السلام عليكم ..

بالبداية احب امسي عليكم كلكم .. انا جديدة هنا والله الشاهد اني اول مره اعرض مشلكة لي عن طريق النت بس محتاجه مشورة صادقة ورأي سديد لا تبخلون علي بأي رأي ولو كان بسيط يمكن يكون غايب عني هالفترة ..



انا عمري 26 ملكت قبل فترة بس المشكله ان خطيبي او بالأصح زوجي ما أظهر لي أي اهتمام لا بيوم الملكة ولا بعدها .. يعني مثلا ما كلمني الا بعد 14 يوم وكان عن طريق رسالة مختصره .. واستمر الحال بهالطريقة رسايل مكرره مختصره من فترة لفترة عبارة عن صباح الخير او مساء الخير .. واول مكالمة كانت تقريبا بارده وغبيه مثلا ما بارك لي او تمنى لنا حياة سعيده او اي شي من هالقبيل .. قلت يمكن هو خجول اكيد بيتعدل وحاولت اوضح له اني ماعندي مشكله لو رسل بأي وقت او سألني عن اي شي يحب يعرفه ووضحت له اني اقصد انه لازم نعرف بعض اكثر .. وبالرغم من كلامي الصريح معاه ما حاول يعرفني عليه او حاول انه يتقرب مني .. وبيوم حصل موقف سيء لي وما تحملت عاتبته وقلت له انه ابدا مو مهتم انه يعرف عني شي وانه لا مبالي واني اشك انه يعرف اسمي من كثر ماهو متحفظ معي ..حاول يدافع عن نفسه ويقول انه طبيعته هادي وانه بارد شوي .. وانا صرت بعدها مستحيل ابادر بأي رساله بس لو رسل هو ارد ..طبعا هالوضع متعبني انه مخليني اخر اهتماماته مثلا يروح الدوام ويرجع وينام ويصحى ويطلع مع اهله واصحابه واخر الليل يرسل رساله بارده او يتصل كأنه بيخلص من واجب ثقيل وبعدها ينام واليوم اللي بعده نفس الطريقة .. انا جدا مجروحه من تعامله ومحتاره كيف اتصرف معاه


احتاج نصيحه منكم بس امانه بشكل هادي لا احد يحقر من مشكلتي .. واعتذر لو كان كلامي مو مترابط