رد : رايكم في تجارة سبايك الذهب
الله يوفقك يارب ويرزقك من واسع فضله يارب
اللي بيتاجر بالذهب لازم يكون ملم بكل شئ في عالم هالتجارة
لأنه الصراحة اذا بغيت تشتري من محلات الذهب تلاقي منهم غش وتدليس وكذب إلا مارحم الله
انا شخصيا ياما اكلتها من محلات الذهب مايسرقونك الا بسالفة المصنعية جيت اشتري ذهب عادي سادة قال لي العامل اللي بالمحل الجرام عندنا 160ريال قلت طيب السعر بموقع الذهب اليوم 133ريال الجرام عيار 21 قال فيه فرق مصنعيه بالجرام 27 ريال يعني غش عيني عينك. واضح واللي يقهرك اللي يحلفون يتقطعون وهم يحلفون.
طيب اخترت طقم لازوردي اللي فيه فصوص عيار 18 قال هذا جرامه 167 ريال ليش طيب ماهو اخف من الذهب الثاني وكله فصوص ماتنحسب لاجيت تبيع مايحسبونها قال فيه مصنعية وهذا جديد توه نزل بالسوق موديل جديد دوروا بالمحلات الثانية مابتلاقون مثل هالموديل هذا يتعبون في صنعته وشغلته
فيه غش وتلاعب كبير بمحلات الذهب الا مارحم الله
قبل سنوات شريت ذهب وجيت ابيع الحمدلله بعت بمكسب طيب لانه شريت والجرام كان باقي على 80و85ريال وبعت ايام الإرتفاع لاكن الحين اقل شئ خسارة بالقطعة 300 ريال لذلك عزفت عن شراء الذهب بس اخذ اشياء خفيفة لاكن اذا كان عندك مناسبة وبغيت تهدي طقم محرز بسعر طيب مضطر تشتري لأنك بتهديه للي يعز عليك
ونصيحتي لك اذا بغيتي تشترين ذهب غير السبايك يعني تاخذين غوايش وتاخذين اطقم او احزمة ذهب وخنقات فالأفضل تاخذين من النوع السادة اللي مافيه فصوص وكرستالات انتبهي تاخذين من المزخرف بالفصوص ترى بتخسرين لانه مايحسبونها لك وقت البيع وهي ثقيلة وقت الشراء تنحسب عليك ووقت البيع ينقصونها ماتنحسب لك فانتبهي
وخذي من ذهب مشغول سادة والافضل بحريني او اماراتي دبي وفيه ذهب سادة مصنع هنا بالسعودية اذا ماخاب ظني انه مصنع العثيم لذهب والمجوهرات يبيعون في المحلات منها غوايش مبرومة ملفوفة وثقيلة وهي سادة ايام الرخص كانت الحبة الواحدة منها تباع 4600 ريال يوم تشوفينها تقولين شكلها خفيفة بس تشيلينها تحسين بثقل وزنها وعندك الجر الحلبي هذا قديم بس يمسك سعره لانه سادة هذا اذا بغيتي لتجارة السادة افضل لك بس يبغى لك صبر عليه الين مايرتفع.
ولاتنسين خذي بكلام الغالية شقردية ولا هانوا الباقين
بالنسبة للعقار اذا فكرتي خذي قطعة تجاريه. واعرضيها للإستثمار يعني تأجرينها سنويا ومردودها بيكون على حسب موقعها في شركات تستأجرها وتخليها مستودعات ومخازن او ابني فيها استراحة واجريها يومي وشهري بتعينين خير من وراها ان شاء الله وربي يوفقك ويسهل لك يارب.
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله