ياعمري إنتي

تدرين حبيبتي أنا عشت أسوأ من إللي عشتيه وأقولك إياها وإن كانت صعبه لاتثقين فيه

وحطي في بالك كل الإحتمالات .. قالها لك حتى لو فكر فهو بياخذ مسيار ولو أخذ مسيار صعب تعرفين

أنا ماأحرضك عليه لكن خليك متوقعه الأسوأ وعيشي اللحظه عيشي حياتك وكل شي خليه بوقته

أنا طليقي معدد و مزواج من أول أسبوع وهو ماعنده إلا ثلاث مواضيع
1- الزواج >> يتزوج الثالثه
2- الطلاق >> يطلقني
3 المقارنه بيني وبين زوجته أو طليقاته وكان يخص وحده منهم لأنها كا شكل عاجبته وجايه زي مايبي وكان يقارن بيني وبين قريباته وبين إللي يطلعون بالتلفزيون وإللي يمشون بالشارع وطبعاً كان يشوفهم أفضل مني بكل شي

مع العلم إني ماأقرب له ولا هو مجبور علي وشافني شوفه شرعيه وكل إللي يقوله لي يقوله من دون مناسبه أوقات إذا جينا ننام و أوقات وإحنا نتفرج ع التلفزيون أو نسولف عادي ومالنا من الشيطان طاري يعني ماينقال هالكلام بوقت زعل

أنا الحمدلله من فضل الله علي ثقتي بنفسي عاليه جداً كل هالأشياء إللي كان يسويها ماكانت تهمني

إن قالي بتزوج عطيته ذيك الإبتسامه العريضه وقلت له الله معك والقلب داعي لك هاذا الباب مفتوح
وإن قالي بطلقك أسكت ماأرد عليه كنت أبيها تجي منه بس للأسف أضطريت بالنهايه أخلعه ولا شاف مني ريال لأني تنازلت عن مؤخري
وإن بدأ يقارن بيني وبين فلانه وعلانه أطالع التلفزيون أو ألعب بسلسالي أو أسوي أي شي كأن محد يتكلم طبعاً ينهبل إذا شافني كذا أو أعطيه ذيك النظره من دون أي كلمه وقتها يسكت
ولما يشوفني إني بجد وصلت حدي يبدأ يراضيني ويقولي أنا بس بستفزك إنتي واثقه من نفسك كثير!!


دائماً أقول أي علاقه إنسانيه لو فُقد فيها الإحترام ماعاد فيه معنى لأي شي ثاني
لما الزوج يتكلم لزوجته عن رغبته بمعاشرة إمرأه أخرى هاذي قلّة إحترام
سواء المعاشره هاذي بالزواج أو علاقه محرّمه أو حتى بالخيال
ولو قارن بينها وبين أي أحد ثاني هاذا تقليل من شأن زوجته وتقليل من إحترامها

الحب وحده لايكفي


عارفه قد أيش صعب تعيشين مع شخص مو ماليه عينه ويذكرك بهالشي دائماً سواءً مزح أو جد
ماراح تحسين بالأمان معه أبداً

نصيحتي لك حالياً تأكدي من موضوع سفره ولو مستقبلاً تكلم معك بهالموضوع لاتردين عليه ولا تبان منك أي ردة فعل وخليه يحكي لين يشبع وبعدها طنشيه قومي بواجباته على أكمل وجه عشان لايمسك عليك شي وماتكونين مقصره

والله يعينك حبيبتي ويعين كل وحده زوجها يعاملها بهالشكل الزواج موده ورحمه ماأدري ليه بعض الأزواج يستلذون بأذية زوجاتهم نفسياً لازم زوجك يعرف أن تصرفه هاذا يفقده حُبك شوي شوي ويملأ قلبك عليه كره وبغض

إذا خسر مكانته عندك بالمستقبل ماراح ينفعه كلامه وتعامله معك وقتها خلاص بيكون حبه مات من قلبك { والأموات لايعودون }

وأي زوج يعامل زوجته بهالشكل في إعتقاده إنه يثير غيرتها ويشعلل حبها في قلبه ويخليها تستميت لإرضائه أتمنى يصحى لنفسه قبل يخسر كل شي