المشاركة الأصلية كتبت بواسطة mimomea

الله يسعدك ويحلي ايامك اخت مهرة على الموضوع الحلو متلك
بالنسبة الي كوني اصبحت ام هيي نعمة من رب العالمين خلاني شوف ماما فيني من خلال تجربتي وخلاني حس بطعمة حنانها و وعظمة تضحياتها وحمل المسؤولية كرمال اطفالها
خلاني استشعر شو يعني ام اللي مجلدات ما بيوفي وصف هالكلمة ولا الاحساس اللي بنحسو وقت نصير امهات


انجازاتي والحمدلله حاولت وعم حاول ورح ضل حاول انو كون قد هالمسؤولية واستاهل كلمة ام

الله يخلي اطفال الامهات وامهات الجميع بحس اني بشوف حالي بكل انجاز بيبدع فيه احد اطفالي
بحاول انو اتعلم وتطور من نفسي كرمالهن
من اولوياتي اني كون الام بمطارح والصديقة بمطارح اخرى
اوقات بنجح او بحس بالتقصير ومريت بظروف قصرت بحق اولادي بس الحمدلله على نعم الله انو مرحلة ومرت وعم حاول عوضهن عن التقصير اللي صار
والحمدلله قايمة باغلب مهماتي مع اطفالي من مشاركتهن هواياتهن وزرع المبادئ والقيم والانسانية بداخلهن وتقوية الوازع الديني بطريقة مباشرة وغير مباشرة ليوصل الطفل لمرحلة عنده علاقة ورابط قوي بينه وبين ربه مش لانو اهلو بدن ياه يكون متدين
الحمدلله نجحت انو خلي كل طفل يعتمد على نفسه وما يكون اتكالي وانو الحياة مشاركة مش اتكالية وانو ابني يساعدني باعمال المنزل متل ما اختو بتساعد والكل يشارك بكل روح رياضية ومحبة للعمل اللي عم يقوم فيه

ونجحت انو اطفالي يحترموا شي اسمو خصوصية ومداراة ظروف الاشخاص اللي عايشين معهن او خارج المنزل على سبيل المثال انو يكون الي وقت راحة من دون ازعاج وانو لازم دلع نفسي لاقدر دلعهن وحب نفسي لاعطين حب مضاعب
زرعت فيهن انو دايما يشكروا ربهن عالنعمة اللي عندهن وينظروا الى الاقل منهن ليزيد شكرهن لربهن عالاشياء اللي بيملكوها او المتوفرة لديهم
بنتي بعمر الاربع سنوات ونصف بتردد على كل وجبة طعام انها بتشكر ربها عالنعمة وبتطلب انو ما يخلي اي انسان جوعان او عطشان
عم ارزع بداخلهن القناعة من الصغيرة للكبيرة
واهم نقطة عندي الانسانية ما يفرقوا بين الناس ان كان لدينها او لمذهبها او للون بشرتها او لمركزهن الاجتماعي المفروض يتعاملوا بانسانية مع كل شخص بيحترمهن مع كل شخص ما بيلغي افكارهن مع كل شخص بيحترم معتقداتهن
عم حاول على قدر استطاعتي اني اعطتي اولادي حقهن واعطي نفسي حقها
واللي بساعدني على بعض الامور المدرسة اللي عم يدرسوا فيهن صحيح ما في وازع ديني وهالشي من مسؤوليتي ومسؤولية زوجي بس بالمدرسة بيتعلموا الصدق واحترام الصغير والكبير وانو الناس سواسية وحس المسؤولية لانه من ضمن التعليم الولد بيتعلم الطبخ والخياطة وتنظيف الاعمال المنزلية وما في تفرقة بين البنت والولد الكل بيقوم بنفس المهام وبيخدم نفسه ومسألة العقاب والمكافأة هالشي المدرسة بتعلب دور كبير فيه وانا دوري كمل هالشي بالبيت
وبيقى دور الام باعطاء الحنان وعلاقة الام بطفلها علاقة لا تشبه اي علاقة
احترامي