جزاكم الله خير على تفاعلكم الطيب
لكن عودتي صعبه جدا مع الاسف
لاني حاليا مثل العريانه عند اهلي واهله
نشر الغسيل اللي صار متعب نفسيتي
هو كانت غلطته فادحه لما شوه سمعتي عند امه
وكبرت القصه وعرفوا كل اهله بخلافنا
وصارت علاقتي متوتره مع اهله
وعلاقة اهلي صارت متوتره مع اهله
وهو نفسه صارت علاقته متوتره مع اهلي
لمجرد لحظه غضب كان فيها ودمر اشياء كثيره
والشرخ زاد مع الوقت.. وكرهني حياتي
حتى اخواني احس اني خجلانه منهم
رغم انهم ماسألوني.. بس حالي واضح
ومالي رغبه اشوف اي احد من طرف زوجي
على قد ماكنت ازورهم بثقه وراسي مرفوع
وامثل اني اسعد زوجه واني مستوره ببيتي
على قد ما انكسرت وصرت مو قادره اشوف احد منهم

اللي يقرا كلامي ياليت يتعظ بحالي
والله العظيم ان ادخال الاهل بالمشاكل يهد الاسره
ويزعزع استقرارها ويهد كل شي فيها
يصير بيت مثل الزجاج.. الكل يطل فيه
وانا لما عملها زوجي معي اول مره.. تعبت
وكانت امه بكل اتصال تسأل عن احوالنا بتطفل
وبقيت فتره طويله اعاني من ترسبات اللي صار
ومع ذلك سامحته.. وجلست ببيته وسكت
وكانت القصه محصوره بينا احنا الثلاثه بس
لكن بعد تكرارها اضطريت اترك البيت
لانه للاسف ما قدر تسامحي وصبري على تهوره
و دخلت اطراف كثيره.. والكل صار يفتي بحياتي
فضحنا وعرانا وكسر هيبتنا واحترامنا عند الكل


بعض الامور مايفيد فيها الاعتذار
لان فيه كسور كثيره صعب تتصلح
وانا بصراحه خايفه من الطلاق
بنفس الوقت قرفانه من اللي صار والحياه معه
كرهت اشوف اهله رغم ان مالهم ذنب.. لكن بسببه
احس اننا صرنا اسره زباله مالنا اي قيمه
لا انا ولا هو ولا البنت الضايعه بينا

هو هز صورتي قدام الناس بما فيهم اهلي
اللي احرجني بفعايله قدامهم
وهز صورتي تجاهه هو بيته واهله وعالمه
كل هالاشياء تقتلني وتتعبني
لما الكل يشوف كيف بيتي منهار
ويسمع هي ايش قالت وهو ايش قال
خصوصا ان ام زوجي رغم طيبتها
الا انها تحكي كل شي لاخواتها
واخواتها اكيد يبلغون بناتهم وكبرت القصه
مع بهارات وتأليف

كانوا متعودين كل جمعه يرسلون رسايل وادعيه
هذي الجمعه ولا احد ارسل لي اي شي ابدا
وطول ما انا عند اهلي قطعوا اهل زوجي تواصلهم معي
حتى بنات خاله زوجي اللي كانوا كل يومين يراسلوني
ما ادري عنهم من مده طويله
واصلهم خبر خلافي مع زوجي بالتاكيد
وقطعوا علاقتي معهم.. شي يقرف ويحزن
ولاعندي رغبه ابدا اتواصل مع ناس بهالشكل
رغم اني متاكده ياما يصير بينهم وبين ازواجهم مشاكل
لكن ما ادري عنها ابدا


حتى والدي لما كلمني امس
قال ان زوجي شخص مو سيء
لكنه ما يحسن التصرف ولايقدر يسيطر على انفعالاته
هذا الشي شاغل بالي
هل هذا العيب مبرر للانفصال او لا

اما موضوع العودة بشروط ف متعبني
لاني ياما وضعت شروط بالنسبه للمسجد وغيره
يلتزم فتره بعدين يرجع زي ماكان
لحد ما يأست منه وقلت بكيفه ربي راح يحاسبه
انا محتاجه شروط تخصني انا
غير الماديات والفلوس لانها والله ماتعنيني
فكرت اطلب اغير البيت واسكن جنب اهلي
ومنها يعرفون اهله اني منتصره مو مهزومه ومذلوله
لكن اشك انه بيوافق عالشرط لانه لسى مجدد البيت
فكرت اطلب نسافر برا
لكن المشكله احنا برمضان الان
واخاف بكرا يمن ويعايرني بهذي السفره
كرهت سفراته من كثر ما عايرني فيها خصوصا عند امه

انا اسفه تعبتكم كثير معي الفتره الماضية
لكني جالسه افكر الان بصوت عالي
بصوت زوجه تعبانه ومكسوره ومو عارفه كيف تتصرف

انا اذا برجع ابغى ارجع وراسي مرفوع
خصوصا قدام امه واهله اللي فضحني عندهم
ابغى ارجع بكرامتي وعزه نفسي
بدون نظرات تطفل او شفقه من احد
هذا الشي مو عارفه كيف ممكن يصير