رد : كيف أتغلب على غيرتي من زوجته الأولى ؟
أحسن الحين يا زين؟
لاحظتي إنه رغم (روحي بيت أهلج) .. ياج في يومج وتم معاج لين المغرب؟
لاحظتي إنه رغم (روحي بيت أهلج) .. قعد معاج وطلب منج إنج تحافظين على زين اللي حبها وتزوجها وجمّلت أيامه؟
قلت لج يا زين .. زوجج رجل شخصيته قوية وما عنده لف ودوران وواضح معاج تماماً .. وحتى كلامه معاج عن سلبيات زوجته سابقاً ـ رغم إني ما أحب هذا الأسلوب بشكل عام ـ لكني ما قدرت أنظر له بشكل سلبي بقدر ما نظرت له إنه يساعدج ويدلج على الطريق اللي من خلاله تقدرين توفرين له الاستقرار اللي يحتاجه.
الريال باقي عليج يا زين وما يبا يخسرج .. لكن إنتي ما تساعدينه بجد.
أما سالفة (بس انتي او هي اللي تصير معاي زينه اكيد راح اقبل عليها اكثر!!! )
فأكاد أجزم لج إنه ما كان راح يسمّعج هالعبارة لولا الزوبعة اللي انتي سويتيها!
والله مب حابة أتكلم إلا عنج إنتي وبس .. لكن في أمور ما ينفع نتغافل عنها .. وكون زوجته صلّحت من نفسها لتفادي الطلاق فهذا أمر طبيعي ومتوقع .. وكونه يتجاوب مع هذا التغيير بشكل إيجابي يصب في صالح بيته وأسرته وعياله .. فهذا بعد شيء طبيعي ومتوقع.
أما مسألة الحب فهذا أمر مختلف تماماً يا زين .. وسبق وقلت لج مب طبخ والا صوت واطي هو اللي بيحيي الحب من جديد ..... لكن في نفس الوقت الحب والمشاعر مب بيد الإنسان أصلاً .. وإنتي نفسج ما تضمنين إن مشاعرج وحبج له يتم على نفس القدر والمستوى طول العمر.
ومرة ثانية أذكرج .. كافة التفاصيل والمعطيات اللي قلتي لي عنها تقول إنه الريال يحبج جداً جداً .... والحالة الوحيدة اللي تخليج تتوترين وتحسين بالقلق إن هالتفاصيل تتغير بشكل ما ..... لكن ما دامت أمورج مستقرة وما طرأ أي تغيير على حياتج وتفاصيلج معاه فالمفروض تظلين هادئة ومطمئنة.
هدّي نفسج يا زين ولا تخسرين زوج يحبج وشاريج.
وإذا كان ابتعادج في بيت منفصل بيكون أريح لج .. فأنا أأيد هالاقتراح.
__________________
اللهم طِيبَ الأثر .. وحُسْنَ الرحيل.