ماشاء الله صفحتين تبريكات
الله يسعدكم ويبارك فيكم
اعذروني ما اقدر ارد على كل عضو
بس تكفي فرحتكم.. الله يحفظكم


انا قلت له اذا رجعت احتاج شهور حتى انسى
يعني الامور ماراح تنحل في يوم وليله
وفي داخلي شغلات كثيره تغيرت
حسيت اني اشقيت نفسي بدل لا اسعدها
وتأكدت ان سعادتي مفتاحها بيدي انا
وان الزوج احيانا يكون مجرد ابتلاء من ربي
حسيت نفسي كنت سلبيه وناقده معظم الوقت
حتى بدون ما اتكلم.. بداخلي انقد عليه
واشوف الجانب السيء من اي تصرف هو يعمله
انا ماكنت كذا.. لكن من تراكمات ومشاكل معه
واكتشفت ان الدنيا ما تستاهل كل هالحروب
وان الانسان اللي يطنش هو المرتاح
يعني زي مايقولون: الحساس مايعيش
مع ذلك ماكنت مستعده ابدا اتنازل له
كنت حاطه ببالي حتى لو ارجع بعد العيد
اهم شي يندم ويعتذر قدامي وقدام اهلي وقدام امه
واتمنى انه استوعب ان الجرح سهل لكن اصلاح صعب
ولا يجبرني ارجع لكم وازعجكم بمشكله جديده هههه

انا مقرره اسجل في دورات بعد العيد لي وله
عن الحياه الزوجيه وثقافتها واسلوب التعامل الخ
والحمدلله في دورات كثيره كل شهر تنعمل
اما اهل زوجي فهو يقول ان الموضوع عند امه بس
وانا مو مقتنعه بهالنقطه هذي تحديدا
لكن كل حاجه مسيرها تبين مع الوقت

بيني وبينكم انا كان مالي نفس اي شي
والاكتئاب طلع حبوب في وجهي ولوني صار شاحب
ماكان لي رغبه في العيد نفسه.. لكن اكابر
لاني متعوده كل عيد اجهز اغراض وحلويات قبلها باسبوع
واعمل نيولوك واتحمس واعمل هوليله
لكن هالسنه كان خاطري مكسوووور
حتى من يومين امي اخذتني معها وهي تشري اغراض البيت
وانا كنت اشوف صحون واطباق مره حلوه
واقول في خاطري لو عندي بيت كان شريتهم.. الحين خلاص
واذا طلعت للمول واشوف زوج وزوجته مع بيبي بالعربه
اقول: يا رب اربط على قلبي

شغلات كثيره
بس ماقلت لاي احد عنها
كنت متضايقه بس متماسكه
واحاول ابين لاهلي ان كرامتي اهم
لكن هم يشوفون الحزن اكيد بعيوني
ويمكن اكثر شي ركزت عليه اخر الايام
هو الدعاء.. دعيت ربي بكل وقت
ان يفرج كربتي ويكتب لي الخير
وتحريت اوقات الاستجابه
مثل مانصحوني الاعضاء جزاهم الله خير