بإذن الله تعالى .. اللهم يسر أمري وفرج همي ياكريم
والله يسعدك دنيا وآخره كلامك مريح جدا .
وأنا والله أحاول ما أقارن نفسي بأحد بس يكسر نفسي لما خواتي يجتمعون لزيارة وحده من العايله توها والده او طالعه من عمليه او حادث ويكلموني عشان أروح معهم وما أقدر .. أحيانا اكلمه ويرفض واعتذر منهم واتحجج بأي شي واحيان كثييييييييره اعتذر من نفسي لأني صرت أحس بالذل اذا طلبته ورفض ..
هو الحمد لله ماعمره رفع يده علي ولا قد حصل ان نقاشاتنا توصل للصراخ ﻷني هادئه جدا واذا حسيته بدا يرفع نبرة الصوت ابدا امتص غضبه وفي هذي المرحله يطنشني ويسحب علي حتى اراضيه انا واستسلم للي يبيه.
حابه أوضح نقطه عني قبل الزواج كنت قياديه واخواني الذكور انا اللي اعطيهم التعليمات ف الروحه والجيه وادارة البيت كنت انا اللي ماسكه زمام الامور في كل شي وكنت ازور الكل ومحبوبه من الكل .. عشان كذا افتقدت هالأشياء كثيييييير والكل صار يعاتب عدم زيارتي وانا ما اقدر اقول لأحد ان زوجي مانعني .. خاصة اني تزوجت هالانسان رغم معارضة الأغلبيه وأحس لو تفوح مشاكلنا راح ألقى شماته من العيار الثقيل ..
وبالنسبه لطيبتي وطاعتي هو فعلا دايم يقول انها اكثر شي يحبه فيني والحمد لله
وعايلته جدا رائعين ويحبوني واحبهم من كل قلبي .
طبعا الزيارات لأهله دائمه وهو يكون مبسوط ع الاخر نروح عند اهله وخواله وخواته عادي ما يعترض ولا يرفض اذا صار عند احد من قرايبه مناسبه نروح حتى لو بدون مناسبه .. بس لا صارت الزيارات لقرايبي ينعفس مزاجه ويتكدر ويتضايق