بسم الله الرحمن الرحيم

امس حصل سوء تفاهم مع اهل زوجتي واتوقع انهم فهمونا غلط وفسروا الاحداث على مزاجهم

كانوا يتصلون علي نبي العيال احنا عند الباب اقولهم ماحنا موجودين طالعين كلمونا قبل تجون بيوم

ثاني يوم يدقون الباب البيت ويطلع الوالد نبي العيال يقول مو موجودين كنا بالسوق اتقضى ملابس للعيال وكلمني الوالد وقلت له اني قلت لهم يتصلون قبلها بيوم نجهزهم وشو هم قواطي خذ وامش مايصير

ثالث يوم اللي هو امس دقوا باب البيت وطلعت انا ولقيت اخوها هذا الصغير في الثانوي يدرس معه ام زوجتي

قال نبي العيال قلت مو موجودين طالعين مع اهلي ويدفني يبي يدخل البيت ؟؟ قلت خير اختي بالبيت وتدف الباب بتدخل وطردته واشوته برا البيت قلت استح على وجهك تبون العيال حددوا يوم هذا البيت بيتي وله حرمته مايحق لك تدف الباب وتدخل فجاه داخل استراحه انت
قال عيال اختي بشوفهم غصب عليك قلت فيه قانون مو بلطجيه انقلع لااشوفك جاي هنا
نزلت خالتي ام زوجتي وسلمت وسلمت عليها وحبيت راسها وقلت لها والله مو موجودين تدخلين تشوفين بنفسك حياك الله بس هالخسيس لايدخل بيتي ينجسه وهذا مو اسلوب خلوه يتربى ويتأدب

رد انا متربي قبل اعرفك وانت احمد ربك اننا عطيناك اختي يالوصخ ويا ويا ويا طلعت مانت كفو وانت ماتطول نسبنا ومن هالكلام اللي يسم البدن

قلت احترم نفسك انا متزوج اختك وانت بزر عمرك 10 سنين واجيب لك حلاوة تمصها

قال والله لا امص دمك واوريك وامه تقوله خلاص يافلان اسكت خلاص رح للسيارة واسكت وسألتني ليه تسوي كذا يابو فلان حرام عليك تحرم العيال من امهم الله يهديك مايرضي ربك هالشئ وانت رجال مصلي مسمي ونعرفك تعرف الاصول والواجب

قلت لخالتي بتاخذون العيال حياكم الله بس هالورع لا يجي اصلا ما اضمن عيالي يركبون معه بسيارته مراهق ويسرع ولا استامن عيالي معه رجاء خلي ابو فلان يجي او ولدك اللي بأخر سنة بالجامعه او خالي يجي اما هالشخص لو يجي ماعطيتكم العيال حتى لو هم موجودين بالبيت

قالت بكرة ان شاء الله نجي يناسبك

قلت ايه يناسبني بس لاتجون وانا مو موجود بالبيت لازم اكون موجود واسلم العيال لشخص يكون مسؤول عنهم

قالت انا مسؤولة قلت خلاص اذا طلعوا من بيتي معكم فهم بذمتك وانا برجع اخذهم من عندكم بعد كم يوم

قالت خلاص تم

وانتهى اليوم بيجون ياخذون العيال يقعدون عندهم كم يوم اتوقع برجع اخذهم السبت بالليل

وسلامتكم ......

ايه فيه شغله صارت والله ما ادري اضحك ولا اسكت بس

صديقات زوجتي استغربوا انه تغير وضعها وصارت ما تجي مع سواقها للدوام

فوحده فيهم وصت سواقها يدق على سواقي ويسأله وينك ماتجي للمواقف ماعاد شفناك

قالهم انه مدام زعلان وانها طلعت من البيت وراحت لأهلها قال انها تقول انك صدمت بالسياره وزعلانه عليك

فأستنتجت ان هالصديقه بتتأكد من كلام زوجتي هل فعلا السواق صادم بالسيارة وماتبيه خلاص او صاير شئ

سبحان الله هالحريم شلون يجيبون الاخبار زعلت على السواق وقلت له اي احد يسألك عن اي شئ قول مادري وخلاص

قال مادري وش دراني صديقي ويسال عني لاني مختفي قلت خلاص لاتقول شئ لاحد