رد : (مميز) زوجة معدد؟ ...... تفضلي
السلام عليكم ورحمة الله وبركاته،
أدري انك ما تحب الحوار الطويل والكلام الكثير .. وادري اني ما بقدر امسك نفسي وانا اكلمك .. وفي النهاية انت بتتضايق وما راح تسمع مني .. فالكتابة يمكن تكون أفضل.
قبل كل شي اعترف انك ريال والنعم فيك .. ما عمري شفت منك شي .. وما عمرك قصرت معاي .. عيّشتني عيشة حلوة وعززتني وأكرمتني .. جزاك الله خير.
ويمكن هذا كان أهم سبب .. مع عيالي طبعاً.
طول السنة ونص اللي طافت وأنا أحاول أصبر .. وأتعوذ من ابليس .. وأقول بلاش غيرة حريم وقلة عقل.
طول السنة ونص وأنا اسوي نفسي مب شايفة أي شي يقول ان بالك مع غيري .. وان مشاعرك مع غيري .. وان جزء من حياتك مع غيري.
طول السنة ونص وانا ادعي ربي ان يرفع عني هذا هالهم
كان ممكن أستمر في الصبر ما دام كل شي بعيد .. لكن تييبها لين هني؟! هذا وايد علي ... والله وايد.
ما راح اقدر اعترض .. ولا راح اقدر اقول لك ليش سويت جذي .. لكن واضح انك تباها تدخل حياتنا .. من حقك بس أنا ما أقدر اتحمل هالشي.
اللي صار البارحة معناه انك تحبها وايد .. وما راح اقدر اعاتبك على هالشي لان الحب بيد رب العالمين .. لكن وجودي خلاص ماله داعي والأفضل انك تطلقني وتعيش حياتك معاها بشكل طبيعي .. وتحصل الحب والسعادة اللي انت محتاجهم معاها.
بخصوص اليهال .. انا أكيد ابا عيالي معاي .. ومب حابة انهم يطلعون من الشارقة .. فإذا حبيت تخليني معاهم هني في البيت فكثر الله خيرك .. وإذا كان لك راي ثاني وشفت انك انت وحرمتك تقدرون تراعونهم وتديرون بالكم منهم فما راح اقدر اقول شي .. بس أمانة عليك تخليهم في مدرستهم .. وشما تدخلها حضانة الويس جرين.
لكن اذا سألتني عن اللي انا اباه .. فأنا اتمنى ان عيالي يكونون معاي .. على الأقل وهم معاي باقدر اطلب لي بيت من الحكومة يشيلني ويشيلهم .. لاني ما ابا اعيش مع حد من اخواني لأسباب خاصة فيني .. بس اذا ممكن يكون كل هذا عقب الصيف لاني ابا اعلم شما الحمام.
وسامحني اذا كان مني قصور .. مع اني والله العظيم ما ادري لين الحين انا في شو قصرت بالضبط .. وسامحني إن ما قدرت اخليك تحبني مثل ما كنت أتمنى.
.
.
.
هذه رسالتي له.
__________________
اللهم طِيبَ الأثر .. وحُسْنَ الرحيل.