المشاركة الأصلية كتبت بواسطة أم خآلد

أنا أكبر من زوجي بسنه!

وماتتخيل شكثر فخور فيني وفرحان يوم الملكه والعرس

وعلى فكره أنا الي كنت رافضه لأنه صغير وهو الي كان مصرّ .. وقلت له بكل صراحه بعد العرس انا لو ماتزوجتك كان ندمت ندم كبير!!

وما اخجل من هالشيّ بالعكس دايم امزح اقول له لازم تسمع كلامي..!!

ياناس.. العمر مجرد ارقام على ورق

بالنسبه للتفكير فإن النضج بتفاوت من شخص لشخص أحيان شاب عمره 19 سنه يكون أنضج وأعقل من رجل عمره 45

والشكل ماله علاقه بالسنّ.. ياما بنات على 14 و15 واشكالهم فووق ال30

وحريم في الاربعين وأشكالهم في العشرين!

بالنسبه لمسئله الانجاب .. هذا فعلاً قد يكون عامل العمر كبير فيه.. لكن لو تفكرت شويّ.. الانجاب هذا من امر ربي

وياما عرسان صغار في اول العشرين ويقعدون بالعشر والعشرين سنه ويمكن طول الحياه بدون أطفال

والله أنا خالي تزوج وحده أكبر منه بكذا سنه في نص الثلاثين وهو في آخر العشرين بس!! وماشاء الله الحين عنده 5 أولاد وبنت الله يحفظهم.

يمكن هم أخطأوا بالكذب.. وأعتقد كما وضح لي من كلامك أن الي همك هو كذبهم عليك وليس العمر

لكن هل فكرت أن البنت يمكن مالها ذنب؟

يمكن ماتعرف شيّ عن الي حصل؟

وبعدين أختك ليش ماسئلت عن عمرها بما أن الموضوع يهمك وهذا شيّ راجع لك

منعاً للإحراج يعني وجرح مشاعر البنت مسكينه؟

أنا أخوي أدور له حالياً حاطه ثنتين في بالي وربي اسئل عليهم بشكل جنوني

مع أني أعرفهم .... ولكن سئلت عن كل شي ممكن تتخيله حتى عن فرد فرد من أهلهم

وقعدت أقارن بين ميول أخوي و شخصياتهم وايش راح يصلح له هو..

وللحين أستخير وأفكر

العمر شيّ واضح كان بالسهل جداً تعرفه قبل تخطب حتى

الي حصل حصل إن شاء الله يكون خير لك يارب.. ولكن ليش كتبت الموضوع؟

يعني ايش الي متعبك بالضبط؟ اكيد ماكتبته إلا في شيّ متعبك ومألمك أو متردد بشيّ