رد : لماذا لا تنسى المرأه
اقتباس:
المشاركة الأصلية كتبت بواسطة RAOUF&RANA
لا قولى مهره
كلامك معايا درر لا امل منه حتى ولو لم نتفق ..
حالتين عدم النسيان غير مبررتين ..
لم تعد تحب.. فتشيله من دماغها خالص وتقعد بلقمتها لان العتب على قدر المحبه
اما الاذى اكبر من ان تنساه فهذا هو مربط الفرس ..
من له الحق فى تقييم الخطأ والحكم عليه بانه لا ينسى .. شوف يا خالو .. أنا باعترف إن بعض الناس ـ وليس النساء فقط ـ حساسين زيادة حبتين .. وممكن يتطرفوا ويهوّلوا الموضوع .. ويبصّوا للغلطة الصغيرة على إنها جريمة .. لكن في نفس الوقت متوقع جداً أن الشخص الغلطان يحاول ـ في الغالب ـ تهوين غلطته. يعني في الغالب محدش منهم هيقيّم الغلطة ويعطيها حجمها الحقيقي. وبصراحة يا خالو المشكلة بتتحل بطريقة كويسة لما النفوس تكون صافية وفيها الكثير من المودة والإحسان وتقدير العشرة والهدوء النفسي. لكن لما النفوس تكون شايلة والمشاعر مش قد كده .. فاللي بيزعل بيزعل زيادة عن اللزوم .. واللي بيعتذر بيعتذر أقل عن اللزوم.
لماذا تنفرد هى بتقييم الخطأ حتى ولو كان تقييما جائرا ..
وماذا عن الصفح والعفو لماذا صفحت وعفت.. والا كانت تجعل الصفح مشروطا ..
ولماذا لا يخزن الرجل كما تخزن رغم انها ممكن تكون عامله مصايب وشوفى اللى مراته خانته ولا يزال يريدها ويتذلل لها عشان ترجع ..
لماذا انتم مختلفون .. وبلاش نغمة العاطفيين لان فيه منهم كجلمود صخر ..
اخيرا لم اتطرق لحقد ولا تربص فاعتقد لو وصلت لهذه الحاله فتسيبه احسن ..
شكرا مهره وابقى قريبا لا تبعدى
وأنا أقدر؟ 
|
طيب يا سيدي .. بلاش نغمة العاطفيين
بس خلينا نحاول نفهم الدافع.
شوف أنا مش هاطلب منك تسألها: ما دام شايله في نفسك ده كله ما بتسبينيش ليه؟ .. لأنك قلت مرة إنك مستمر من باب تحمل المسؤولية وشعورك بالالتزام .. وبالتالي هي كمان يمكن تكون مستمرة لنفس السبب.
بس يعني انت فاكر إنها حتى لو كانت مستمرة من باب المصلحة العليا ومصلحة الأسرة فده أمر بسيط؟
إنك تعيش حياة مش شايف إنها حلوة ورغم ذلك مضطر أنك تستمر فيها؟
إنك تشوف سنين عمرك بتضيع مع شخص عارف أو على الأقل حاسس إنك مالكش في قلبه ولو شوية حب؟
هتقول لي: طيب ما انا مستحمل وساكت .. لا باجرح ولا باوجع ولا بارمي كلام زي الطوب.
مش هقول لك: الست حاجة تانية .. ولا هقول لك إنها حساسة حبة ولا عاطفية حبتين .. لأني أعتقد أن الراجل والست عندهم إحساس ومشاعر زي بعض .... ولا هقول لك إن الراجل عنده منافذ ممكن يخفف بيها على نفسه بشكل أكبر .. رغم إن ده صحيح .... ولا حتى هقول لك إن وطأة الطلاق على الست أقوى بكتير من وطأته على الراجل .. رغم إن ده صحيح برضو .... لكن هقول إن كل الناس بتختلف يا خالو في ردود أفعالها والكيفية اللي بتتعامل بيها مع الضغوط والآلام والخذلان .. ويمكن الجعجعة دي هي اللي مصبراها ومخلياها قادرة تكمل.
مش قصدي خالص إن تصرفها صح .. ولكن يمكن هي شايفة إن دي الوسيلة اللي ممكن تخفف عنها .. زي اللي لما تتنرفز تروح المطبخ تكسر الطقم الصيني اللي جايبهولها بالشيء الفلاني ... فبدل ما تكتم في نفسها وتفرقع من جواها .. تقوم تفرقع في الكل.
__________________
اللهم طِيبَ الأثر .. وحُسْنَ الرحيل.
التعديل الأخير تم بواسطة مهره ; 18-11-2014 الساعة 08:01 PM