اختي ام سلطان....انا متابعتنج من زمااااان واعتقد من كثر تأثري بقصتج انحطيت في نفس الظروف ...بس مع اختلاف عمر الزواج ونوعية الزوج وشوية تفاصيل
من كثر موضوعج ما يعنيني صرت انسى ادعي لنفسي وصرت ادعيلج...ليش لاني اخاف اكون انا نسختج ....بينا اشياء وايد مشتركه في الشخصيه ...بطريقه انتي ماتتخيلينها.....ماقلتلج اني نسختج


عشت المج والمي ....بس انا مااقدر استشير او اتكلم مع حد.....اكتفي اني احتفظ لنفسي بكل جرعات الالم...



ماعندي نصيحه جاهزه ...بس لاني فاهمه نوعية ريلج عدل..هو مميز وزين وياج لانج انتي زينه وياه بس متى ماعبرتي او جلبتي الطاوله عليه ...بيطنش وبيعيش حياة الفراغ ...


بما انج وصلتي لنقطة اللاعوده ..خبريه بكل خطأ وكل مصيبه اكتشفتيها وتغافلتي عنها....عريه بأغلاطه جدام نفسه بس عشان يعرف حجم معاناتج وصبرج...

اذا قدرتي تبعدين كم يوم يوم بيي ويحس بفراغ البيت بدونج وبدون عيالج اطلعي،ادري انج متعلقه في بيتج وفي حياتج ...بس ساعات الرياييل يبالهم طراق حااار ينششهم من حالة النشوه السخيفه اللي عايشينها.

نصيحتي الاخيره.....ادعي ربج اني يرضى عنج ويرضيج...ادعيه بكل حراره ومن قلبج لله
ابتلاءنا دايما بالاشياء اللي نحبها ونخاف نفقدها،وربنا يبغي الحب والاخلاص وفراغ القلب له لانه هو خالقنا



ماتدرين يمكن الامواج اللي ترتفع في سفينة حياتج ربج رايدلج فيها خير ...وعسى ان تكرهوا شيئا وهو خير لكم..



اخيراً
خلي في لسانج هالدعاء

اللهم اني وكلتج امري فكن لي خير وكيل...ودبر لي امري فإني لا احسن التدبير...


وخلاص سلمي امرج لله وبشوفين كل مايسعدج

__________________
لا تحرص على إكتشاف الآخرين أكثر من اللازم ، الأفضل أن تكتفي بالخير الذي يظهرونه في وجهك دائماً ، واترك الخفايا لرب العباد .
لو اطْلَعَ الناس على مآ في قلوب البعض لمآ تصآفحوا إلا بالسيوف "