته اشوف الظلم اشوف الغش اشوف الكذب
ما اتكلم ما ادافع ما اواجه ما اصارح ( بأدب و احترام )
سكتت سكتت سكتت الين تخرجت
وانكسرت اشياء بداخلي
احساسي ان مالي قيمه حاليا واني صفر بهالحياه مو قادر يفرقني
احساسي باللخبطه بين كلامهم وقناعة ابوي والاحاديث والايات القرآنيه
وفطرتي وضميري اللي يتقطعون لما يشوفون شي غلط
احب اصلح احب اغير بالكره الارضيه
احب اكون شي حي له ضمير و احساس
كلما حاولت ارجع نفس اول القى من يحاربني بهالمفاهيم :
راح تكونين ذكرى سيئه
كوني افضل و ارقى
طنشي وتغافلي
عيشي لا لك ولا عليك
..
انا ياجماعه فبداية العشرين
وشعري الحين صار يغزوه الشيب من كثر ما افكر بهالأمر
الحين انا مظلومة حديثا من ناحية تقييمي الوظيفي
نقصتني الوكيله على امور انا مسويتها وما ابخستها حقها واديتها باتقان
ودي اناقشها بس اقول بنفسي ب تهينني وتكسرني اكثر
ومدري يمكن لو اصارحها و ارجع لقوتي اصير ذمرى سيئه وتشهد لي بالشر بعد موتي
عندي لخبطة قناعات
انا مظلومه راتبي اخذوا منه بغير وجه حق
وبطريقه تخالف ما وقعت انا عليه في العقد
ودي اتكلم واقول ليشش !!
بس مو قادره !
تجي فبالي صورة صديقاتي و ابوي
وخالي و و و ناس كثيرررررررر لهم نفس التوجه : اسكتي و مشي و بلا مشاكل وكل الدنيا كذا
طيب الحين بداخلي رغبه قوية بالانتقام
لانهم مهمشيني \ حتى انتقامي احسه عنده اخلاق و ذوق
ابغى بس اقدم استقالتي بنصف السنه عشان يتعبون لين يلقون بديل
ابي يتعبببببببببببببببببببببببببببببون !!
ابي يحسون بقيمتي
طيب الحين الوكيله لما تقل ادبها علي
هل اقدر ارد عليها بطريقه تخليها تتأدب
وهل هذا مايتعارض مع اخلاقيات احترام الكبير اللي نص عليها الاسلام ؟
طيب كيف ارفض الشغل الزايد اللي يكلفوني فيه ؟
لاني قد كلمتهم بأدب انه هذا مو من مهامي ؟ ويطنشون ويستعبطون
ويسوون معاي طرق ملتويه او يحرجوني ؟
لو رفضت بطريقه حاده شوي و خففت من الادب
راح اعرف ان كل شي بينهار وبيصيرون ضدي كلهم
الناس في مؤسستي فئتين
الخانعه الخاضعه ( اللي ميت احساسها )
الخانعه الخاضعه ( اللي ميته قهر من داخلها ) و انا منهم
الخانعه الخاضعه ( اللي لما يصير موقف يمس الكرامه تستنكر بأدب ) وهذي انا مرات .. وهالفئة تلقى اللامبالاه وعدم الاكتراث باعتراضاتها لانها مؤدبه اساسا
العاديه ( اللي لو صار موقف يمس الكرامه تستنكر ب حزم ) هذي شخصيتي الاساسيه اللي احن لها .. وهالفئة قليله وتكاد تكون نادره .. وهي اكثر فئة تلقى انواع الظلم والانذارات والتحقيقات والتطفيش والاهانات والكذب والافتراء وكل شي بشع بهالحياه .. الين يدفعونها دفع للاستقاله في مدة وجيزه
انا ماعندي مانع اصير من الفئه الاخيره
بس ابغى احد يعالج لي قناعاتي الدينيه ولخبطتي فيها
مابي اتصرف بتصرف يناقض عقيدتي او احس بالذنب عليه
ابي اكون مرتاحه من كل النواحي
طيب وعندي استفسار بعد ..
هل صحيح ان الانسان يستقيل اذا واجه مسؤول صعب المراس ؟
ولا لازم يصبر حتى لو صبر سنه والنفسيه صارت بالحضيض ؟
وهل العيب مني ولا منهم ؟
وهل الانسان المحترم يفرض احترامه ؟
وكيف اتعامل مع هالنوعيات بطريقه تريح بالي وترضي الله وماتحسسني اني مهانة ؟
ربما انتهيت !!
و ربما اعود .. ربما لما في القلب بقيه
اتوق لمعرفه ارائكم والاستماع لنصائحكم