*. فيه شي بأوضحه .*

موضوع العلاقات لا سمح الله ..
ترك الصلاة متعمدا
غياب بدون أسباب عن المنزل ..
تصرفات مريبة ..

هذه ما حصلت والحمدلله ..
لو صارت لا سمح الله ..
انا على ( ربع غلطة ) ماني مقصرة .. جالسة استنى ربع غلطة ..

لو صارت لا سمح الله او شكيت مجرد شكك مع ( وجود مؤشرات ) ..
مباشرة راح انهي حياتنا

.
.

لكن زوجي من كثر ما كان ممثل .. و انا كنت اثق فيه و ما احب اُسلوب التحقيق ..
فحاليا هو من كثر ما يحاول يثبت لي انه تغير ..
انا الي تغيرت و صرت جالسة له ( عالتكة ) .. الشي هذا متعب لي نفسيا ..

تحول الموضوع لعناد .. لانه ما تعود مني التحقيق و اُسلوب الخنق ..
يقول هذا اُسلوب ابويا و أكرهه .. فجات فترة صار بعد الصلح ؛ يتقصد انه يستفزني
عشان لا أعامله بالطريقة هذه .. و بدأ الشك يدخل قلبي ..

رحت مباشرة للمحكمة و كلمت شيخ الصلح و دقوا عليه ..
و عرفت وقتها انه الصك حفظ لي حقوقي كلها و عرفت انها فعلا ورقة رابحة بيدي
و هو كمان عرف وقتها اني فعلا جادة و ممكن بيته يتخرب اي وقت ..

هذا قبل ( شهر تماما ) ..

.
.

لما شاف الموضوع جاد فعلا .. و اني ممكن باي لحظة أنهي حياتي و حياته ..
صار يراضيني باي طريقة .. بس انا بداخلي نفور بسبب انه عاطل و رجع للكسل و تعرف على شلة جديدة
و أغلب وقته معاهم .. بس ما يسهر مثل زمان ..
12 بالكثير او 12:30 في البيت ..

و لو يسهر ليلة الجمعة لحد 2 معاهم .. ما أزعل منه بس كل شي بالتفاهم
مو بالكذب ..

هو بدا يفتح لي قلبه مرات .. لانه صندوق مغلق مع اهله و مع الكل ..
بدا يشوف مني الوجه الاخر ايضا .. الوجه المتفاهم معاه لو انه تعامل معاي بصراحة و صدق ..
مو مثل ما كان يشوف من اهله ..

اهله لو يعاملهم بصراحة و صدق .. يعاقبوه و يذلوه و ينكدوا عليه .. فالكذب هو الحل و كان يمشي عليهم كذبه
انا الكذب ما يمشي معايا .. و احترم الصراحة
ربي رازقني ذاكرة و قدرة على ربط الأحداث ببعضها .. فدائما يتورط كان ..

باكتشف أكاذيبه .. و الاكاذيب لما اكتشفها كنت وقتها انكد عليه حياته ..
صار دحين يتعامل معاي بصدق .. راح جلس مع شيخ و نصحه انه يعاملني بصراحة و صدق ..

و بدا يمشي معايا بالشكل هذا حاليا ..

لكن بسبب كثرة أكاذيبه سابقا و تمثيلياته .. انا ما صرت أصدقه ..

من أسبوعين بدا يرسل لي إثبات على كل شي يقولوه
مثلا يرسل لي ( موقعه ) او يرسل لي ( صورة إثبات على كلامه ) ..

الفرق حاليا اني تعلمت و اعرف اكشف طريقته لما يكذب ..
لكن أكاذيبه ما تستحق حاليا .. الذهاب للمحكمة لطلب الطلاق
هذا سبب عدم استخدامي الصك الى الان ..

لكن لو استمر بالطريقة هذه بالكذب .. يعني حاستنتج انه راح يرجع لنفس طريقه القديم لا سمح الله
هو كمان صار يعرف اني اكشفه لما يكذب على طول .. و ما اسكت له لو كذب علي كذبة بسيطة ..

.
.

ليش ما استخدم الصك و اخلص حالي منه !؟

لإني مراقبته .. و شايفة محاولاته ..
صح انها ما ترضيني .. لكن احاول اقيس بمقياسه هو .. و بقدراته هو ..

انا ممكن اخلص 10 اشغال في يوم واحد الحمدلله
هو يخلص شغلة وحدة في عشر ايام ..

.
.

دحين صار بنفسه .. يجيب إثباتات لي عشان ما انفصل عنه ..
لقي وظيفة جديدة .. بعد ما دخل للمدير بنفسه و بكي و قال له داخل على الله ثم عليك ..
عندي ثلاث اطفال و زوجتي رافعة علي قضية بالمحكمة راح تطلق مني لو جلست عاطل ..

و جاب لي الاوراق الثبوتية عشان أصدقه ..
و قال ابغى اطلب منك طلب واحد ..

كفاية كذا ..
لا تضغطي علي زيادة .. من اول احاول اثبت لك اني تغيرت ..
خلاص صدقيني و لا تصيري كذا مثل أبوي ..

قلت له تحملني .. الثقة ما ترجع بسهولة .. و انا تعبانة نفسيتي و أعاني ..
و انا ما كنت كذا زمان .. لكن انت خليتني كذا معاك بيدك ..
كنت اثق فيك اكثر من نفسي و انت ما قدرت ثقتي ..

المهم .. قال انا عارف الشي هذا و اني انا السبب
و عشان كذا متحمل ضغوطاتك علي .. بس خففي شوي

.
.

التوقيف حقة اليومين الي فاتوا .. طلعت حكاية لها بعدين اكتبها

انا ابغى انفصل عنه ( عاطفيا ) .. عشان لا افكر فيه ..

.
.

انا اعتبرته ميت .. و رصيده صفر عندي و لغيت كل ذكرياتي معاه

بس هو كمان .. مع كسله هذا و اتكاليته ..
لكن بيعمل أمور تنضاف لرصيده .. و صرت اخاف أتعلق فيه و ارتبط به عاطفيا ..