السلام عليكم ورحمة الله وبركاته
اليوم فقدت أعصابي لأول مرة وقلت لزوجي بصوت عالي بلا كذب قال احترمي نفسك وماتقولي لي هالشيء قلت أنا محترمة غصبن عنك بس أنت كذاب ..
مع أنه فعلاً زوجي كذاب وتقريباً 99% من كلامه مو صحيح من أعذار وخلافه وهالشيء اكتشفته من عشرتي له ، وكنت اقوله مااصدقك وكذا بدون تجريح او تصريح ، بس اليوم وصلت حدي منه ،، أنا من فترة وأنا أضغط ع أعصابي وع نفسي لكن اليوم انفجرت فيه لأنه تعبت ماعاد فيني حيل أتحمل ..
أنا سبق وكتبت موضوع أطلب النصيحة بطريقة التعامل مع زوجي ووضحت شخصيته،، وبالنسبة لي أنا إنسانة حليمة صبورة أتغاضى كثير كرماً مني أعرف انه يكذب ولا أقوله هالشيء احتراما له وعشان ماأجرحه لكن اللي قاعد يسويه مره ازعجني ..

الحادثة:
قبل فتره تزاعل مع زوجته الأولى كالعادة بس ترك لها البيت يومين وصار في أيامها يجي عندي ،، وبعد ماتراضو صار يبي يعوضها هاليومين من أيامي وليالي فكل يوم يطلع بحجة مرتين رايح للأستراحة عندي عمال مع انه ظهر بعد الدوام ولا اشوفه الا العشاء هذا اذا كان يومي ومرتين في الليل قال طالع مع صاحبه عنده مشكله ويبي يساعده فيها وقعد معاه لبعد صلاة الفجر وطلع للدوام من عنده ماشفته الا يوم ثاني..
تخاصمت معاه قال انا جيتك في أيامها ولا قلتي لي مو يومي لاتجي قلت ولا راح اقولها بقولك حياك الله وعين لك فراش وعين لك لحاف واذا ماشالتك الأرض بحطك فوق راسي وانت جيتني بكيفك مو ضغط مني ولا طلب ولا حتى ادري انكم متزاعلين لكن يومي ووقتي ماتظلمني فيه وتعطيها اياها تعوضها عن زعلك عليها ..قالي ع كيفي قلت شرع الله مو عليك يومي ماراح اتنازل عنه هالشيء حطه في بالك ..

الان هو حاول يهدي الأمور معاي لأن زوجي مايحب المواجهه ولا النقاش وحالنا مثل النار تحت الرماد
ألف لي قصة طويله عريضة وأنا عارفه إنها كذب ،، ماتهمني أهم شيء بالنسبة لي انه شاف الوجه الثاني مني العصبيه وطولة اللسان والزعل وهالشيء ماسبق انه شافهم ،، ووصلت له انه مايستهين بحقي ،،

لكن الان ابي رأيكم هل اعتذر له عن كلمة (كذاب)فقط اللي قلتها لانها بصراحة مره مضايقتني احس كأنه انا اللي انقالت له
ع فكره النقاش مع زوجي ماأطلع منه بنتيجة مثل المسكنات لكن الوجع لازال موجود.