رد : زوجي يلمح للزواج الثاني وانا السبب ..
خارج النص :
سبحان الله قصتس ذكرتني ببنت خالتي و خالتي من الرضاعة -الله أعلم إذا مالخبطت بينه وبين أخته- :
هذي معلمة وجمعت و بنت بيت من راتبه لكن باسمه فتزوج عليه و تطلقت - لا أسقط وضعك و أقول طبق الأصل فقط من باب الاخبار- ، ثمن أخذت معدد مدري هي الأولى أو الثانية ..
المهم هي تجي أحيان تسير تسلم قهوة يعني و بس ،
فذيك المرة جتنا العصر كاشخة ومعه عياله و بناته ، وفي سياق الكلام المنقول لي تقول لأختي الكبرى
فيما معناه : الله يجزى أم فلان خير- تقصد جارته - لأنه اليوم دور جارته فهي ترتاح تروح تتمشى و تنبسط
لأنه أساسا مرتنا و هي بطريقه للحديقة .
و بنت خالتي من خالة ثانية غير ذي و تصير بعد خالتي من الرضاع هي معلمة وزوجه أخلاق مب زي الأولى ،
ومتدينة و يعني حليمة ماعمري تخيلت وجه إلا و ملامحه هادية ... المهم ذي بنت له من راتبه فلوس و عقارات و صارت الحمدلله موسرة ماشاء الله تبارك الله و لا حول و لا قوة إلا بالله ،
المهم ... يعني كلنا استغربنا تزوج رجله عليه ؟
و بعد ما مر وقت يعني على زواجه بجلسة قهوة كانت أختي الكبرى تحاول تواسيه زي كذا ، بينما
هي فاجأت أختي بكلامها فيما معناه :
"الحمدلله ..أنا مقدر أعترض أو أقول شيء لأنه حلال وهو مب مقصر معي ..ما أجحد إني مرة-أنثى- أضيق و أغار بس بنفس الوقت ما أشوف شيء غلط أو حرام عشان أعترض ".
زميلة لي ذكرت سالفة و هي تقوله بوجه شاحب ..
كانت تتكلم عن فترة اختبارات بمستوى فات عنده ظروف حزن وعزى وبكى و أمه وكل البيت فماذاكرت ولا حلت ،وهي تكمل كلامه طلعت المتوفاة هي " مرت أبوهم " ؟
فيه مسلسل ثقافة الممثلين قروية ..
كان الولد يزور "خالته " زوجة أبوه ؟ و يعطيه قروش و يسأل عن أخوه ، قامت الخالة تقول :
" أحتسب أجره - هذي الفلوس- لبييك و ميمتك ".
^
طبعاً ما أقول هذولي من زمن الطيبين لا إن شاء الله فيه نساء طيبات بالزمن الحديث ،
ولو كانت معظم قصص التعدد الجيد بضمير ودين سواء للرجال و النساء من الماضي ؟
لأن الرجال الحين مب زي أول يردعه عن الظلم دين و لا ضمير بنفس الوقت النساء الحين مب زي أول ،
إلا من رحم ربي ... وعاد يله جيبي طريقة امتحان أو اختبار تضمن الخبيث من الطيب الله المستعان .
يمكن من هنا كنت أشوف أن جانب الضمير بنفسك هو اللي متقبل فكرة التعدد .
__________________________________________________ _________________
داخل النص :
لازم تكتبين البيت و كل الحلال " باسمك " ،
و لا تقترحين الزواج من نفسك انتبهي ؟
وإذا تزوج من نفسه لا تطلبين الطلاق ولاتكدرين عيشته امسكي بيتك وحبيه و حبي عيالك،
بس كوني حريصة على مستحقاتك و عيالك المادية وهذا أهم شيء.
"سبحانك اللهم وبحمدك أشهد أن لا إله إلا أنت أستغفرك و أتوب إليك"