فاكهة

فيه اشياء صغيرة كانت تحصل بس كنت أحاول اتجاهلها و اكبر دماغي و ما استخدم الصك كورقة ضده ..

راح اذكرها بسرعة على شكل نقاط مختصرة ، حصلت خلال 6 أشهر الأخيرة ..
طبعا ما كنت اسكت عنها في لحظتها :

1. أصحابه اللي هو وعد انه بيتركهم و هما شلة أخوه ، ضافوه في قروب و ضافوا اخوه ..
و قروب جديد كان ، و عارضين فيها صور حشيش و انواع حشيش و مقاطع فيديو من النت عن عاهرات مع اصحابهم.
و قام خرج من القروب لما انصدمت انا بصور الحشيش و تخاصمت معاه ، لو انه صحيح تركهم ..
ما كانوا تجرأوا يضيفوه ..

2. بعض مرات أخوه و أصحابه يروحوا له المدينة الي هو يشتغل فيها .. يمكن مرتين أو ثلاثة فقط اللي عرفتها بالصدفة.
شلة تافهة و ضايعة و إمعة و حثالة القوم لو تشوفي أشكالهم أو طريقة حياتهم أو مظهرهم .. أنا ماني عارفة هو كيف يتكلم معاهم

3. لما كان ينزل اجازته يومين مثلا ، تاني يوم يبدأ يتأفف من الأولاد و يتمنى انهم يختفوا من حياته .. يقول انت أهم شي عندي
انت الأساس و هما الفرع .. ( كذاب معليه و كذاب و كذاب ) .. مع انه أصحابه يشهدوا له انه يموت فيا .. بس أنا ما أصدقه

4. طيب كان مرات ينام عن الصلاة ، يهمل الصلاة و اكثر من فرض ، ما يروح الجمعة .. فين اللي كان يقول خلاص أنا تبت
و أنا الي خلاني اغلط اني بعدت عن ربنا و اهمل صلواتي و اهملت الجمعة .. إلخ ؟
ليش يرجع يهمل بصلاته و يبغاني اثق فيه بانه راح يستقيم ؟

5. راتبه ما أشوف منه غير 1200 مصروف الأولاد و منه يقول لي خرجي كل شي يلزم البيت .. و يقول يكفيكم ..

6. باقي راتبه فين يروح ؟ مستأجر سيارة و يدفع عليها 2500 ريال بالشهر أقل شي .. و رافض يرجعها ؟
ليش طيب متغرب عننا و تنزل لنا ثلاث أو خمس مرات في الشهر ، و راتبك هذا انت مو مستفيد منه شي ؟
2500 للسيارة + 550 ايجار الغرفة الي هو كان مستاجرها هناك + 1200 ليا و الأولاد + 500 تسديد ديون و ماعرف ايش ؟
طيب الباقي كم ؟؟؟؟ 500 ريال ؟
يعني بالله متغرب عن اولادك و بيتك و زوجتك و تشتغل 7 ايام في الأسبوع .. عشان 500 ريال تدفعها على البنزين و الدخان
و فاتورة الجوال ؟

.
.

عشان كذا بالأخير رضيت انه يجي عندنا و ينقل .. خاصة لما بديت احس اخر شهرين انه مفصول بس يخبي ..
و اشترطت انه يجي عندنا بس ماراح يكون فيه مثل زمان ، كل شوية يجلس في الشارع .. و يتحجج بأي حجة ..
أنا ماني مثل قبل ..

و لما كنت أقول له عن الشرط حقتي و انه مافي مثل قبل ،.
يقول لي مرات ( أنا كذا ، ما راح أتغير ، تبغي تروحي المحكمة روحي )
أو يطبطب علي بكلمات مو من قلبه ، و بالأخير يعمل اللي براسه ..

و على فكرة ..
هو جلس فقط اليومين هذيك مع الأولاد ..
و ما قدر يتحمل بعدها و يتحجج بأي شي عشان اجيب شغالة هي تمسكهم ..
طيب انت ايش فايدة وجودك ؟

إذا السواق اللي يوصلني انا و ولدي للعمل و المدرسة بياخد 1000 ريال ، و الشغالة تاخد 2000 ..
و مشاوير للسوق أو أي مكان .. اي احد من السواقين يوصلوني ..
و فوق هذا كله ، هو راكب سيارة بالإيجار و يدفع فيها 2500 ريال ..
و كمان الشركة حقة سيارة الإيجار متصلين عليه كل شوية لإنه ما بيدفع لهم ؟
طيب فين راتبك يروح إذا ما بتدفع اصلا ايجار السيارة ؟

.
.

هذا لو راح معايا الغربة ، مثل كذا يتعبني ..
كنت بس امشي وراه و أسدد غرامات ، و هو يصرف راتبه و ماعرف فين يروح راتبه ..

.
.

اليوم عند الشيخ بصراحة ، لو الرجال هذا ما راح يتعدل ..
أنا ما أبغى اعيش معاه ..

و بعدين لما ينقهر مني ، يروح يضرب الكبير و يحط حرته فيه ..
ليش اعيش مع شخص معقد نفسيا ؟
و اولادي على فكرة ، ما يعرفوا اهل ابوهم .. لا زوجي اللي ياخد اولاده يزوروا اهله ، و لا هم اللي يسألوا ..

و هو يجي ينام و يصحى و يخرج ..
معليه ، أنا لما حطيت شروطي كلها .. وعد بتنفيذها و جلس يماطل ..

.
.

فاكهة ..

أنا لما وضعت الشروط ، حطيت مهلة محددة و مدة زمنية بالتاريخ و اليوم .. لو ما نفذ فيها الشروط هذه ..
يعني فترة هدنة .. و هو يدري بالشي هذا ..

كنت متفقة معاه اني اروح المحكمة و اقدم الصك و يفسخوا النكاح ..
انتهت المدة ، على اساس نهاية العام الهجري ..
تحجج و طلع اعذار وماعرف ايش .. و خليناها لنهاية العام الميلادي ..
رجع يتحجج و ماعرف ايش .. خليته لنهاية الترم الأول ..
رجع برضو يتحجج وووو .. خليته لبداية الترم الثاني ..
جلس كمان يماطل و مادري كيف ،. خليته لحد ما ينتقل عندنا .. و اعرف احكم بالضبببببببط و اقرر ..

مع كذا ، أنا ما رحت أمس و طلبت فسخ عقد النكاح ، و لا رحت للقاضي ..
القاضي هذا معروف مررررررررررررررة مرة ، إنه انسان ذكي و شديد جدا و حازم و قاسي في عقوباته ..
قال لزوجي في اذنه و بعد ما ختم عالصك ، و بعد ما خرجنا من عنده ..
قاله ( بيض وجهي قدام زوجتك ، و والله لو بيوم جاتني زوجتك .. اني ما راح ارحمك و راح اتخذ أقسى عقوبة فيك )

.
.

أنا رحت للشيخ المصلح .. في نفس المحكمة لكن مكتب تاني ..
و رحت طلبت من الشيخ انه يهدده و يخوفه ..

و اخر الحلول ، الطلاق لو ما يتعدل ..

لإنه زوجي كان كل مرة تنتهي المدة المحددة و اللي كنا متفقين عليها ..
كان يقول لي ( تبغي تروحي المحكمة ، روحي .. تبغي تطلبي الطلاق ، روحي .. بس رجعي نص المهر ) ..
أو يقول لي ( لا تحلمي تشوفي الأولاد ، راح اخدهم و ارميهم و ما تدري عنهم )

طبعا كلام بس كذا ، و تهديد عالفاضي مثل الأطفال ..

.
.

و وقت ما نتناقش ، كان يقل ادبه في استخدام الكلمات و الألفاظ ..
أنا أكلمه بهداوة و احترام .. ( و لو سمحت .. طيب اسمعني شوية .. إلخ )
لكن هو يا يرد ردود هبلة و يحاول يستغل عاطفتي مثل زمان ( يا حبيبتي .. يا روحي .. يا عمري .. إلخ )
عشان ينسيني الموضوع و يتقفل .. يعطيني مثل ابر مخدرة ، لكن ما يتخذ حلول ..

و لما يشوف انه محاولاته هذه ( فشلت ) ..

يبدأ يتكلم كلمات و ألفاظ سوقية مثل البيئة الي هو اتنشأ فيها ..
كلمات نفس كلمات أهله ، بالضبط ..

كم مرة ارفض انه يكلمني بالكلمات هذه ، أو يشتمني بالألفاظ هذه ..
لكن هو كل مرة يزيد ، كل مرة يزيد .. و أنا أصلا بداخلي - الجروح - لسى ما اتعافت ، عشان تجي حضرتك و تزود علي ..

.
.

خلاص ، اليوم نروح للشيخ ..
و اصلح غلطتي في اني اعطيته فرص ، و قلت بيتعدل ..

.
.

و مع العلم إني كشفت مرة انه توه كان مشتري جوال جديد ، يشبه جواله الأصلي ..
عشان لما أأشوف بيده الجوال التاني ، ما اكتشف إنه مو هو جواله الأصلي ..

شايفة كيف جالس يتلاعب ؟
و يقول لي مو جوالي ، جوال صاحبي طلب مني اصلحه له و افرمته ..
قلت له جوال صاحبك و مسجل بإيميلك و اليوزر نيم و الباسورد حقتك و محمل فيه الألعاب الي تلعبها ؟

إيش الهدف إنه يرجع يطلع جوال تاني ، و باحتراف اكثر من قبل ؟
و نسخة من جواله الأصلي ؟

.
.

لا يتعب لي أعصابي ..
يا ينفذ طلباتي ، يا نتطلق ..
يا يصير رجال ، يا نتطلق ..

أنا رجعت بشرط إنه هو اللي يرتقي لمستوانا ، مو أنا اللي انزل لمستواه ..
مو أنا اللي اتعايش معاه ، هو الي يتعايش معايا ..

لو مو راضي يمشي على نفس أسلوب و نمط حياتي ..
خليه يروح .. يكفي السنوات الي تجاهلت فيها نفسي و حاولت كثير اني افهمه و انزل له و اقلل من قيمتي و مقداري عشان ارضيه

أنا ما راح اجري وراه ..
هو الي خسران لو تركنا ، هو الي راح يضيع ..
و خلي أصحابه ( ينفعوووووووووووووووووه ) ..
خلي أخوه ( ينفععععععععععععععه ) ..