(سوء معاملة زوجتي لي)
الاعضاء الكرام السلام عليكم ورحمة الله وبركاته

تحية عطرة مني إليكم جميعاً وبعد

مشكلتي طويلة في المضمون رغم قصر وقتها
مشكلتي مع زوجتي انها لاتطيقني وتكره كل شي فيني حتى اسمي وصرحت لي بذلك بعد جهد جهيد مني لمعرفة سبب تصرفاتها
وأحب ان اوضح بعض الامور

أنا متزوج منذ خمسة أشهر
من موظفه ولكن هي في منطقة وانا في منطقة أخرى وآخذها نهاية الاسبوع
نجلس مع بعض يومين ولكنها مليئة بالكره والنفور مني

حاولت اجد لهذا الكره سبب لم اجد
و هي تقول انه غصب عني

بعد ان صرحت لي بالكره قلت لها اذا تبين ننفصل ماعندي مانع لأن اذا هذا الكره من البدايه كيف بيكون الوضع اذا جاء عيال ومسؤوليات زياده
فقالت لي المشكله في اهلي واهلك بتخرب فرحتهم
قلت ما الحل قالت ماعندي حل

يعني ماهي حاسه فيني اني انسان وبشر من حقي اعيش مع زوجه تحبني او تتقبلني ع الاقل

فكرت كثير عن الاسباب

سألتها انتي مغصوبه علي قالت لا

لكن فيما بعد اتضح لي انها كانت رافضه فكرة الزواج جملة وتفصيلاً
لكن امها قالت اذا تبين رضاي تزوجي

فجاها خاطب قبلي واستخارت ورفضت

وجيت انا واستخارت وارتاحت لي

ع حسب كلامهم


طبعاً انا سمعتي ولله الحمد ممتازه


سوف اوضح بعض الصفات في شخصيتي

1- اعترف اني شكاك واسيء الظن

2-ألوم نفسي كثير حتى لو كنت ع صواب
3- طيب في التعامل مستحيل اسب احد او اجرحه حتى لو جرحني

4- صادق مع نفسي ومع الناس وصريح

5- الاحظ اني احيان ضعيف شخصيه
مااحب ارفع صوتي ع احد واذا احد تأثر مني اجلس ألوم نفسي واعتذر وابالغ في الاعتذار


6- لا أخون والموت عندي اهون من الخيانه
سواء مني او من غيري
وماعندي اي علاقات لاهاتفيه ولاغيرها
لا في الماضي ولا الحاضر ولا المستقبل بإذن الله

7- كريم

8- ماابغا احد يزعل مني

9- كلامي كثير واحيان احس انه تافه

10- مااحب افرض نفسي ع احد ابدن

11- حساس جداً

12- احب اعطي الناس ولو ع حساب نفسي
واحب الايثار ع النفس

13- شكلي مقبول ولكن لست وسيم وهي وافقت علي بعدما رأتني

14- جميع من حولي يمدحوني ولله الحمد

ويقولون عني (طيب وكفو)


صفات زوجتي التي لاحظتها

1- عمليه وجديه

2- تمشي بمبدأ انا ومن بعدي الطوفان

3- مستحيل تفضلني ع نفسها

4- اذا امرتها بشي تنفذه ولكن توضح لي انه مو عشانك

5- مغروره ومتكبره وتعاملني باحتقار

6- اشك فيها لأني لاحظت اشياء وحركات تشكك وعينها طويله وهذي متأكد منها 100/100

7- ذكيه جدا جدا جدا

8- سريعة البديهه

9- تعاملني بندية بل باحتقار

10 - اذا زعلت ماترضى ابدن ولاتنسى

11- اذا سوت لي شي تحس انه اهانه لها

12- اذا الحق معي تقلبه علي واحيان تفتري علي باشياء والله ماكانت في نيتي ولا ع بالي

13- مستحيل تقول لي كلمه حلوه

14- بخيله حتى في المشاعر والمعاشرة

15- جميله واحس انها في قرارة نفسها
تشوف انها كثيرة علي وانها تستحق افضل مني

16- عنيده جدا ولا اذكر اني تعاملت مع احد مثلها بالعناد


تحليلي للوضع

انها ماتبي الزواج من أصله ولكن ربما وافقت لأسباب

1- ماحصلت عذر لأمها وابوها لأنهم يعرفوني زين وبيقولون مثله ماينرد

2- تزوجتني ع اساس اني كبري
فتره من الوقت وتقول ابي الطلاق


لأني لاحظت منها رصد دقيق وتضخيم لأخطائي اتوقع لتحتج بها لتطلب الطلاق
وتتعمد تنرفزني عشان انفعل واتكلم لكن انا حاط اعصابي في ثلاجة
ماابيها تمسك علي شي


الحاصل الان انها تقول اكره البيت واخاف يوم تقرب مني واكره اسمك وكل شي فيك
فما اقدر انام معها ولا اقرب منها

ومعاملتها سيئة جدا معي ولاتهتم بي ولاتسأل عني محسستني اني ولا شي

واتوقع تبيني اطفش والطلاق يجي مني

لأن ابوها مايرضى الخطأ

طبعا انا كلمته وقال بنعالجها بس بعدين قال انا مشغول عالجها انت

ع اساس ان فيها سحر او عين

انا صراحه مااقتنعت ان فيها سحر او عين

لأن هذا تعاملها من البدايه تقريبا

مع انها اول اسبوع كانت عاديه مافيها شي


تحليلي لا اجزم انه صحيح لكن غالبا اذا حسيت بشي يكون صح

مااستغني عن آرائكم انا متشتت والافكار توديني وتجيبني

وماادري تحليلي صح او خطأ

بالرغم اني كلمت رجل عاقل اثق برأيه
وقال لي مااستبعد يكون تحليلك صح

اعذروني ع الاطالة فأنا مكبوت وابي افضفض وفي نفس الوقت ابي حل

(تم التعديل ليتناسب مع المضمون)

مستجدات
الرد 80
http://www.66n.com/forums/showpost.p...9&postcount=80