أنا الزوجة الثانيه من كم شهر .
وللآن التهم النصائح التهام وأحاول أخذ باللي يناسب شخصية زوجي ..
بالنسبة للسيارة طلب مني مره اني استعد لأننا حنسافر مع بعض علشان بيسوي لي بطاقة أحوال مع زوجته وبناته
طبعا رفضت .. وحاول فيني وقال زوجتي موافقه تطلع ورا معاك وولدي يجلس قدام ورفضت وحجز لي بالطيارة وقبل السفر قال لي انه زوجته تبغى تشوفني بمقر الأحوال هناك .. قلت له ما بروح وكنسلت السفرة كلها ..
عزمتني ع العشا ورفضت ..
انا ما ابغى يكون ليا علاقه الا بزوجي وأولاده ماعندي مشكله فيهم بس زوجته بدري عليا الان أتعرف عليها..
انا الان كل همي اعرف زوجي وطباعه وادرسها وأخذ حقوقي مع عدم تقصيري بواجباته..
وانتِ ع حسب شخصيتك اذا شايفه انه علاقتك بزوجته ما راح تصدع رأسك فالأمر راجع لك ..

انا قرأت نصائح الأخوات هنا واستفدت بالذات من ام الدانه لآني بمرحلة احتاج فيها اني اقوّم نفسي واتحسن لأجل نفسي ولأجل ارضي زوجي ..،

اتركي الأمور تسير باللي كاتبه ربي وانتِ خلّي كل اهتمامك زوجك وكيف تكسبيه بغض النظر انتِ زوجه ثانيه او عاشره.
تدري !
كنت أقول أصلا انا متزوجه لأجل الزواج وبس بسبب ظروف مريت فيها وقلت بيني وبين نفسي ما راح اهتم له ولا أغار منها ان جا اهلن وسهلن وان راح سهل الله دربه وأني ابغى أطفال واتوظف واعيش حياتي الاجتماعيه وارضي ربي وخلّصنا..
بس والله خايفه اكون مو قد اني اكون زوجه ثانيه.. الامر مو سهل بالذات لما تكبر مشاعر له بداخلك.. او لما يجيب لك سيرتها..

أوقات أقول ابغاه يجلس عندي يومين وانا ان حاولت فيه يسويها بس والله أتراجع وأقول خافي ربك يا بنت لا تدعي عليك الادميه بالذات انه بهالتصرف ظلم لها..
لذلك انتبهي تظلميها حتى لو بتعليق عليها والأفضل تأجلي علاقتك فيها لأنك مصيرك تشوفيها ..

ادخلي التجربة بقوة قلب وبرّدي أعصابك واهتمي للأمر اللي ناقص زوجك وتزوجك لأجله وبكذا تعيشي لان هذا الهدف اللي جالسه أسعى له.. أسعى اني أوسع بالي واعيش براحة واستقرار بغض النظر عن الأشياء الثانيه.

ربي يوفقك ويسعدك وتعيشي حياة اجمل من كل التوقعات ..