السلام عليكم ورحمة االله وبركاته
جمعة مباركة عالجميع يارب..
موضوعي هاد عم بكتبه وبتمنى من الأعضاء الرجال انهم يجاوبوا على تساؤلاتي ..لاني بدي اعرف السبب..
موضوعي عن الأخ المتزوج وعلاقته بأخته بعد زواجه..
لما تكون علاقة الأخت بأخوها وهوي أعزب علاقة صداقة وعلاقة اخويه رائعة قلوبهم على بعض وبيتزكروا مناسبات بعض .. بيآزروا بعض عند الشدائد .. الأخ بيواسي أخته والأخت بتحط أخوها بعيونها ... يعني بالمختصر علاقة اخوية كلها أمان وحنية..
لكن تساؤلي هون لإخواني الأعضاء الي بتمنى تجاوبوني عليه ..
ليه معظم الأخوان بينسوا اخواتهم بعد الزواج ؟
وكأنه اخوتهم وعلاقتهم الحلوة الي كانت وهو اعزب هاي كزبة او شي مؤقت ! بتنتهي بمجرد زواج الأخ !
وفجأة بيصير انسان غريب .. كأنه عاش مع مرته دهر وخواته ناس اغراب مو مجبور فيهم !
فجأة تلاشت مشاعره تجاه خواته !
بهالسهولة بهالبساطة ؟!
طيب ممكن اعرف ليه ؟
ليه شو السبب الي بيخلي دخول انسانة لحياتك يلغي وجود خواتك وعلاقة اخوتكم تصير كزبة كانت وانتهت!
عنجد بدي اعرف الاجابة .. بدي اعرف من الرجال شو السبب طيب ليه هيك بتبعدوا عن خواتكم فجأة ليه؟؟
ترى انا وحدة من البنات الي اخوي وهوي اعزب كنا اجمل ثنائي
بنحن على بعض .. وهمنا انه مانشوف بعض متدايقين او زعلانين .. كان يهتم لمشاعري ويحسسني بالأمان .. أمان الأخو شي كتير مهم بحياة الأخت انها تحس انه اخوها ماسك بإيدها وساندها هاد احساس مابتتخيلوا قدي بشع لما يتلاشى.. مشان تكون الصورة واضحة انا بنت بحالي مابتدخل بحياة اخوي المتزوج نهائيا وربي يشهد اني مابدايق مرته بشي بعاملها بكل احترام وأدب وهيي بتعاملني برسمية حاولت اتقرب منها بس هيي بتبعد وبتحط حواجز .. لما اشتري شي الي وتشوفه زوجة اخوي بتطلب متله من اخوي قدامي وبيجيبلها نفسه ! يعني كل شي بشتريه وبيشوفوه لازم تشتري متله وربي شاهد على كلامي اني مابزاود بحرف .. بس ولا مرة فكر اخوي يهديني شي متل مابيهدي مرته قدامي .. مابدي شي وماطلبت شي بس ترى انا انسانة متل ماعم تهديها قدامي اجبر خاطري بشي اي شي يحسسني اني الي مكانة عندك عالقليل قدام مرتك !
مابدي احكي عن حالي ولابدي احزن اكتر ..
بس كتبت هاد الموضوع لغرضين :
الأول .. انه الأخت بحاجة لأخوها لو صار عمرها مية سنة بحاجة انه يكون سندها حاميها حانن عليها تحس انه بحبها وحيضل يحبها . لما تشوفه مع مرته تدعيلهم مو تحس حالها غريبة ولا بيعيرها اهتمامه ومابيتزكرها غير عند مصلحته انه تحتضن اطفاله مشان يطلع مشواره مع مرته!
عزيزي الرجل .. حط اختك بعيونك ولاتنسى تحيطها بهتمامك وحنانك ابسطها بهدية من وقت للتاني واجبر بخاطرها بكلامك الحلو ومدحك ترى والله شعور البعد بشع بشع اوصيكم بأخواتكم جميعا.. كنت بتمنى اخوي يقرأ هاد الموضوع لأنه نسيني ومابيتزكرني ... بدي اعمل خير لغيري وازكركم باخواتكم لعل وعسى فيكم الي يرجع يحتوي اخته ويكون انا سبب بسعادتها وفرحتها.
والغرض التاني من كتابتي لهالموضوع .. انه افهم من الأخوان الأعضاء الرجال ليه هيك بيصير مع البعض من الرجال المتزوجين ؟

آسفة طولت عليكم ..
وربي يفرجها عالجميع ماالنا غيرك يارب .

__________________
يارب