السلام عليكم ورحمة الله وبركاته

انا انسان متزوج صارلي تقريبا اقل من سنتين بكم شهر وعندي ولد عمره سنه. انا مشكلتي مع زوجتي قديمة من ايام الملكة لا ادري هل هو طبع او مرض نفسي. من ايام الملكة وخلال فترة التواصل. بدر منها بعض التصرفات اللي تبين رغبتها في التحكم في حياتنا وفي حياتي خاصة والمشكلة في حالة عدم تلبيه رغبتها تقلب الدنيا نكد. طبعا تزوجنا وخلال شهر العسل خارج المملكة سوت لي مشاكل كثير حيث انها كانت تسوي من الحبه قبه بحيث اي خطا يبدر مني تقلبه نكد علي وتطنشني وترد الكلمة بعشر . وقتها قلت شكلها ماتعرف التعامل وانا بصراحه بداية الزواج كنت عصبي ولكن بعدها صرت اتحكم بعصبيتي ولا تظهر الا نادرا. طبعا مشت الحياة وكان يصير مشاكل بيننا وسبحان الله ماتصير المشاكل الا بساعات البسطه يعني اكون امشيها او مسافرين بمدينة ما نتمشى فيها تقوم يطلع فيها عرق المشاكل والصراخ والسب بسبب اي شي اسويه مايعجبها او اي طلب تبيه مايعجبها. مثال نكون نتمشى من عشا لين فجر ويوم بنرجع البيت تقول بس؟؟هذي التمشية؟ اللي يلعن ابوها عيشه وتبدا تسب وتلعن واذا ماسبت اقل شي تبين انها معصبه وتتجاهلني هذا برغم اني خلال التمشيه شريت لها شي وعشيتها وكل شي. زي ماقلت هي مبين تبغى تسيطر فصارت تبي تتحكم بكل شي. لاتطقطق بالجوال. لاتطلع مع اخوياك. حتى وهي عن اهلها واكون طالع مع اخوياي تعصب تبيني ماقابل احد او اقل شي تبين ان هذا الشي مو عاجبها. مرت الدنيا وصار مشكلة كبيرة بيني وبينها بسبب انها تفتكر ان اي طلب لها لازم يتنفذ مع العصبيه ونرفزتها الشديدة لي حيث ان من ابرز سماتها انه اذا ارتفع ظغطها تحاول ترفع ظغطي باي وسيلة حتى لو بالسب واللعن انا اتنرفزت ورميت طلقتين ولا هجدت وزاد ثورانها كلمت ابوها جا اخذها وطلع عندها كسل بالغدة وقالو انه يسبب عصبيه زايدة. قعدت شهرين تعالجت ورجعت افضل من اول لكن طبع التحكم فيه بدرجة خفيفة وقعد على مدى شهور يزيد لين رجعت زي اول واخرها مشكلة صارت امس تبغاني اطلع السوق وامشي معها بدون امسك جوالي او اتكي بكوفي تقول انت امش معي وانت ساكت. طبعا ماراعت ظروفي المادية اللي دايم توعدني انها توفر واذا رحنا السوق ينقلب كلامها. وقرارتها دايم متضاربة يعني نتفق على شي باخر لحظة تغير رايها وتحملني الخطا اذا رفضت

انا مادري هل اعالجها نفسيا او استشارة اسرية او ماذا
زوجتي مهتمة ببيتها وفيني وتطبخ وتنفخ وكل شي لكن تصرفاتها المذكورة اعلاه هي اللي مخربة حياتنا. للمعلومية احيانا تعصب حتى عالولد وتضربه على خفيف اذا قعد يبكي ومانام.
من السب والاهانت اللي تقولها لي. الله يلعنك يابن الكلب ادعس عليك ..الخ

اكيد بتقولن ليه ساكت . اول شي انا احبها وحاولت معها بجميع الاساليب وانا طيب واحاول ارضيها دايم

(تم التعديل ليتناسب مع المضمون)