الوحدة راح تجبرني اترك الرياض ( استشارة)
السلام عليكم و رحمة الله و بركاته.
مساء او صبح الخير جميعاً،،،
قدامي قرار مصيري و محتار و محتاج نصيحة أخوة صادقين أمثالكم.
أنا ساكن بالرياض من يوم كنت صغير و اعرف كل صغيرة و كبيرة فيها و متعود عليها و كل شي.
لاكن أنا طلعت للدراسة بالخارج و جلست حدود 7 سنوات بالغربة و لما رجعت الزملاء و الأصدقاء
القدام مختلفين و كل واحد ناسي الثاني و حاولت اكثر من مرة اجمعهم لاكن الجميع أخذ قراره
بالابتعاد حسيت بالوحدة شوي و قررت الزواج تزوجت و ارتحت بس ما عندي حياة اجتماعية أبداً
و الشركة اللي شغال فيها عندها فرع بالشرقية و اقدر انقل لها و أنا حالياً محتار.
من الناحية الوظيفية تعتمد على الظروف لاكن حالياً اشوف الرياض افضل لي لانه الفرص و
الخيارات اكثر و لاكن الشرقية بعد ممكن و اتوقع فيها فرص كثيرة. يعني من الناحية الوظيفية
الرياض احسن.
من الناحية الاجتماعية يعني الأقارب و الزيارات الشرقية اكثر بكثير من الرياض و هذا الشي
الأساسي اللي مضايقني بالرياض احس اني بغربة قليل معارفي و لا فيه اي تواصل أبداً و انا
شخص اجتماعي يعني مو كل يوم يعني لا بس كل اسبوع او أسبوعين ابغى أزور احد او احد
يزورني و يكون يعني فيه حياة اجتماعية و تواصل مع الناس جداً حاس بالعزلة بالرياض و صعب
تكون علاقات جديدة لان بالشركة الأغلبية أجانب و السعوديين القليلين فيها لهم حياتهم الاجتماعية
من اقارب و اصدقاء.
من النواحي الأخرى:
-أهل زوجتي عايشين بالشرقية هم من الأقارب أيضاً و هذا راح يعطيني حرية اكثر مثلاً لو تجيني
دورة خارجية او رحلة عمل اسبوع او أسبوعين عادي اترك زوجتي عند اهلها بحكم انها تدرس
الجامعة الى الان و صعب تجي معاي و بعد لو تتعب علي او يرزقنا الله بأولاد راح تحتاج أمها
بكل تأكيد و هذا أسهل لها و لي انا بعد.
- طفشت من زحمة الرياض طفشت الأن اكره الطلعة من البيت بسبب الزحمة. أشغال البيت
مستحيل اخلصها بيوم واحد بسبب الزحمة و هذا مسبب لي أزمة.
- زوجتي ما عندها مانع بين المنطقتين و لكن منطقياً اكيد راح تفضل القرب عند اهلها و تقول
أحزم أمرك و اختر منطقة و خلاص نستقر فيها و اقدر اكمل دراستي.
- اذا احد يسال عن الوالدين ( ابوي متوفي رحمه الله) و امي نص السنة عندي سوى بالرياض
او الشرقية و النص الثاني بقريتنا في شمال المملكة مع جدتي.
خايف من الانتقال و اندم و ارجع اشتاق للرياض لانه تعرفون مهما كان انا من يوم طلعت للدنيا
عايش بالرياض و متعود على المدن الكبيرة جداً مثلها و بعد افكر من الناحية الوظيفية اتوقع الرياض
راح تكون افضل لي بس والله تعبت من الرياض احس إرهاق و تعب خلاص احس ابغى هدوء و راحة
و مدينة أصغر و اقل إزعاج و زحمة بس اخاف الوضع الجديد ما يناسبني ؟
عندي أخي بالرياض لكن غير اجتماعي بالمرة و تمر الشهور ما نتقابل مع ان علاقتنا ممتازة
جداً و لا فيه اي مشكلة بس هو اكبر مني بكثير و مشغول جداً مع
زوجته و أولاده و لا يحب يجتمع أبدا.
و بالمقابل عندي أخوان و اخت هناك و اجتماعيين جداً مع بعض اكثر من مرة بالاسبوع
اجتماعات او طلعات و زوجاتهم مع بعض و مبسوطين جداً و يتمنون و يطلبوني ان انقل عندهم.
ساعدوني لو انتم بموقفي وش راح يكون قراركم ؟ انصحوني لاني مهما كان أصغر منكم عمر
و انتم مرة عليكم تجارب كثيرة بالحياة و راح استفيد و الله يجزاكم كل خير على كل حرف
تكتبونه لنصحي و إرشادي.
و السلام خير الختام،،،،