المشاركة الأصلية كتبت بواسطة ضيعتني آلعاطفة

السلام عليكم .. صبحكم الله بالخير

صار لي فترة أتابعكم من بعيد وموضوعك أجبرني أسجل دخولي
إنتي تسألين متى إنتهى ألم الطلاق وأنا أقولك لسه إبتدى!
حاليا لي سنه وسبع شهور طلاقي كان خلع
بداية طلاقي ماكنت مستوعبة مافي أي مشاعر وكل اللي حولي مستغربين من ردة فعلي
وكنت أقرأ عن مشاعر المطلقات وأستغرب من نفسي ليه ماأحس زيهم؟!
اﻷلم الوحيد اللي حسيت فيه هو من معاملته لي لما كنت زوجته
وحاليا لما مرت سنة وأكثر أختفت فيها مشاعر الغضب واﻷلم واﻹحباط والتعب الجسدي والنفسي اللي عانيت منهم وقت زواجي
بدت تظهر مشاعر جديدة لما أسترجع كل اﻷحداث أحس إني فهمت أشياء كثيرة متأخر
وإن طليقي ماكان بالسوء اللي كنت شايفته وإني ماعرفت أتعامل معه
وإني مابذلت كل الحلول مثل ماكنت أعتقد
أستعجلت بقرار الطلاق وقراري أتخذته من دون ماأشاور أحد
وتشجيع كل اللي حولي عليه خلاني أصر عليه أكثر
أنا وقتها كنت متعبه ومصدومه ومجروحه مريت بأشياء كثير خلال فترة قصيرة
وقتها للأسف ماكنت مؤهلة إني أتخذ مثل هالقرار وماكان في أحد حولي ينصحني بحكمة للأسف
أذكر وحدة من صديقاتي قالت لي أستعجلتي بقرارك أرجعي وعطيه فرصة كان هالكلام خلال المدة اللي كنت فيها عند أهلي قبل أخلعه
وقتها كنت أشوف إن صديقتي هاذي من اللي يقدسون الزوج حتى لو كان سيء
وإنها عدوة للمرأه وتعطي نصائح ضد مصالحها والحين أشوفها هي الوحيدة
اللي فكرت فيني بصدق ونصحتني من باب الحب والخوف علي وإني فعلا كان ﻻزم أخذ بنصيحتها وماأستعجل وأرجع له بشروطي وأعطيه وأعطي نفسي وزواجنا فرصة ﻷن أصلا زواجنا ماأستمر إﻻ لفترة بسيطة غير كافية إني أحكم عليه بالفشل
طليقي قد ماكانت له عيوب كانت له حسنات وأنا لو عرفت أتعامل معه كنت عشت مثل ماأتمنى أعيش ﻷن من إيجابياته إنه هين لين
يفكر ويراعي الطرف الثاني وسوء أخلاقه كان سببه الخمر مش ﻷنه هو شخصيا سيء
له إيجابيات وعشت معاه لحظات حلوة أفتقدها أذكر بعض المواقف معه وغصب عني أبتسم
أشتاق كثيييير ﻷوﻻده ماكرهته على كل اللي سواه معي وﻻأحب أحد يتكلم عنه بالسوء
أكثر حاجه صدمتني فيه إنه كان متمسك فيني على الرغم من إنه دايم كان يبين العكس
وش أكثر من إنه كان يخلي أوﻻده يكلموني عشان أرجع ﻷنه عارف معزتهم وغلاتهم عندي
وﻵخر لحظه كان يحاول بس كنت أشوف محاوﻻته عشانه هو وعشان مصالحه مو عشاني أنا
غير إني وقتها أساسا نفسيا كنت تعبانه باﻷخص بعد ماأجهضت
لكن اللي صدمني إنه بعد ماأنتهت عدتي أرسلي إنه باقي يحبني ويدعي إننا نرجع لبعض وأتصل علي بس مارديت وقفلت جوالي وغيرت رقمي
كلللل المشاعر السلبية والغضب واﻷلم إللي كنت أحس فيهم بداية طلاقي أختفوا اﻵن
لكن حتى لما كنت في قمممة هالمشاعر ماكرهته
أقدر أقولك إن ألم الطلاق توه أبتدى
وكثير أسأل نفسي لو كان طليقي غير معدد هل كنت راح أتلقى نفس النصائح؟ أكيد ﻷ
طلاقي علمني دروس وبين لي معادن كثير أشخاص حولي
دايما أقول لنفسي إني أستخرت فيه وتزوجته وأستخرت بطلاقي وتطلقت
وإن كل اللي صار لي خير ولحكمة مايعلمها إﻻ الله
ولو في شي بندم عليه إني ماشاورت أهل الحكمه قبل أتخذ هالقرار وإني مادخلت أشخاص يتكلمون معه وإني أرجع بشروطي وأصبر عليه فترة أطول وإني المفروض بأمور كثيرة كنت صريحة وبينت له مشاعري بدل ماأكبتها
وأخليه يستمر باﻷشياء اللي تأذيني ﻷنه مو عارف وإني أغير طريقة تعاملي معه أنا برضوه أتحمل جزء من مسؤولية فشل زواجي وهالشي اللي فهمته متأخر
حاليا عايشه حياتي برضا وتسليم والحمدلله سعيده وبخير لكن بداخلي غصة وشيء من الحنين ...

أعتذر طولت بالكلام ماراح أرجع أقرأ كلامي ويارب بكره ماأندم إني كتبته .